8 ಐಷಾರಾಮಿ ಬೈಕ್‌ ರೇಸಿಂಗ್‌ ಯುವಕರಿಗೆ ದಂಡ

ಕೋಲಾರ: ಭಾನುವಾರ ರಜೆಯ ಮಜಾ ಮಾಡುವ ಸಲುವಾಗಿ ರಾಷ್ಟ್ರೀಯ ಹೆದ್ದಾರಿ 75ರಲ್ಲಿ ಬೆಂಗಳೂರಿನಿಂದ ಕೋಲಾರ ಮಾರ್ಗವಾಗಿ ತಿರುಪತಿ, ಚೆನ್ನೈಗೆ ರೇಸಿಂಗ್‌ ತೆರಳುವ ಸುಮಾರು 20ಕ್ಕೂ ಹೆಚ್ಚು ಮಂದಿ ಸವಾರರನ್ನು ಕೋಲಾರ ಸಂಚಾರಿ ಹಾಗೂ ಗ್ರಾಮಾಂತರ ಠಾಣೆ ಪೊಲೀಸರು ತಡೆದು ದಾಖಲೆ ಪರಿಶೀಲಿಸಿ, ದಂಡ ವಿಧಿಸಿದರು.

ಪ್ರತಿ ಭಾನುವಾರದಂತೆಯೇ ಈ ವಾರವೂ ಐಷಾರಾಮಿ ಬೈಕ್‌ಗಳಲ್ಲಿ ರೇಸಿಂಗ್‌ ಬರುವ ಬಗ್ಗೆ ಖಚಿತ ಮಾಹಿತಿ ಇದ್ದ ಹಿನ್ನೆಲೆಯಲ್ಲಿ ನಗರ ಹೊರವಲಯದ ಕೊಂಡರಾಜನಹಳ್ಳಿ ಗೇಟ್‌ ಬಳಿಗೆ ತೆರಳಿದ ಪೊಲೀಸರು ಬರೋಬ್ಬರಿ 20 ಬೈಕ್‌ಗಳನ್ನು ಅಡ್ಡಗಟ್ಟಿದರು.

ಇದರಲ್ಲಿ ಕೆಲವು ಬೈಕ್‌ಗಳಿಗೆ ದಾಖಲೆಗಳು ಸರಿಯಾಗಿದ್ದರೆ 8 ಬೈಕ್‌ಗಳಿಗೆ ಇರಲಿಲ್ಲ, ಕೂಡಲೇ ದಂಡ ಪ್ರಕರಣ ದಾಖಲಿಸಿಕೊಂಡು ಎಚ್ಚರಿಕೆಯನ್ನು ನೀಡಲಾಯಿತು.

ನಗರದಲ್ಲಿ 12 ಬೈಕ್‌ ವಶಕ್ಕೆ: ಇನ್ನು ಇತ್ತೀಚೆಗೆ ನಗರ ಪ್ರದೇಶದಲ್ಲಿಯೂ ಬೈಕ್‌ ವೀಲಿಂಗ್‌ ಜೋರಾಗಿದ್ದು, ಸಾರ್ವಜನಿಕರಿಂದ ಸಾಕಷ್ಟು ದೂರುಗಳು ಕೇಳಿಬಂದಿದ್ದವು. ಸಾಮಾಜಿಕ ಜಾಲತಾಣಗಳಲ್ಲಿಯೂ ವಿಡಿಯೋ, ಪೋಟೋಗಳು ಹರಿದಾಡುತ್ತಿದ್ದವು.

ಇದರಿಂದಾಗಿ ಪೊಲೀಸರು ಎಚ್ಚೆತ್ತುಕೊಂಡಿದ್ದು, ಭಾನುವಾರ ಒಂದೇ ದಿನದಲ್ಲಿ ವೀಲಿಂಗ್‌, ಆಲ್ಟ್ರೇಶನ್‌ ಕಾರಣಗಳಿಂದಾಗಿ 13 ಬೈಕ್‌ಗಳನ್ನು ವಶಕ್ಕೆ ಪಡೆದುಕೊಂಡು, ಪ್ರಕರಣ ದಾಖಲಿಸಿದ್ದಾರೆ.

ಆಲ್ಟ್ರೇಶನ್‌ ಮಾಡಿಕೊಂಡು, ಅತಿಯಾದ ವೇಗದಿಂದ ಚಾಲನೆ ಮಾಡುತ್ತಿದ್ದ ಹಿನ್ನೆಲೆಯಲ್ಲಿ 12 ಬೈಕ್‌ಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ, ಹಾಗೇ ವೀಲಿಂಗ್‌ಗೆ ಸಂಬಂಧಿಸಿದಂತೆ 1 ಬೈಕ್‌ ವಶಕ್ಕೆ ಪಡೆದುಕೊಂಡಿದ್ದಾರೆ. ಭಾನುವಾರ ನಡೆದ ಕಾರ್ಯಾಚರಣೆಯಲ್ಲಿ ಕೋಲಾರದ ಸಂಚಾರಿ ಠಾಣೆ ಪಿಎಸ್‌ಐ ನವೀನ್‌, ಗ್ರಾಮಾಂತರ ಠಾಣೆ ಪಿಎಸ್‌ಐ ಪ್ರದೀಪ್‌ ತೊಡಗಿದ್ದು, ಇದೇ ರೀತಿಯಲ್ಲಿ ಸದಾ ತೊಡಗಿದರೆ ವೀಲಿಂಗ್‌ ಪ್ರಕರಣಗಳು ಕ್ರಮೇಣ ಕಡಿಮೆಯಾಗುತ್ತವೆ ಎನ್ನುವುದು ಸಾರ್ವಜನಿಕ ವಲಯದ ಮಾತು.