ಶಿಸ್ತು ಉಲ್ಲಂಘನೆ: ಪೇದೆ ಅಮಾನತು

ಗಂಗಾವತಿ: ಇಲಾಖೆಯ ಶಿಸ್ತು ಉಲ್ಲಂಘನೆ ಆರೋಪ ಆಧರಿಸಿ, ಇಲ್ಲಿನ ಟ್ರಾಫಿಕ್ ಪೊಲೀಸ್ ಪೇದೆ ಕರಿಯಪ್ಪ ಲಕ್ಷ್ಮಣಗೌಡ ಅವರನ್ನು ಎಸ್ಪಿ ಡಾ.ಕೆ.ತ್ಯಾಗರಾಜನ್, ಶನಿವಾರ ತಡರಾತ್ರಿ ಅಮಾನತುಗೊಳಿಸಿದ್ದಾರೆ.

ಈ ಪೇದೆ, ಪೊಲೀಸ್ ಇಲಾಖೆ ಅಧಿಕಾರಿಗಳು ಮತ್ತು ಪೊಲೀಸ್ ಪೇದೆಗಳಿರುವ ವ್ಯಾಟ್ಸ್ ಆ್ಯಪ್ ಗ್ರೂಪ್‌ಗೆ ಅ.21ರಂದು ಸಂದೇಶ ಕಳುಹಿಸಿದ್ದರು. ‘‘ಪೊಲೀಸರ ವೇತನ ಪರಿಷ್ಕರಣೆಗೆ ಮೀನಮೇಷ ಎಣಿಸುತ್ತಿರುವ ರಾಜ್ಯ ಸರಕಾರದ ನಡೆಯಿಂದ ಮನನೊಂದ ಪೊಲೀಸ್ ಸಿಬ್ಬಂದಿ, ನ.14ರಂದು ಸಾಮೂಹಿಕ ರಜೆ ಹಾಕಲು ದೃಢ ನಿರ್ಧಾರಮಾಡಿದ್ದಾರೆ’’ ಎಂಬ ಸಂದೇಶವನ್ನು ಪೋಸ್ಟ್‌ಮಾಡಿದ್ದರು.

ಪೇದೆಯನ್ನು ಕಚೇರಿಗೆ ಕರೆಯಿಸಿಕೊಂಡ ಎಸ್ಪಿ ಡಾ.ಕೆ.ತ್ಯಾಗರಾಜನ್ ಅವರು ಸುದೀಘ್ರ ವಿಚಾರಣೆ ನಡೆಸಿದ್ದರು. ‘‘ಶಿಸ್ತಿನ ಇಲಾಖೆಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಟ್ರಾಫಿಕ್ ಪೊಲೀಸ್ ಪೇದೆ, ಮುಷ್ಕರ, ಹೋರಾಟಕ್ಕೆ ಇತರ ಸಿಬ್ಬಂದಿಗೆ ಪ್ರಚೋದಿಸಿದ್ದಾರೆ. ಕಾನೂನು ಸುವ್ಯವಸ್ಥೆ ಹಾಳುಮಾಡುವ ಯೋಚನೆ ಜತೆಗೆ ಇಲಾಖೆಯ ಗೌರವಕ್ಕೆ ಧಕ್ಕೆ ತಂದ ಕಾರಣದಿಂದ ಪೇದೆಯನ್ನು ಅಮಾನತು ಮಾಡಲಾಗಿದೆ’’ ಎಂದು ಆದೇಶದಲ್ಲಿ ಎಸ್ಪಿ ತಿಳಿಸಿದ್ದಾರೆ.