ಈಜಲು ಹೋದ ವಿದ್ಯಾರ್ಥಿ ನೀರುಪಾಲು

ಗಂಗಾವತಿ ; ತಾಲೂಕಿನ ಸಣಾಪುರ ಕೆರೆಯಲ್ಲಿ ಈಜಲು ಹೋದ ಹೋಟೆಲ್ ಮ್ಯಾನೇಜ್‌ಮೆಂಟ್ ವಿದ್ಯಾರ್ಥಿಯೊಬ್ಬ ಭಾನುವಾರ ನೀರುಪಾಲಾಗಿದ್ದಾನೆ.

ಶೇಖ್ ಅಬ್ರಾರ್ (20) ಮೃತ ವಿದ್ಯಾರ್ಥಿ. ಈತ ಮೂಲತಃ ಮಹಾರಾಷ್ಟ್ರದ ನಾಂದೇಡ್ ನಗರದ ನಿವೃತ್ತ ಸೈನಿಕ ಶೇಖ್ ಉಮರ್ ಅಹ್ಮದ್ ಅವರ ಪುತ್ರನಾಗಿದ್ದಾನೆ. ಹೈದರಾಬಾದ್‌ನ ಇಂಟರ್‌ನ್ಯಾಷನಲ್ ಕಾಲೇಜಿನ ಹೋಟೆಲ್ ಮ್ಯಾನೇಜ್‌ಮೆಂಟ್ ಕೋರ್ಸ್‌ನಲ್ಲಿ ವ್ಯಾಸಂಗ ಮಾಡುತ್ತಿದ್ದ. ಬೆಂಗಳೂರಿನ ಹೋಟೆಲ್‌ವೊಂದರ ಹುದ್ದೆಗೆ ಸಂದರ್ಶನಕ್ಕೆ ಹಾಜರಾಗಿ ಮರಳಿದ್ದ. ಒಂದೆರಡು ದಿನ ರಜೆ ಇದ್ದುದರಿಂದ, ಈ ವಿದ್ಯಾರ್ಥಿ ತನ್ನ ಸ್ನೇಹಿತರೊಂದಿಗೆ ಹಂಪಿ ವಿಕ್ಷಣೆಗೆ ಬಂದಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.