ಕೋಲಾರದ ಈ ಗ್ರಾಮದಲ್ಲಿ ಹಾರುವ ಅಪರೂಪದ ಕಪ್ಪೆಗಳು ಪತ್ತೆ

ಕೋಲಾರ: ಜಿಲ್ಲೆಯ ಶ್ರೀನಿವಾಸಪುರ ತಾಲೂಕಿನಲ್ಲಿರುವ ಪಣಸಮಾಕನಹಳ್ಳಿ ಎಂಬ ಪುಟ್ಟ ಗ್ರಾಮವು ಮಾವಿನ ತೋಟಗಳಿಗೆ ಹೆಸರುವಾಸಿಯಾಗಿದ್ದು, ಕಳೆದ ಕೆಲ ದಿನಗಳಿಂದ ಅಪರೂಪದ ಅತಿಥಿಗಳ ನೆಲೆಯಾಗಿದೆ. ಹೌದು, ಗ್ರಾಮದ ಸುಮಾರು ಡಜನ್‌ಗಟ್ಟಲೆ ಮನೆಗಳ ಸಮೀಪ ಹಾರುವ ಕಪ್ಪೆಗಳು ಕಂಡು ಬಂದಿದ್ದು, ಕುತೂಹಲಕ್ಕೆ ಕಾರಣವಾಗಿದೆ.

ವೈಜ್ಞಾನಿಕವಾಗಿ ರಕಾಫೋರಿಡೇ ಎಂದು ಗುರುತಿಸು ಅಥವಾ ಹಾರುವ ಕಪ್ಪೆಗಳು ಹೆಚ್ಚಾಗಿ ಶ್ರೀಲಂಕಾದಲ್ಲಿ ಕಂಡುಬರುತ್ತವೆ. 'ಕಳೆದ ಕೆಲ ದಿನಗಳಿಂದ ಗ್ರಾಮದ ಅನೇಕ ಮನೆಗಳ ಹತ್ತಿರ ಈ ಜಾತಿಯ ಕಪ್ಪೆಗಳು ಕಾಣಿಸಿಕೊಳ್ಳುತ್ತಿವೆ' ಎಂದು ನಿವೃತ್ತ ಮುಖ್ಯ ಶಿಕ್ಷಕ ಹಾಗೂ ಬರಹಗಾರರಾದ ಆರ್.ಚೌಡ ರೆಡ್ಡಿ ತಿಳಿಸಿದ್ದಾರೆ.

ಶನಿವಾರ ಶೌಚಾಲಯದಲ್ಲಿ ಅವರೂಪದ ಕಪ್ಪೆಯೊಂದು ಗಮನಕ್ಕೆ ಬಂದಿತು. ಕಪ್ಪೆ ಹಿಡಿಯಲು ಯತ್ನಿಸಿದಾಗ ಒಂದು ಗೋಡೆಯಿಂದ ಇನ್ನೊಂದು ಗೋಡೆಗೆ ಹಾರುವ ಮೂಲಕ ಆಶ್ಚರ್ಯ ಮೂಡಿಸಿತು. ಇದು ಸುಮಾರು 4 ಅಡಿಯಷ್ಟು ಹಾರಬಲ್ಲ ಸಾಮರ್ಥ್ಯ ಹೊಂದಿದೆ. ಅಷ್ಟೇ ಅಲ್ಲದೆ, ನೆರೆಹೊರೆಯವರು ಸಹ ವಿಶಿಷ್ಟ ಜಾತಿಯ ಕಪ್ಪೆಗಳು ಮನೆ ಪ್ರವೇಶಿಸುತ್ತಿವೆ ಎಂದು ತಿಳಿಸಿರುವುದಾಗಿ ರೆಡ್ಡಿ ಹೇಳಿಕೊಂಡಿದ್ದಾರೆ.

ಕೋಲಾರದಲ್ಲೂ ಈ ಜಾತಿಯ ಕಪ್ಪೆಗಳು ಕಾಣಿಸಿಕೊಂಡಿವೆ. 'ಒದ್ದೆ ನೆಲದ ಮೇಲೆ ಕಂದು ಬಣ್ಣದ ಕಪ್ಪೆಯೊಂದನ್ನು ಗಮನಿಸಿದೆ. ಹಿಡಿಯಲು ಯತ್ನಿಸಿದಾಗ ಹಾರಿಹೋಯಿತು' ಎಂದು ಪಿಸಿ ಬಡಾವಣೆಯ ನಿವಾಸಿ ಆರ್.ಶ್ರೀಶಾ ತಿಳಿಸಿದ್ದಾರೆ.

ಸ್ಪಲ್ಪ ಹಸಿರು ಬಣ್ಣ ಹೋಲುವ ಕಪ್ಪೆಗಳು ಸಾಮಾನ್ಯ ಕಪ್ಪೆಗಳಿಗಿಂತ ಭಿನ್ನವಾಗಿರುತ್ತವೆ. ಈ ಜಾತಿಯ ಕಪ್ಪೆಯ ಬೆರಳುಗಳ ಮಧ್ಯ ಕೆಂಪು ಜಾಲಪೊರೆ ಇರುತ್ತದೆ. ಇದರ ಹಿಮ್ಮಡಿಯ ಮೇಲೆ ಒಂದು ರೀತಿಯ ಗಾಢ ಚರ್ಮವಿರುತ್ತದೆ. ಮರಗಳ ಹಾಗೂ ಪೊದೆಗಳ ಮೇಲೆ ಗಟ್ಟಿಯಾಗಿ ತಳವೂರಲು ಈ ಚರ್ಮ ವೈಶಿಷ್ಟ್ಯಗಳು ಸಹಾಯ ಮಾಡುತ್ತವೆ ಎಂದು ರೆಡ್ಡಿ ತಿಳಿಸಿದ್ದಾರೆ.