ಜಿಲ್ಲೆಯ ವಿದ್ಯಾರ್ಥಿನಿ ಅನುಶ್ರೀಗೆ ರಾಷ್ಟ್ರಮಟ್ಟದ ಪ್ರಶಸ್ತಿ

ಕೋಲಾರ: ಕೆಜಿಎಫ್‌ ತಾಲೂಕಿನ ದೊಡ್ಡಬೊಮ್ಮಪಲ್ಲಿ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ 7ನೇ ತರಗತಿ ವಿದ್ಯಾರ್ಥಿನಿ ಅನುಶ್ರೀ ರಾಷ್ಟ್ರಮಟ್ಟದ ಇನ್ಸ್‌ಪೈರ್‌ ಅವಾರ್ಡ್‌ ಮಾನಕ್‌-2018ರ ಸ್ಪರ್ಧೆಯಲ್ಲಿ ಪರಿಸರ ಸ್ನೇಹಿ ಬಹು ಉಪಯೋಗಿ ಕೃಷಿ ಯಂತ್ರದ ಮಾದರಿ ಪ್ರದರ್ಶಿಸಿ ರಾಷ್ಟ್ರಮಟ್ಟದ ಪ್ರಶಸ್ತಿ ಗಳಿಸಿಕೊಂಡಿದ್ದಾರೆ.

ಬಡ ಕುಟುಂಬದಿಂದ ಬಂದ ಅದೇ ಗ್ರಾಮದ ನಾಗರಾಜ್‌, ಗೌರಮ್ಮ ದಂಪತಿ ಪುತ್ರಿಯಾದ ಅನುಶ್ರೀ ಅವರು ಮಾರ್ಗದರ್ಶಿ ಶಿಕ್ಷ ಕಿ ಕವಿತಾ ಅವರ ನೆರವಿನಿಂದ ಈ ಕೃಷಿ ಯಂತ್ರದ ಮಾದರಿ ಪ್ರದರ್ಶಿಸಿ ಗಮನ ಸೆಳೆದಿದ್ದಾರೆ.

ರಾಷ್ಟ್ರಮಟ್ಟದ ಎನ್‌ಎಲ್‌ಇಪಿಸಿ ಇನ್ಸ್‌ಫೇರ್‌ ಅವಾರ್ಡ್‌ ಮಾನಕ್‌-2018ರ ಸ್ವರ್ಧೆಯಲ್ಲಿ ಒಟ್ಟು 850 ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದು, ರಾಜ್ಯದಿಂದ 109 ವಿದ್ಯಾರ್ಥಿಗಳಲ್ಲಿ ಒಬ್ಬರಾಗಿ ಅನುಶ್ರೀ ಕಠಿಣ ಸ್ಪರ್ಧೆ ಎದುರಿಸಿದ್ದರು.

ಅಂತಿಮವಾಗಿ 60 ವಿದ್ಯಾರ್ಥಿಗಳು ರಾಷ್ಟ್ರಮಟ್ಟದಲ್ಲಿ ಪ್ರಶಸ್ತಿ ಗಳಿಸಿದ್ದು, ಇವರಲ್ಲಿ ಐದು ಮಂದಿ ಮಾತ್ರ ಕರ್ನಾಟಕದವರಾಗಿದ್ದು, ಆ ಐವರಲ್ಲಿ ಅನುಶ್ರೀ ಒಬ್ಬರಾಗಿದ್ದಾರೆ.

ಮಾ.14 ರಿಂದ 18ರವರೆಗೂ ಗುಜರಾತ್‌ನ ಗಾಂಧಿನಗರದಲ್ಲಿ ಎನ್‌ಐಎಫ್‌ ಸಂಸ್ಥೆ ಆಯೋಜಿಸಿರುವ ಇಂಟರ್‌ ನ್ಯಾಷನಲ್‌ ಇನ್ನೋವೇಟಿವ್‌ ಫೆಸ್ಟಿವಲ್‌ನಲ್ಲಿ ಈ ವಿದ್ಯಾರ್ಥಿನಿ ಭಾಗವಹಿಸುತ್ತಿದ್ದು, ಮಾ.18ರಂದು ಈ ಕಾರ್ಯಕ್ರಮವನ್ನು ಭಾರತದ ರಾಷ್ಟ್ರಪತಿ ರಾಮನಾಥ ಕೋವಿಂದ್‌ ಉದ್ಘಾಟಿಸಿ, ಬಹುಮಾನ ವಿತರಿಸಲಿದ್ದಾರೆಂದು ಡಯಟ್‌ ಪ್ರಾಂಶುಪಾಲ ಎಚ್‌.ವಿಕ್ಟರ್‌ ತಿಳಿಸಿದ್ದಾರೆ. ಈ ವಿದ್ಯಾರ್ಥಿಗೆ ಡಯಟ್‌ನ ಹಿರಿಯ ಉಪನ್ಯಾಸಕರು ಅಭಿನಂದಿಸಿದ್ದಾರೆ.