ಅಕ್ರಮ ಸಂಬಂಧ ಬಯಲಾಗುವ ಭಯ: ಬಾಲಕಿ ಕೊಂದು ಸುಟ್ಟ ಆರೋಪಿ ಸೆರೆ

ಮಾಲೂರು: ಅಕ್ರಮ ಸಂಬಂಧ ಬಯಲಾಗುವ ಭಯದಲ್ಲಿ ಬಾಲಕಿಯನ್ನು ಸಾಯಿಸಿ ನಂತರ ಸುಟ್ಟು ಹಾಕಿರುವ ಭಯಾನಕ ಘಟನೆ ತಾಲೂಕಿನ ಹುಲ್ಕೂರು ಗ್ರಾಮದಲ್ಲಿ ನಡೆದಿದೆ.

ಮೃತಪಟ್ಟ ಬಾಲಕಿಯನ್ನು ಹುಲ್ಕೂರು ಗ್ರಾಮದ ವೇದ(4) ಎಂದು ಗುರುತಿಸಲಾಗಿದೆ. ಆರೋಪಿ ಇದೇ ಗ್ರಾಮದ ಮುನಿರಾಜ್‌(29) ನನ್ನು ಪಟ್ಟಣದ ಪೊಲೀಸರು ಬಂಗಾರಪೇಟೆ ಸಮೀಪ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.

ತಾಲೂಕಿನ ಅರಳೇರಿ ಗ್ರಾಪಂ ವ್ಯಾಪ್ತಿಯ ಹುಲ್ಕೂರು ಗ್ರಾಮದ ಮುನಿರಾಜ್‌ ಎಂಬುವವರಿಗೆ ಮದುವೆಯಾಗಿದ್ದು 4 ವರ್ಷದ ಗಂಡು ಮಗು ಇದೆ. ಅಲ್ಲದೆ, ಪತ್ನಿ 7 ತಿಂಗಳ ಗರ್ಭಿಣಿಯಾಗಿದ್ದು, ಈತ ಗಾರೆ ಕೆಲಸ ಮಾಡಿಕೊಂಡು ಜೀವನ ನಡೆಸುತ್ತಿದ್ದ. ಈತನ ಮನೆಯ ಪಕ್ಕದಲ್ಲಿ ವಾಸವಾಗಿದ್ದ ವೇದಾ ಚಿಕ್ಕಮ್ಮ ವರಲಕ್ಷ್ಮೀ ಜತೆ ಮುನಿರಾಜು ಅಕ್ರಮ ಸಂಬಂಧ ಹೊಂದಿದ್ದ.

ಶುಕ್ರವಾರ ರಾತ್ರಿ ವರಲಕ್ಷ್ಮಿ ಹಾಗೂ ಮುನಿರಾಜ್‌ ಸರಸದಲ್ಲಿ ತೊಡಗಿರುವುದನ್ನು ಬಾಲಕಿ ವೇದಾ ನೋಡಿದ್ದಳು. ಅಕ್ರಮ ಸಂಬಂಧ ಬಯಲಾಗುವ ಭಯದಲ್ಲಿ ಬಾಲಕಿ ವಿಷಯವನ್ನು ಎಲ್ಲರಿಗೂ ತಿಳಿಸುತ್ತಾಳೆಂದು ಅನುಮಾನಗೊಂಡ ಮುನಿರಾಜ್‌ ಆಕೆಯ ಬಾಯಿಯನ್ನು ಮುಚ್ಚಿ ಮನೆಯಿಂದ ಹೊರಗಡೆ ಎತ್ತಿಕೊಂಡು ಹೋಗಿ ಆಕೆಯನ್ನು ಸಾಯಿಸಿ ನಂತರ ಸುಟ್ಟಿದ್ದಾನೆ.

ವೇದಾ ತಾಯಿಯ ಬಾಣಂತನಕ್ಕೆಂದು ಬಂದಿದ್ದ ಆಕೆಯ ಪೋಷಕರು ಶುಕ್ರವಾರ ವೇದ ಕಾಣಸದೇ ಇರುವ ಬಗ್ಗೆ ಠಾಣೆಯಲ್ಲಿ ದೂರು ನೀಡಿದ್ದರು. ಎಚ್ಚೆತ್ತುಕೊಂಡ ಪೊಲೀಸರು ಬಾಲಕಿಯ ಅಕ್ಕಪಕ್ಕದ ಮನೆಗಳ ಸಮೀಪ ವಿಚಾರಣೆ ನಡೆಸಿದಾಗ ಮುನಿರಾಜು ತನ್ನ ಮೊಬೈಲ್‌ ಸಂಖ್ಯೆಯನ್ನು ಸ್ಥಗಿತಗೊಳಿಸಿ ಪರಾರಿಯಾಗಿದ್ದ. ಕೂಡಲೇ ಪೊಲೀಸರು ಆರೋಪಿಯ ಪತ್ತೆಗಾಗಿ ಬಲೆಬೀಸಿದ್ದು, ಬಂಗಾರಪೇಟೆ ಸಮೀಪ ಆರೋಪಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.