ವೇತನ ಹೆಚ್ಚಳಕ್ಕೆ ಒತ್ತಾಯಿಸಿ ಪ್ರತಿಭಟನೆ

ಗಂಗಾವತಿ; ವೇತನ ಹೆಚ್ಚಿಸುವಂತೆ ಒತ್ತಾಯಿಸಿ ಹಾಗೂ ಕೇಂದ್ರ ಸರಕಾರದ ನೀತಿ ಖಂಡಿಸಿ ಕರ್ನಾಟಕ ರಾಜ್ಯ ಅಕ್ಷರ ದಾಸೋಹ ಹಾಗೂ ಅಂಗನವಾಡಿ ನೌಕರರ ಸಂಘದ ಕಾರ್ಯಕರ್ತರು ತಾಲೂಕಿನ ಮರಳಿ ಗ್ರಾಮ ಪಂಚಾಯಿತಿ ಎದುರು ಮಂಗಳವಾರ ಪ್ರತಿಭಟನೆ ನಡೆಸಿದರು.

ಸಂಘಟನೆಯ ತಾಲೂಕು ಸಮಿತಿ ಅಧ್ಯಕ್ಷೆ ಲಕ್ಷ್ಮಿದೇವಿ ಸೋನಾರ್ ಮಾತನಾಡಿ, ರೈತರ, ಕೂಲಿಕಾರರ ಮಕ್ಕಳಿಗೆ ಅನುಕೂಲ ಕಲ್ಪಿಸುವ ಹಿನ್ನೆಲೆಯಲ್ಲಿ ಸರಕಾರಿ ಶಾಲೆಗಳಲ್ಲಿ ಬಿಸಿಯೂಟದ ಯೋಜನೆ ಜಾರಿ ಮಾಡಲಾಗಿದೆ. ರಾಜ್ಯದಲ್ಲಿ ಒಟ್ಟು 55 ಸಾವಿರ ಶಾಲೆಗಳಲ್ಲಿ 61 ಲಕ್ಷ ಮಕ್ಕಳು ಬಿಸಿಯೂಟದ ಅನುಕೂಲ ಪಡೆಯುತ್ತಿದ್ದಾರೆ. ಸಾಮಾಜಿಕ ನ್ಯಾಯದ ಭಾಗವಾಗಿರುವ ಯೋಜನೆಗೆ ಕೇಂದ್ರ ಸರಕಾರ ಬಜೆಟ್‌ನಲ್ಲಿ 13,215 ಕೋಟಿ ರೂ.ಗಳಿಂದ 9,236 ಕೋಟಿ. ರೂ.ಗೆ ಅನುದಾನ ಇಳಿಕೆ ಮಾಡುವ ಮೂಲಕ ದುಡಿಯುವ ವರ್ಗದ ವಿರೋಧಿ ಧೋರಣೆ ತಳೆದಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಬಿಸಿಯೂಟ ಯೋಜನೆಯಡಿ ಕಳೆದ 14 ವರ್ಷಗಳಿಂದ 1,19,000 ಮಹಿಳೆಯರು ಶಿಕ್ಷಣ ಇಲಾಖೆ ಅಡಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.ದಿನನಿತ್ಯ ಅಡುಗೆ ಕೆಲಸದ ಜತೆಗೆ ಶಾಲೆಯಲ್ಲಿ ಅಗತ್ಯವಿರುವ ಇತರೆ ಕೆಲಸಗಳನ್ನು ಮಾಡುತ್ತಾರೆ. ಆದರೂ ಸರಕಾರ ನ್ಯಾಯೋಚಿತ ವೇತನ ನೀಡದೇ ವಂಚಿಸುತ್ತಿದೆ ಎಂದು ಆಪಾದಿಸಿದರು.

ಆಕ್ಷರ ದಾಸೋಹ ಕಾರ್ಯಕರ್ತೆಯರಿಗೆ ಕನಿಷ್ಠ ವೇತನ ನಿಗದಿಪಡಿಸುವುದು, ಉದ್ಯೋಗ ಭದ್ರತೆ ಸೇರಿದಂತೆ ಇತರೆ ಬೇಡಿಕೆಗಳ ಈಡೇರಿಕೆಗೆ ಪ್ರತಿಭಟನಾಕಾರರು ಆಗ್ರಹಿಸಿದರು. ತಾಲೂಕು ಸಮಿತಿ ಖಜಾಂಚಿ ಗಂಗಮ್ಮ ಸಿದ್ದಾಪೂರ, ಕಾರ್ಯದರ್ಶಿ ಶಾಂತಮ್ಮ ಕನಕಗಿರಿ, ಗಂಗಮ್ಮ, ಮಂಜುಳಾ, ಸರಿತಾ, ಅಂಜಮ್ಮ, ಶಶಿಕಲಾ, ಸುಜಾತ, ಸರಸ್ವತಿ, ಶಿವಮ್ಮ, ಅನುಸೂಯ, ಕಷ್ಣವೇಣಿ, ರುದ್ರಮ್ಮ, ಜಯಮ್ಮ, ಅನ್ನಪೂರ್ಣ, ಲಕ್ಷ್ಮಿ ದೇಸಾಯಿ, ರಾಜೇಶ್ವರಿ, ಗಂಗಮ್ಮ ಇದ್ದರು.