ಆ್ಯಪ್ನಗರ

ರೈತರ ಬೆಳೆ ರಕ್ಷಣೆಗೆ ಜಿಲ್ಲೆಯಲ್ಲಿ ಕೋಲ್ಡ್‌ಸ್ಟೋರೇಜ್‌ ಇಲ್ಲ

ರಾಜ್ಯದಲ್ಲಿಯೇ ಅತಿ ಹೆಚ್ಚು ತೋಟಗಾರಿಕಾ ಬೆಳೆಗಳನ್ನು ಬೆಳೆಯುವ ಕೋಲಾರ ಜಿಲ್ಲೆಯಲ್ಲಿ ತೋಟಗಾರಿಕಾ ಬೆಳೆಗಳ ಸಂರಕ್ಷಣೆಗಾಗಿ ಒಂದೂ ಕೋಲ್ಡ್‌ ಸ್ಟೋರೇಜ್‌(ಶೈತ್ಯಾಗಾರ) ಇಲ್ಲದಾಗಿದ್ದು, ಬೆಲೆ ಕುಸಿದಾಗ ರೈತರ ನಷ್ಟ ಅನುಭವಿಸುವಂತಾಗಿದೆ.

Vijaya Karnataka 11 Aug 2019, 5:00 am
ಕೋಲಾರ : ರಾಜ್ಯದಲ್ಲಿಯೇ ಅತಿ ಹೆಚ್ಚು ತೋಟಗಾರಿಕಾ ಬೆಳೆಗಳನ್ನು ಬೆಳೆಯುವ ಕೋಲಾರ ಜಿಲ್ಲೆಯಲ್ಲಿ ತೋಟಗಾರಿಕಾ ಬೆಳೆಗಳ ಸಂರಕ್ಷಣೆಗಾಗಿ ಒಂದೂ ಕೋಲ್ಡ್‌ ಸ್ಟೋರೇಜ್‌(ಶೈತ್ಯಾಗಾರ) ಇಲ್ಲದಾಗಿದ್ದು, ಬೆಲೆ ಕುಸಿದಾಗ ರೈತರ ನಷ್ಟ ಅನುಭವಿಸುವಂತಾಗಿದೆ.
Vijaya Karnataka Web no coldstorages in farmers crop protection district
ರೈತರ ಬೆಳೆ ರಕ್ಷಣೆಗೆ ಜಿಲ್ಲೆಯಲ್ಲಿ ಕೋಲ್ಡ್‌ಸ್ಟೋರೇಜ್‌ ಇಲ್ಲ


ಟೊಮೇಟೊ, ಕ್ಯಾಪ್ಸಿಕಂ, ಆಲುಗಡ್ಡೆ, ಕೋಸು ಸೇರಿದಂತೆ ತೋಟಗಾರಿಕಾ ಬೆಳೆಗಳನ್ನು ಬೆಳೆಯುವಲ್ಲಿ ಜಿಲ್ಲೆ ಮುಂಚೂಣಿಯಲ್ಲಿದೆ. ಜತೆಗೆ ಟೊಮೇಟೊ ಉತ್ಪಾದನೆಯಲ್ಲಿ ಏಷ್ಯಾದಲ್ಲಿಯೇ ಮೊದಲ ಸ್ಥಾನವನ್ನು ಪಡೆದುಕೊಂಡಿದೆ. ಆದರೆ, ಬೆಳೆಗಳ ಬೆಲೆ ಕುಸಿದಾಗ ಅವುಗಳ ಸಂರಕ್ಷಣೆಗೆ ಜಿಲ್ಲೆಯಲ್ಲಿ ಒಂದೂ ಕೋಲ್ಡ್‌ ಸ್ಟೋರೇಜ್‌ ಇಲ್ಲದಿರುವುದು ರೈತರ ಪಾಲಿಕೆ ಮಾರಕವಾಗಿದೆ.

ರೈತರು ಬೆಳೆದ ತರಕಾರಿ, ಹಣ್ಣು ಹಾಗೂ ಹೂವುಗಳನ್ನು ಸಂಸ್ಕರಣೆ ಮಾಡಿ ಉತ್ತಮ ದರ ಸಿಕ್ಕಿದಾಗ ಮಾರಾಟ ಮಾಡಲು ಕೋಲ್ಡ್‌ ಸ್ಟೋರೇಜ್‌ಗಳು ಅನುಕೂಲವಾಗಿವೆ. ಆದರೆ, ಜಿಲ್ಲೆಯಲ್ಲಿ ಲಕ್ಷಗಟ್ಟಲೇ ತೋಟಗಾರಿಕಾ ಬೆಳೆಗಳು ಬೆಳೆದರೂ ಕೋಲ್ಡ್‌ ಸ್ಟೋರೇಜ್‌ ವ್ಯವಸ್ಥೆ ಮಾಡಲು ತೋಟಗಾರಿಕಾ ಇಲಾಖೆ ಆಸಕ್ತಿ ತೋರದಿರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ.

ಸೆಪ್ಟಂಬರ್‌ನಿಂದ ಜನವರಿಗೆ ಜಿಲ್ಲೆಯಲ್ಲಿ ಬೆಳೆಯ ಶೇ.40ರಷ್ಟು ಜನರು ಆಲುಗಡ್ಡೆ, ಕ್ಯಾಪ್ಸಿಕಂ ಹಾಗೂ ಕೋಸು ಬೆಳೆಯುತ್ತಾರೆ. ಆಲುಗಡ್ಡೆ ಬೇಗ ಮೊಳಕೆಗಳು ಬರುವುದರಿಂದ ರೈತರಿಗೆ ಬೆಲೆ ಕಡಿಮೆಯಾಗುತ್ತದೆ. ಹೀಗಾಗಿ ಕೋಲ್ಡ್‌ ಸ್ಟೋರೇಜ್‌ಗಳ ಅಗತ್ಯ ಬಹಳಷ್ಟಿದೆ ಎನ್ನುತ್ತಾರೆ ರೈತರು.

ತುಕ್ಕು ಹಿಡಿಯುತ್ತಿದೆ ಶೈತ್ಯಾಗಾರ: ತೋಟಗಾರಿಕೆ ಇಲಾಖೆಯಿಂದ ನಗರದ ಹಳೆಯ ಜಿಲ್ಲಾಧಿಕಾರಿಗಳ ಕಚೇರಿಯ ಬಳಿ ಕೋಲ್ಡ್‌ಸ್ಟೋರೇಜ್‌ ನಿರ್ಮಿಸಲಾಗಿದೆ. ಆದರೆ, ಹಲವು ವರ್ಷಗಳಿಂದ ಸಮರ್ಪಕವಾಗಿ ನಿರ್ವಹಣೆ ಮಾಡದ ಹಿನ್ನೆಲೆಯಲ್ಲಿ ಶೈತ್ಯಾಗಾರ ಸಂಪೂರ್ಣವಾಗಿ ಶಿಥಿಲಾವಸ್ಥೆ ತಲುಪಿದಂತಾಗಿದೆ.

ಪ್ರೋತ್ಸಾಹವಿದೆ, ಸೌಕರ್ಯವಿಲ್ಲ: ತೋಟಗಾರಿಕೆ ಬೆಳೆಗಳನ್ನು ಹೆಚ್ಚೆಚ್ಚು ಬೆಳೆಯಲು ರೈತರಿಗೆ ತೋಟಗಾರಿಕೆ ಇಲಾಖೆಯಿಂದ ಹಲವಾರು ರೀತಿಯ ಸಬ್ಸಿಡಿಯನ್ನು ನೀಡಲಾಗುತ್ತಿದೆ. ಆದರೆ, ರೈತರ ಬೆಳೆಯುವಂತಹ ಬೆಳೆಗಳಿಗೆ ಶೈತ್ಯಾಗಾರಗಳ ನಿರ್ಮಾಣಕ್ಕೆ ಮಾತ್ರ ಇಲಾಖೆ ಮುಂದಾಗುತ್ತಿಲ್ಲ.

ರೈತರು ಬಳಸಲು ಮುಂದಾಗುವುದಿಲ್ಲ: ಸರಕಾರದಿಂದ ಶೈತ್ಯಾಗಾರಗಳನ್ನು ನಿರ್ಮಿಸಿದರೂ ರೈತರು ತೋಟಗಾರಿಕೆ ಬೆಳೆಗಳನ್ನು ಶೈತ್ಯಾಗಾರದಲ್ಲಿ ಇರಿಸಲು ಮುಂದಾಗುವುದು ತೀರಾ ಕಡಿಮೆ. ಕಾರಣ ತಾವು ಬೆಳೆದ ಬೆಳೆಗಳನ್ನು ಕೋಲ್ಡ್‌ ಸ್ಟೋರೇಜ್‌ನಲ್ಲಿ ಇರಿಸಲು ಇಂತಿಷ್ಟು ಹಣವನ್ನು ಪಾವತಿಸಬೇಕಾಗುತ್ತದೆ. ಇದರೊಂದಿಗೆ ಸಾಗಣೆ ವೆಚ್ಚ ಹೆಚ್ಚಾಗುತ್ತದೆ. ಈ ಕಾರಣದಿಂದಾಗಿ ರೈತರು ಶೈತ್ಯಾಗಾರ ಬಳಕೆಗೆ ಹಿಂದೇಟು ಹಾಕುತ್ತಾರೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಸಮಜಾಯಿಷಿ ನೀಡುತ್ತಾರೆ.

ಫೋಟೋ ಕ್ಯಾಪ್ಷನ್‌: ಜಿಲ್ಲೆಯಲ್ಲಿ ಒಂದೇ ಒಂದು ಕೋಲ್ಟ್‌ಸ್ಟೋರೇಜ್‌ ಇಲ್ಲದೇ ಇರುವುದರಿಂದ ಈ ಹಿಂದೆ ಟೊಮೇಟೊ ಬೆಳೆಗೆ ಕನಿಷ್ಠ ಬೆಲೆ ಸಿಗದಿದ್ದಾಗ ರೈತರು ತಾವು ಬೆಳೆದಂತಹ ಟೊಮೇಟೊವನ್ನು ರಸ್ತೆಗೆ ಸುರಿದಿದ್ದರು.(10ಕೆಎಲ್‌ಆರ್‌ಎಸ್‌ಕೆ7)


ಬೆಲೆ ಸಿಗದೆ ಬೀದಿಗೆ ಸುರಿದ್ದಾರೆ

ಜಿಲ್ಲೆಯ ರೈತರು ಬೆಳೆದಂತಹ ಟಮೊಟೋ ಹಾಗೂ ಆಲುಗಡ್ಡೆಗೆ ಬೆಂಬಲ ಸಿಗದಿದ್ದಾಗ ಹಲವಾರು ಬಾರಿ ರಸ್ತೆಗೆ ಸುರಿದ ಪ್ರತಿಭಟನೆ ನಡೆಸಿದಂತಹ ಹಲವಾರು ಘಟನೆಗಳಿವೆ. ಅಂತಹ ಸಂದರ್ಭಗಳಲ್ಲಿ ರೈತರ ಬೆಳೆಗಳ ಸಂರಕ್ಷಣೆಗೆ ಕೋಲ್ಡ್‌ಸ್ಟೋರೇಜ್‌ಗಳು ಅನುಕೂಲವಾಗುತ್ತವೆ.

ಖಾಸಗಿ ಶೈತ್ಯಾಗಾರಗಳು ಲಭ್ಯವಿಲ್ಲ

ಕೋಲಾರದಲ್ಲಿ ಇಲಾಖೆಯ ಒಂದು ಶೈತ್ಯಾಗಾರ ಶಿಥಿಲಾವಸ್ಥೆ ತಲುಪಿರುವುದು ಒಂದೆಡೆಯಾದರೆ, ಜಿಲ್ಲೆಯಲ್ಲಿರುವ ನಾಲ್ಕು ಖಾಸಗಿ ಶೈತ್ಯಾಗಾರಗಳ ಪೈಕಿ ಮೂರು ಸ್ಥಗಿತಗೊಂಡಿವೆ. ಕೇವಲ ಮಾಲೂರಿನ 2500 ಟನ್‌ ಸಾಮರ್ಥ್ಯದ ಇನೋವಾ ಫುಡ್‌ಪಾರ್ಕ್‌ ಪ್ರೈವೇಟ್‌ ಲಿಮಿಟೆಡ್‌ ಮಾತ್ರ ಕಾರ್ಯನಿರ್ವಹಿಸುತ್ತಿದೆ.

ಇಲಾಖೆಯಿಂದ ನಿರ್ಮಿಸಲಾಗಿರುವ 2500 ಟನ್‌ ಸಾಮರ್ಥ್ಯದ ಕೋಲ್ಡ್‌ ಸ್ಟೋರೇಜ್‌ ನವೀಕರಣಕ್ಕಾಗಿ ಈ ಹಿಂದೆಯೇ ಟೆಂಡರ್‌ ಆಹ್ವಾನಿಸಲಾಗಿತ್ತು. ಆದರೆ, ಯಾರೂ ಮುಂದಾಗಿರಲಿಲ್ಲ. ಇದೀಗ ಮತ್ತೊಮ್ಮೆ ನವೀಕರಣಕ್ಕಾಗಿ ಟೆಂಡರ್‌ ಆಹ್ವಾನಿಸಲಾಗುವುದು.

- ಗಾಯತ್ರಿ, ಉಪನಿರ್ದೇಶಕರು, ತೋಟಗಾರಿಕಾ ಇಲಾಖೆ

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ