ಲಂಚ: ಗ್ರಾಮಲೆಕ್ಕಾಧಿಕಾರಿ ಎಸಿಬಿ ಬಲೆಗೆ

ಯಲಬುರ್ಗಾ(ಕೊಪ್ಪಳ): ಜಮೀನಿನ ಮ್ಯುಟೇಷನ್ ನೀಡಲು ಲಂಚ ಸ್ವೀಕರಿಸಿದ, ತಾಲೂಕಿನ ಹಿರೇವಂಕಲಕುಂಟಾ ಹೋಬಳಿ ವ್ಯಾಪ್ತಿಯ ತಿಪ್ಪನಾಳ ಗ್ರಾಮಲೆಕ್ಕಾಧಿಕಾರಿ, ಎಸಿಬಿ ದಾಳಿಗೆ ಗುರುವಾರ ಸಿಲುಕಿದ್ದಾರೆ.

ಗ್ರಾಮದ ರೈತ ಮಹೆಬೂಬ್‌ಸಾಬ್ ಮುಲ್ಲಾ ಅವರು, ಜಮೀನಿನ ಮ್ಯುಟೇಷನ್‌ಗೆಂದು ತೆರಳಿದಾಗ, ಗ್ರಾಮಲೆಕ್ಕಾಧಿಕಾರಿ ನಾಗಪ್ಪ ಚೂರಿ ಅವರು 4ಸಾವಿರ ರೂ. ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು. ಲಂಚ ನೀಡಲು ನಿರಾಕರಿಸಿದ ಮಹೆಬೂಬ್‌ಸಾಬ್ ಅವರು, ಎಸಿಬಿಗೆ ದೂರು ನೀಡಿದ್ದರು. ಈ ದೂರಿನನ್ವಯ, ಎಸಿಬಿ ಡಿಎಸ್ಪಿ ಗಿರೀಶ್ ನೇತೃತ್ವದ ತಂಡ ದಾಳಿ ನಡೆಸಿ, ಗ್ರಾಮಲೆಕ್ಕಾಧಿಕಾರಿಯನ್ನು ವಶಕ್ಕೆ ಪಡೆದಿದೆ. ಈ ಸಂದರ್ಭದಲ್ಲಿ ಸಿಪಿಐಗಳಾದ ಕರಿಯಪ್ಪ ಬನ್ನಿ, ಮೌನೇಶ್ವರ ಮಾಲಿ ಪಾಟೀಲ್ ಹಾಗೂ ಸಿಬ್ಬಂದಿ ಇದ್ದರು.