ಕತ್ತಿ ಡ್ಯಾನ್ಸ್‌ ಮಾಡಿದ ಸಚಿವ ಎಂಟಿಬಿ ನಾಗರಾಜ್‌ !

ಕೋಲಾರ : ಇತ್ತೀಚೆಗಷ್ಟೆ ನಾಗಿಣಿ ಡ್ಯಾನ್ಸ್‌, ಭಾನುವಾರವಷ್ಟೆ ಹುಲಿ ಡ್ಯಾನ್ಸ್‌ ಮಾಡಿ ಸುದ್ದಿಯಾಗಿದ್ದ ಸಚಿವ ಎಂಟಿಬಿ ನಾಗರಾಜ್‌ ಕತ್ತಿ ಡ್ಯಾನ್ಸ್‌ ಮೂಲಕ ಗಮನಸೆಳೆದ ಘಟನೆ ತಾಲೂಕಿನ ಅರಾಭಿಕೊತ್ತನೂರಿನಲ್ಲಿ ಸೋಮವಾರ ನಡೆಯಿತು.

ಅರಾಭಿಕೊತ್ತನೂರು ಗ್ರಾಮದಲ್ಲಿ ಶ್ರೀ ಸಿದ್ಧೇಶ್ವರ, ಶ್ರೀ ಬೀರೇಶ್ವರ, ಶ್ರೀ ಬತ್ತೇಶ್ವರ, ಬೆಳ್ಳೂರೇಶ್ವರ, ಶ್ರೀ ಬಿಡದೀಶ್ವರಸ್ವಾಮಿ ದೇವಾಲಯ ಮನೆ ದೇವರ ದೊಡ್ಡ ಜಾತ್ರೆ ಹಾಗೂ ಪ್ರತಿ 5 ವರ್ಷದಂತೆಯೇ ಈ ಬಾರಿಯೂ ಕುರುಬ ಸಮುದಾಯದ ವತಿಯಿಂದ ದೊಡ್ಡ ದ್ಯಾವರ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಯಾಗಿ ಆಗಮಿಸಿದ್ದ ರಾಜ್ಯ ವಸತಿ ಸಚಿವ ಎಂಟಿಬಿ ನಾಗರಾಜ್‌ ಗಮನ ಅಲ್ಲಿದ್ದ ಕಲಾತಂಡಗಳ ನೃತ್ಯಗಾರರತ್ತ ಸಾಗಿತು. ಕೂಡಲೇ ಅಲ್ಲಿಗೆ ತೆರಳಿ ಕತ್ತಿ ಹಿಡಿದು ಡ್ಯಾನ್ಸ್‌ ಮಾಡುವ ಮೂಲಕ ನೆರೆದಿದ್ದವರನ್ನು ಹುಬ್ಬೇರಿಸಿದರು.

ಕತ್ತಿಹಿಡಿದು ಕಲಾವಿದರೊಂದಿಗೆ ಸುತ್ತು ಹಾಕಿಕೊಂಡು 2-3 ನಿಮಿಷಗಳ ಕಾಲ ಸಖತ್‌ ಸ್ಟೆಫ್ಸ್‌ನೊಂದಿಗೆ ಸಚಿವ ಡ್ಯಾನ್ಸ್‌ ಮಾಡಿದ್ದು, ಅಲ್ಲಿದ್ದವರಿಗೆ ಮತ್ತಷ್ಟು ಕುತೂಹಲ ಕೆರಳಿಸಿತು.

ಇತ್ತೀಚೆಗೆ ನಾಗಿಣಿ ಡ್ಯಾನ್ಸ್‌ನೊಂದಿಗೆ ವೈರಲ್‌ ಆಗಿದ್ದ ಸಚಿವರು, ಭಾನುವಾರವಷ್ಟೇ ಕೆ.ಆರ್‌.ಪುರದಲ್ಲಿ ನಡೆದಿದ್ದ ಕಾರ್ಯಕ್ರಮವೊಂದರಲ್ಲಿ ಬಾಯಲ್ಲಿ ನಿಂಬೆಹಣ್ಣು ಇಟ್ಟುಕೊಂಡು ಹುಲಿ ಡ್ಯಾನ್ಸ್‌ ಮಾಡಿದ್ದರು. ಸೋಮವಾರ ಅರಾಭಿಕೊತ್ತನೂರಿನಲ್ಲಿ ಕತ್ತಿ ಡ್ಯಾನ್ಸ್‌ ಮೂಲಕ ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ.