ಟೋಲ್ ಕಟ್ಟಲು ಜಿ.ಪಂ. ಸದಸ್ಯ ತಗಾದೆ

ಗಂಗಾವತಿ; ತಾಲೂಕಿನ ಮುಕ್ಕುಂಪಿ ಬಳಿಯ ಟೋಲ್‌ಗೇಟ್‌ನಲ್ಲಿ ಹೇರೂರು ಕ್ಷೇತ್ರದ ಜಿ.ಪಂ. ಕಾಂಗ್ರೆಸ್ ಸದಸ್ಯ ಅಮರೇಶ ಗೋನಾಳ ಅವರು, ಸೋಮವಾರ ಟೋಲ್ ಕಟ್ಟಲು ತಗಾದೆ ತೆಗೆದರು.

ಅವರು ಕೊಪ್ಪಳದಿಂದ ಗಂಗಾವತಿ ಕಡೆ ಕಾರಿನಲ್ಲಿ ಬರುತ್ತಿದ್ದರು. ಈ ವೇಳೆ ಟೋಲ್ ಸಂಗ್ರಹ ಸಿಬ್ಬಂದಿ, ನಿಗದಿತ ಟೋಲ್ ಕಟ್ಟುವಂತೆ ಅವರನ್ನು ಕೋರಿದರು. ‘‘ಜನಪ್ರತಿನಿಧಿಗಳಿಗೆ ಟೋಲ್ ತೆಗೆದುಕೊಳ್ಳಬಾರದು’’ ಎಂದು ಸಿಬ್ಬಂದಿಯನ್ನೇ ತರಾಟೆ ತೆಗೆದುಕೊಂಡರು. ಟೋಲ್ ಕಟ್ಟುವಂತೆ ಒತ್ತಡ ಹೆಚ್ಚುತ್ತಿದ್ದಂತೆ, ಟೋಲ್‌ಗೇಟ್ ಬಳಿ ಅರ್ಧ ತಾಸು ಕಾರು ನಿಲ್ಲಿಸಿದ ಅವರು ಟೋಲ್ ಕಟ್ಟುವುದಿಲ್ಲ ಎಂದು ಪಟ್ಟುಹಿಡಿದರು. ಇದೇ ಮಾರ್ಗದಲ್ಲಿ ಬಂದ ಮಾಜಿ ಎಮ್ಮೆಲ್ಸಿ ಎಚ್.ಆರ್.ಶ್ರೀನಾಥ ಅವರು, ಜಿ.ಪಂ. ಸದಸ್ಯ ಅಮರೇಶ ಗೋನಾಳ ಅವರ ಮನವೊಲಿಸಿ, ಟೋಲ್ ಕಟ್ಟಿಸಿದರು. ಪರಸ್ಪರ ವಾಗ್ವಾದ ನಡೆದಿದ್ದರಿಂದ ಕೆಲ ಕಾಲ ಸಂಚಾರದಲ್ಲಿ ವ್ಯತ್ಯಯ ಉಂಟಾಯಿತು.