SSLC ಫಲಿತಾಂಶ: ಚಿನ್ನದ ನಾಡಿನಲ್ಲಿ ವಿದ್ಯಾರ್ಥಿನಿಯರೇ ಮೇಲುಗೈ, ಐವರು ಹೆಣ್ಮಕ್ಕಳಿಗೆ ಶೇ.100 ಅಂಕ!

ಕೋಲಾರ: ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿಯು 2021-2022ನೇ ಸಾಲಿನ ಎಸ್ಎಸ್ಎಲ್ಸಿ ಪರೀಕ್ಷೆಯ ಫಲಿತಾಂಶವು ಪ್ರಕಟಗೊಂಡಿದ್ದು, ಚಿನ್ನದ ನಾಡು ಕೋಲಾರ ಜಿಲ್ಲೆಯಲ್ಲೂ ಹೆಣ್ಮಕ್ಕಳೇ ಮೇಲುಗೈ ಸಾಧಿಸಿದ್ದಾರೆ. ಜಿಲ್ಲೆಯಲ್ಲಿ ಒಟ್ಟು ಐವರು ವಿದ್ಯಾರ್ಥಿನಿಯರು 625 ಕ್ಕೆ 625 ಅಂಕ ಪಡೆದಿದ್ದಾರೆ. ಆರು ಮಂದಿ ಬಾಲಕಿಯರು ಮತ್ತು ಇಬ್ಬರು ಬಾಲಕರು 624 ಅಂಕ ಪಡೆದು ದ್ವಿತೀಯ ಸ್ಥಾನ ಪಡೆದಿದ್ದಾರೆ.

ಚಿನ್ಮಯ ಶಾಲೆಯ ಇಬ್ಬರು ವಿದ್ಯಾರ್ಥಿನಿಯರಿಗೆ 625ಕ್ಕೆ 625 ಅಂಕ:
ಕೋಲಾರ ನಗರದ ಚಿನ್ಮಯ ಶಾಲೆಯ ವಿದ್ಯಾರ್ಥಿನಿಯರಾದ ತೇಜಸ್ವಿನಿ ಚವ್ಹಾಣ್ ಮತ್ತು ಕರ್ಣಿಕಾ ಅವರು 625ಕ್ಕೆ 625 ಅಂಕ ಪಡೆದಿದ್ದಾರೆ. ತೇಜಸ್ವಿನಿ ಚವ್ಹಾಣ್ ಅವರು ಮಂಜುಳಾ ಚವ್ಹಾಣ್ ಹಾಗೂ ಗೇಮು ಚವ್ಹಾಣ್ ಮಗಳಾಗಿದ್ದಾರೆ. ಗೇಮು ಚವ್ಹಾಣ್ ಮುಳಬಾಗಿಲಿನ ಹೆಬ್ಬಾಣಿ ಗ್ರಾಮ ಪಂಚಾಯತ್ ನಲ್ಲಿ ಪಿಡಿಒ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಇನ್ನು ಮತ್ತೊಬ್ಬ ವಿದ್ಯಾರ್ಥಿನಿ ಕರ್ಣಿಕಾ ಅವರ ತಾಯಿ ನಂದನಾ ಅವರು ಅಡ್ವೋಕೇಟ್ ಹಾಗೂ ಮಹಿಳಾ ಸಮಾಜ ಕಾಲೇಜಿನಲ್ಲಿ ಸೆಕ್ರೆಟರಿ ಆಗಿ ಕೆಲಸ ಮಾಡುತ್ತಿದ್ದಾರೆ. ಇನ್ನು ಕರ್ಣಿಕಾ ಅವರ ತಂದೆ ಆಂಜನೇಯ ರೆಡ್ಡಿ ಇಂಜಿನಿಯರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

SSLC Result 2022 Toppers List: ಟಾಪರ್‌ಗಳು, ವಿಷಯವಾರು ಔಟ್‌ ಆಫ್‌ ಔಟ್ ಅಂಕಗಳಿಸಿದವರ ಡೀಟೇಲ್ಸ್..

ಪೋಷಕರು, ಶಿಕ್ಷಕರ ಸಹಕಾರದಿಂದ ಸಾಧನೆ ಸಾಧ್ಯವಾಯಿತು:
ನಮ್ಮ ತಂದೆ-ತಾಯಿ ಮತ್ತು ಶಾಲಾ ಶಿಕ್ಷಕರ ಸಹಕಾರದಿಂದ ನಾನು 625ಕ್ಕೆ 625 ಅಂಕ ಗಳಿಸಲು ಸಾಧ್ಯವಾಯಿತು. ಮುಂದೆ ಮೆಡಿಕಲ್ ಮಾಡಿ IAS ಮಾಡುವುದು ನನ್ನ ಗುರಿಯಾಗಿದೆ. ನನಗೆ ಸಹಕಾರ ನೀಡಿದ ಸ್ನೇಹಿತರು ಸೇರಿದಂತೆ ಎಲ್ಲರಿಗೂ ಧನ್ಯವಾದ ಎಂದು ತೇಜಸ್ವಿನಿ ತಮ್ಮ ಖುಷಿಯನ್ನು ಹಂಚಿಕೊಂಡರು. ತಮ್ಮ ಮಕ್ಕಳಿಗೆ ಇಷ್ಟೇ ಅಂಕ ತೆಗೆಯಬೇಕೆಂದು ಯಾವುದೇ ಒತ್ತಡ ಹಾಕಿಲ್ಲ. ಈಗ ಟಾಪರ್ ಆಗಿರುವುದಕ್ಕೆ ನಮಗೆ ತುಂಬಾ ಖುಷಿಯಾಗುತ್ತಿದೆ ಎಂದು ತೇಜಸ್ವಿನಿ ಚವ್ಹಾಣ್ ಅವರ ತಾಯಿ ಮಂಜುಳಾ ಚವ್ಹಾಣ್ ಹರ್ಷ ವ್ಯಕ್ತಪಡಿಸಿದರು.

ಕಳೆದ 10 ವರ್ಷದಲ್ಲಿ ದಾಖಲೆಯ ಫಲಿತಾಂಶ : ಈ ಬಾರಿಯೂ SSLCಯಲ್ಲಿ ಬಾಲಕಿಯರೇ ಮೇಲುಗೈ

ಚಿನ್ಮಯ ಕಾಲೇಜಿನಲ್ಲಿ ಓದುತ್ತಿರುವ ಮತ್ತೊಬ್ಬ ವಿದ್ಯಾರ್ಥಿನಿ ಕರ್ಣಿಕಾ ಸಹ 625 ಕ್ಕೆ 625 ಅಂಕ ಗಳಿಸಿದ್ದು, ಇದಕ್ಕೆ ಪೋಷಕರು, ಶಿಕ್ಷಕರು ಹಾಗೂ ಶಾಲೆಯಲ್ಲಿ ಭಾನುವಾರವೂ ಮಾಡುತ್ತಿದ್ದ ಕೋಚಿಂಗ್ ಕ್ಲಾಸ್ ಮುಖ್ಯ ಕಾರಣ ಎಂದಿದ್ದಾರೆ. ಇವರೂ ಸಹ ಮೆಡಿಕಲ್ ಮಾಡಿ ಮುಂದೆ IAS ಮಾಡುವ ಗುರಿ ಇಟ್ಟುಕೊಂಡಿದ್ದಾರೆ. ಇನ್ನು ಈ ಬಾರಿ ಕೋಲಾರ ಜಿಲ್ಲೆಯಲ್ಲಿ ಎಸ್‌ಎಸ್‌ಎಲ್‌ಸಿ ಮುಖ್ಯ ಪರೀಕ್ಷೆಗೆ 19,928 ವಿದ್ಯಾರ್ಥಿಗಳು ಹಾಜರಾಗಿದ್ದು, 18,839 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಅದರಲ್ಲಿ 625ಕ್ಕೆ ಐವರು ವಿದ್ಯಾರ್ಥಿನಿಯರು 625 ಅಂಕ ಪಡೆದಿದ್ದಾರೆ. 624 ಅಂಕಗಳನ್ನು 8 ಮಂದಿ, 623 ಅಂಕಗಳನ್ನು 14 ಮಂದಿ, 622 ಅಂಕಗಳನ್ನು 13 ಮಂದಿ 621 ಅಂಕಗಳನ್ನು 27 ಮಂದಿ ಹಾಗೂ 620 ಅಂಕಗಳನ್ನು 31 ಮಂದಿ ವಿದ್ಯಾರ್ಥಿಗಳು ಪಡೆದಿದ್ದಾರೆ.