ಚಿಕ್ಕ ತಿರುಪತಿ ಸಂತೆಯಲ್ಲಿ ಕುರಿ,ಮೇಕೆ ಮಾರಾಟ ಜೋರು

ಲಕ್ಕೂರು: ಚಿಕ್ಕತಿರುಪತಿ ಗ್ರಾಮದಲ್ಲಿ ಪ್ರತಿ ಶನಿವಾರ ನಡೆಯುವ ವಾರದ ಸಂತೆಯಲ್ಲಿ ಆ.12 ರಂದು ಸೋಮವಾರ ನಡೆಯುವ ಬಕ್ರೀದ್‌ ಹಬ್ಬದ ಅಂಗವಾಗಿ ಕುರಿ,ಮೇಕೆಗಳ ವ್ಯಾಪಾರ ವಹಿವಾಟು ಜೋರಾಗಿ ನಡೆಯಿತು.

ಲಕ್ಕೂರು ಹೋಬಳಿ, ತಾಲೂಕಿನ ಹಲವು ಭಾಗಗಳು ಸೇರಿದಂತೆ ಆನೇಕಲ್‌, ಸರ್ಜಾಪುರ, ಬೆಂಗಳೂರು, ರಾಮನಗರ, ಕೋಲಾರ, ಬಂಗಾರಪೇಟೆ, ಕನಕಪುರ, ಹೊಸಕೋಟೆ, ಬಿಜಾಪುರ ಹಾಗೂ ನೆರೆಯ ತಮಿಳುನಾಡಿನ ಹೊಸೂರು, ಬಾಗಲೂರು, ಬೇರಿಕೆ ಸೇರಿದಂತೆ ಹಲವು ಭಾಗಗಳಿಂದ ಗ್ರಾಹಕರು ದಿನಸಿ, ಆಹಾರ ಸಾಮಗ್ರಿ, ತರಕಾರಿ, ಕುರಿ, ಕೋಳಿ ಸೇರಿದಂತೆ ಹಲವು ವಸ್ತುಗಳನ್ನು ಮಾರಾಟ ಮಾಡಲು ಹಾಗೂ ಕೊಳ್ಳಲು ಬಂದಿದ್ದರು.

ಆ.12 ರಂದು ಸೋಮವಾರ ಮುಸ್ಲಿಂ ಸಮುದಾಯದವರಿಗೆ ಬಕ್ರೀದ್‌ ಹಬ್ಬ ಇರುವುದರಿಂದ ಗ್ರಾಹಕರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ವ್ಯಾಪಾರ ವಹಿವಾಟು ನಡೆಸಿದರು. ಗ್ರಾಹಕರು ಹಾಗೂ ಸಾರ್ವಜನಿಕರು ಶನಿವಾರ ಚಿಕ್ಕತಿರುಪತಿ ಸಂತೆಯಲ್ಲಿ ಕುರಿ ಮತ್ತು ಕೋಳಿಗಳನ್ನು ಕೊಳ್ಳಲು ಮುಗಿಬಿದ್ದಿರುವ ದೃಶ್ಯ ಸಾಮಾನ್ಯವಾಗಿತ್ತು. ವ್ಯಾಪಾರಸ್ಥರು ಸಹ ಹೆಚ್ಚಿನ ಸಂಖ್ಯೆಯಲ್ಲಿ ಇದ್ದುದರಿಂದ ಸಂತೆಯ ಯಾವ ಮೂಲೆ ನೋಡಿದರೂ ಮಾರಾಟಗಾರರು ಹಾಗೂ ಕೊಳ್ಳುವವರ ಸಂಖ್ಯೆ ಹೆಚ್ಚಾಗಿತ್ತು.

ಮಾರುಕಟ್ಟೆಯಲ್ಲಿ ಕುರಿ ಹಾಗೂ ಕೋಳಿ ಮಾಂಸದ ಬೆಲೆ ಗಣನೀಯವಾಗಿ ಏರಿಕೆಯಾಗಿದ್ದರೂ ಸಹ ಹೆಚ್ಚಿನ ಹಣ ನೀಡಿ ಮಾಂಸ ಖರೀದಿಸಿ ಭರಾಟೆ ಜೋರಾಗಿತ್ತು. ಈ ಹಿನ್ನೆಲೆಯಲ್ಲಿ ಶನಿವಾರ ನಡೆದ ಸಂತೆಯಲ್ಲಿ ಚಿಕ್ಕ ಕುರಿಗಳು 2 ಸಾವಿರ ರೂ.ನಿಂದ ದೊಡ್ಡ ಕುರಿಗಳು 30 ಸಾವಿರರೂಗಳವರೆಗೂ ಮಾರಾಟವಾದವು. ಅಲ್ಲದೆ, ಮೇಕೆಗಳು 25 ಸಾವಿರದಿಂದ 70 ಸಾವಿರದವರೆಗೂ ಮಾರಾಟವಾದವು. ಬಿಜಾಪುರ ಜಿಲ್ಲೆಯ ಮುದಾಸಿರ್‌ ಎಂಬುವವರಿಗೆ ಸೇರಿದ ಕುರಿಗಳು ತಲಾ 25 ಸಾವಿರಕ್ಕೆ ಹಾಗೂ ಮುಗಳೂರು ಗ್ರಾಮದ ಮುನಿಯಪ್ಪ ಎಂಬುವವರಿಗೆ ಸೇರಿದ ಮೇಕೆಗಳು 35 ಸಾವಿರಕ್ಕೆ ಮಾರಾಟವಾದವು.

ಮುಸ್ಲಿಂ ಸಮುದಾಯದವರು ಬಕ್ರೀದ್‌ ಹಬ್ಬದ ಅಂಗವಾಗಿ ಮಾಂಸ ಸೇರಿದಂತೆ ಆಹಾರ ಪದಾರ್ಥಗಳನ್ನು ದಾನ ಮಾಡುವುದು ಹಿಂದಿನಿಂದಲೂ ನಡೆದುಕೊಂಡು ಬಂದಿರುವ ಸಂಪ್ರದಾಯ. ಅದರಂತೆ ಈ ವರ್ಷವು ಸಹ ಹೆಚ್ಚಿನ ಸಂಖ್ಯೆಯಲ್ಲಿ ಮುಸ್ಲಿಂ ಸಮುದಾಯದ ಮುಖಂಡರು ಸಂತೆಯಲ್ಲಿ ಕುರಿಗಳ ಖರೀದಿಯ ಜತೆಗೆ ಹೆಚ್ಚಾಗಿ ಮೇಕೆಗಳನ್ನು ಕೊಂಡುಕೊಳ್ಳುತ್ತಿದ್ದ ದೃಶ್ಯ ಸಾಮಾನ್ಯವಾಗಿತ್ತು.

ಮೇಕೆಗಳು 10 ಸಾವಿರದಿಂದ 65 ಸಾವಿರಕ್ಕೆ ಮಾರಾಟವಾಗಿ ದಾಖಲೆ ಕಂಡಿತು. ಅಲ್ಲದೆ, ನಾಟಿ ಕೋಳಿಗಳಿಗೆ ಹೆಚ್ಚಿನ ಬೇಡಿಕೆ ಇರುವುದರಿಂದ ನಾಟಿ ಕೋಳಿಗಳ ಬೆಲೆ ಹೆಚ್ಚಾಗಿತ್ತು. 1 ಕೆ.ಜಿ. ನಾಟಿ ಕೋಳಿಗೆ 300 ರಿಂದ 400 ರೂ.ಗೆ ಮಾರಾಟವಾಗಿತು.