ಜಿಲ್ಲಾಸ್ಪತ್ರೆ ವೈದ್ಯರಿಗೆ ಖಾದರ್ ತರಾಟೆ

ಕೊಪ್ಪಳ; ಜಿಲ್ಲಾಸ್ಪತ್ರೆಯಲ್ಲಿ ದಾಸ್ತಾನಿರುವ ಔಷಧಗಳನ್ನೂ ಖಾಸಗಿ ಔಷಧ ಅಂಗಡಿಗಳಿಂದ ತರುವಂತೆ ರೋಗಿಗಳಿಗೆ ಚೀಟಿ ಬರೆದುಕೊಟ್ಟ ಜಿಲ್ಲಾಸ್ಪತ್ರೆ ಹಾಗೂ ಕಿಮ್ಸ್ ವೈದ್ಯರಿಗೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ.ಖಾದರ್ ತರಾಟೆ ತೆಗೆದುಕೊಂಡರು.

ಜಿಲ್ಲಾಸ್ಪತ್ರೆಗೆ ಸೋಮವಾರ ದಿಢೀರ್ ಭೇಟಿನೀಡಿದ ಅವರು, ರೋಗಿಗಳಿಂದ ಖುದ್ದು ಮಾಹಿತಿಪಡೆದರು. ‘‘ಇವೆಲ್ಲ ಔಷಧಗಳನ್ನು ಇಲಾಖೆಯಿಂದ ಪೂರೈಸಲಾಗಿದೆ. ಆದರೂ ಹೊರಗೆ ಚೀಟಿ ಬರೆದುಕೊಟ್ಟಿದ್ದೀರಲ್ಲ? ಇವರೆಲ್ಲ ಪಾಪ ಬಡವರು. ಉಚಿತ ಔಷಧ ದೊರೆಯುತ್ತೆ ಎಂದು ಸರಕಾರಿ ಆಸ್ಪತ್ರೆಗೆ ಬಂದಿದ್ದಾರೆ. ಸರಕಾರ ಉಚಿತ ಔಷಧ ಪೂರೈಸಿದರೂ ಪ್ರಯೋಜನ ಇಲ್ಲದಂತಾಗಿದೆ’’ ಎಂದು ಜಿಲ್ಲಾ ಶಸ್ತ್ರ ಚಿಕಿತ್ಸಕ ಡಾ.ಲೋಕೇಶ್ ಹಾಗೂ ಕಿಮ್ಸ್ ನಿರ್ದೇಶಕ ಡಾ.ಎಸ್.ಎಂ.ಮಲಾಪುರೆ ಅವರ ವಿರುದ್ಧ ಹರಿಹಾಯ್ದರು.

ಬರೀ ಬೆಡ್ ಮೇಲೆ ಹೇಗೆ ಮಲಗಬೇಕು?:

ಒಳ ರೋಗಿಗಳ ವಾರ್ಡ್‌ಗೆ ಭೇಟಿನೀಡಿದಾಗ, ಅಲ್ಲಿನ ರೋಗಿಗಳಿಗೆ ಹಾಸಿಗೆ, ದಿಂಬು ನೀಡದಿರುವುದಕ್ಕೆ ಸಚಿವ ಖಾದರ್ ಅವರು ಬೇಸರ ವ್ಯಕ್ತಪಡಿಸಿದರು. ‘‘ಈ ಅಜ್ಜಿಗೆ 80 ವರ್ಷವಾಗಿದೆ. ದಿಂಬು ಇಲ್ಲದೆ ಅವರು ಬರೀ ಬೆಡ್ ಮೇಲೆ ಹೇಗೆ ಮಲಗಬೇಕು? ನಿಮ್ಮ ತಾಯಿಯನ್ನೂ ಮನೆಯಲ್ಲಿ ಹೀಗೆ ಮಲಗಿಸುತ್ತೀರಾ? ಇಂತಹವರ ಸೇವೆ ಮಾಡಲೆಂದೇ ನಿಮಗೆ ಸರಕಾರ ವೇತನ ನೀಡುತ್ತಿದೆ’’ ಎಂದರು.

ಹಾಸಿಗೆ ಕದ್ದೊಯ್ತಾರೆ!:

‘‘ಹಾಸಿಗೆ, ಹೊದಿಕೆ, ದಿಂಬು ನೀಡಿದರೆ, ರೋಗಿಗಳು ಡಿಸ್ಚಾರ್ಜ್ ಆಗಿ ಮನೆಗೆ ಮರಳುವಾಗ, ತಮ್ಮೊಂದಿಗೆ ಇವೆಲ್ಲ ವಸ್ತುಗಳನ್ನು ಕದ್ದು ಒಯ್ಯುತ್ತಾರೆ. ಈ ಹಿನ್ನೆಲೆಯಲ್ಲಿ ಅವರಿಗೆ ಹಾಸಿಗೆ ನೀಡುತ್ತಿಲ್ಲ’’ ಎಂದು ಕಿಮ್ಸ್ ನಿರ್ದೇಶಕ ಡಾ.ಎಸ್.ಎಂ.ಮಲಾಪುರೆ ಸಮಜಾಯಿಷಿ ನೀಡುತ್ತಿದ್ದಂತೆ ಗರಂ ಆದ ಸಚಿವರು, ‘‘ತಪ್ಪು ಮುಚ್ಚಿಕೊಳ್ಳಲು ಏನಾದ್ರೂ ನೆಪ ಹೇಳಬೇಡ್ರಿ. ಎಲ್ಲರೂ ಒಂದೇ ರೀತಿ ಇರುವುದಿಲ್ಲ’’ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಶಿವರಾಜ ತಂಗಡಗಿ, ಜಿ.ಪಂ. ಅಧ್ಯಕ್ಷ ಎಸ್.ಬಿ.ನಾಗರಳ್ಳಿ, ಶಾಸಕ ಕೆ.ರಾಘವೇಂದ್ರ ಹಿಟ್ನಾಳ್, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಶ್ರೀಕಾಂತ ಬಾಸೂರು ಸೇರಿ ಇತರರಿದ್ದರು.