ರೀಲರ್‌ಗಳ ಪ್ರೋತ್ಸಾಹಧನ ಮುಂದುವರಿಸಲು ಕೆಎಚ್‌ಎಂ ಮನವಿ

ಕೋಲಾರ: ರೇಷ್ಮೆ ನೂಲು ಬಿಚ್ಚಣಿದಾರರಿಗೆ (ರೀಲರ್ಸ್‌) ಈ ಹಿಂದೆ ನೀಡುತ್ತಿದ್ದ ರೀತಿಯಲ್ಲಿ ಪ್ರೋತ್ಸಾಹಧನ ಕಾರ್ಯಕ್ರಮವನ್ನು ಮುಂದುವರಿಸಬೇಕು ಎಂದು ಸಂಸದ ಕೆ.ಎಚ್‌.ಮುನಿಯಪ್ಪ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಹಾಗೂ ರೇಷ್ಮೆ ಸಚಿವ ಸಾ.ರಾ.ಮಹೇಶ್‌ ಅವರಲ್ಲಿ ಮನವಿ ಮಾಡಿದ್ದಾರೆ.

ಸಚಿವ ಸಾ.ರಾ.ಮಹೇಶ್‌ ಅವರನ್ನು ಗುರುವಾರ ಭೇಟಿ ಮಾಡಿ ಮನವಿ ಸಲ್ಲಿಸಿದ, ಸರಕಾರವು ದುಡಿಮೆ ಬಂಡವಾಳಕ್ಕೆ ನೀಡುವ ಸಾಲಕ್ಕೆ ಬಡ್ಡಿಯನ್ನು ಪಾವತಿಸಲು ವಾರ್ಷಿಕವಾಗಿ 1,690 ಲಕ್ಷ ಗಳನ್ನು ಮೀಸಲಿಟ್ಟಿರುವುದಾಗಿ ತಿಳಿಸಿದ್ದು, ಈ ಮೀಸಲಿಟ್ಟಿರುವ ಹಣವನ್ನು ಸಕಷ್ಟದಲ್ಲಿರುವ ರೇಷ್ಮೆ ನೂಲು ಬಿಚ್ಚಣಿದಾರರಿಗೆ ಈ ಹಿಂದೆ ನೀಡುತ್ತಿದ್ದ ರೀತಿಯಲ್ಲಿ ಮುಂದುವರಿಸಬೇಕು ಎಂದು ಕೋರಿದರು.

ಪ್ರೋತ್ಸಾಹಧನ ಕಾರ್ಯಕ್ರಮವನ್ನು ಮುಂದುವರಿಸಿದರೆ ಎಲ್ಲಾ ರೀಲರ್‌ಗಳಿಗೆ ಈ ಸೌಲಭ್ಯ ದೊರೆಯುವುದಲ್ಲದೆ ರೀಲರ್‌ಗಳ ಸಂಕಷ್ಟಕ್ಕೆ ಸರಕಾರ ಸ್ಪಂಧಿಸಿದಂತೆ ಆಗುತ್ತದೆ. ಈಗ ಹೊಸದಾಗಿ ರೂಪಿಸಿರುವ ರೀಲರ್‌ಗಳಿಗೆ ಬೆಳೆ ಸಾಲದ ಮಾದರಿಯಲ್ಲಿ ಶೂನ್ಯ ಬಡ್ಡಿ ದರದಲ್ಲಿ ದುಡಿಮೆ ಬಂಡವಾಳ ಯೋಜನೆಯನ್ನು ಕಾರ್ಯರೂಪಕ್ಕೆ ತರಲು ಇಲಾಖೆಯಿಂದ ಎಷ್ಟೇ ಪ್ರಯತ್ನ ಪಟ್ಟರೂ ಈ ಯೋಜನೆ ಜಾರಿಗೊಳಿಸಲು ಕಷ್ಟ ಸಾಧ್ಯವಾಗುತ್ತದೆ. ಆದ್ದರಿಂದ ರೀಲರ್‌ಗಳಿಗೆ ಅನುಕೂಲವಲ್ಲದ ಯೋಜನೆಗಳನ್ನು ರದ್ದುಗೊಳಿಸಿ ಈ ಹಿಂದೆ ನೀಡುತ್ತಿದ್ದ ಪ್ರೋತ್ಸಾಹಧನವನ್ನು ನೀಡುವ ಕಾರ್ಯಕ್ರಮವನ್ನು ಮುಂದುವರಿಸಬೇಕು. ರೇಷ್ಮೇ ಆಮದು ಶುಲ್ಕವನ್ನು ಶೇ 15 ಕ್ಕೆ ಹೆಚ್ಚಿಸಿ ನಾಡಿನ ರೇಷ್ಮೆ ಕೃಷಿಕರಿಗೆ ನೆರವಾಗುವಂತೆ ಕೇಂದ್ರವನ್ನು ಆಗ್ರಹಿಸುವಂತೆ ಅವರು ಈ ಸಂದರ್ಭದಲ್ಲಿ ಕೋರಿದರು.