ಗಂಡನ ಮನೆ ಆವರಣದಲ್ಲೇ ವಾಸವಿದ್ದ ಮಹಿಳೆ ಅನುಮಾನಾಸ್ಪದ ಸಾವು

ಶ್ರೀನಿವಾಸಪುರ: ಗಂಡನ ಮನೆ ಆವರಣದಲ್ಲೆ ವಾಸಿಸುತ್ತಿದ್ದ ಮಹಿಳೆ ಉಮಾದೇವಿ (60) ಅನುಮಾನಾಸ್ಪದ ರೀತಿಯಲ್ಲಿ ಗಾಯಗೊಂಡು ಸತ್ತಿರುವ ಘಟನೆ ನಡೆದಿದೆ.

ಪಟ್ಟಣದ ಡಿವಿಜಿ ರಸ್ತೆಯ ದತ್ತರಾಜ್‌ ಹೆಂಡತಿ ಉಮಾದೇವಿ ಭಾನುವಾರ ತಮ್ಮ ಮನೆ ಆವರಣದ ಬೇರೆ ರೂಮ್‌ ಒಂದರಲ್ಲಿ ವಾಸವಾಗಿದ್ದರು. ಬೆಳಗಿನ ಜಾವ ಸುಮಾರು 4 ಗಂಟೆಯಲ್ಲಿ ಚೀರಾಡಿತ್ತಿದ್ದರು. ಇದೇ ವೇಳೆ ಸಮೀಪದಲ್ಲಿದ್ದವರು ಹೋಗಿ ನೋಡುವಷ್ಟರಲ್ಲಿ ಸತ್ತುಹೋಗಿದ್ದಾರೆ. ಈ ಸಮಯದಲ್ಲಿ ನಮ್ಮ ಮನೆ ಬಾಗಿಲಿಗೆ ಚಿಲಕ ಹಾಕಿದ್ದರೆಂದು ಗಂಡ ದತ್ತರಾಜ್‌ ಪೊಲೀಸರಿಗೆ ತಿಳಿಸಿದ್ದಾರೆ.

ದೂರು: ನಮ್ಮ ತಾಯಿ ಮಾನಸಿಕ ಅಸ್ವಸ್ಥರಾಗಿದ್ದರು. ಕಳೆದ 5 ವರ್ಷಗಳಿಂದ ನಮ್ಮೊಂದಿಗೆ ವಾಸ ಮಾಡದೆ ಮನೆ ಆವರಣದಲ್ಲಿನ ಬೇರೆ ರೂಮ್‌ ಒಂದರಲ್ಲಿ ವಾಸಿಸುತ್ತಿದ್ದರು. ಅವರು ರಾತ್ರಿ ವೇಳೆ ಹೊತ್ತುಗೊತ್ತಿಲ್ಲದೆ ಕಿರಿಚಾಡುವುದು ಸಾಮಾನ್ಯವಾಗಿತ್ತು. ಭಾನುವಾರ ಬೆಳಗಿನ ಜಾವ ಸಮಯದಲ್ಲೂ ಕಿರುಚಾಡುತ್ತಿದ್ದರು. ಮನೆ ಮೇಲೆ ಹೋಗಿ ಬಂದಿದ್ದಾರೆ. ಅವರ ತಲೆಗೆ ಪೆಟ್ಟಾಗಿದೆ ಎಂದು ಅನುಮಾನ ವ್ಯಕ್ತಪಡಿಸಿ ಮಗ ಡಿ.ಕಮಲೇಶ್‌ ಶ್ರೀನಿವಾಸಪುರ ಪೊಲೀಸ್‌ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಪಿಎಸ್‌ಐ ವೆಂಕಟೇಶ್‌ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಸ್ಥಳಕ್ಕೆ ಶ್ವಾನ ದಳ ಕರೆಸಲಾಗಿತ್ತು. ಅಡಿಷನಲ್‌ ಎಸ್ಪಿ ಜಾಹ್ನವಿ, ಡಿವೈಎಸ್ಪಿ ಬಿ.ಕೆ.ಉಮೇಶ್‌, ಸಿಪಿಐ ರಾಘವೇಂದ್ರ ಪ್ರಕಾಶ್‌ ಭೇಟಿ ನೀಡಿ ಮರಣೋತ್ತರ ಪರೀಕ್ಷೆಯ ನಂತರ ಸಾವಿನ ಬಗ್ಗೆ ಖಚಿತ ಮಾಹಿತಿ ದೊರೆಯಲಿದೆ ಎಂದು ತಿಳಿಸಿದ್ದಾರೆ.