ಕೊಪ್ಪಳ: ಹುಚ್ಚು ಹಿಡಿದ ತೋಳದ ದಾಳಿ, ಜನ ಹಾಗೂ ಜಾನುವಾರುಗಳಿಗೆ ಗಾಯ

ಕೊಪ್ಪಳ: ಕುಷ್ಟಗಿ ತಾಲೂಕಿನ ಹಲವು ಗ್ರಾಮಗಳಲ್ಲಿ ಹುಚ್ಚು ಹಿಡಿದ ತೋಳವೊಂದು ದಾಳಿ ನಡೆಸಿ, 15ಕ್ಕೂ ಹೆಚ್ಚು ಜನ ಹಾಗೂ ಜಾನುವಾರುಗಳನ್ನು ಗಾಯಗೊಳಿಸಿದ ಘಟನೆ ನಡೆದಿದೆ.

ಮೊದಲಿಗೆ ತೆಗ್ಗಿನಾಳ ಗ್ರಾಮಕ್ಕೆ ಬಂದ ತೋಳ, ಎರಡು ಆಕಳಿಗೆ ಕಚ್ಚಿ ಪರಾರಿಯಾಗಿದೆ. ಹೊಸೂರು ಗ್ರಾಮದಲ್ಲಿ ಒಂದು ಜಾನುವಾರು ಹಾಗೂ ಇಬ್ಬರ ವ್ಯಕ್ತಿಗಳ ಮೇಲೆ ದಾಳಿ ನಡೆಸಿ ಗಾಯಗೊಳಿಸಿದೆ.‌ ಟೆಂಗುಂಟಿ ಗ್ರಾಮದಲ್ಲಿ ನುಗ್ಗಿ 8 ಜನರಿಗೆ ಕಚ್ಚಿ ಗಾಯಗೊಳಿಸಿದೆ.

ರೊಚ್ಚಿಗೆದ್ದ ಗ್ರಾಮಸ್ಥರು ಬಡಿಗೆಗಳಿಂದ ಹುಚ್ಚು ಹಿಡಿದ ತೋಳವನ್ನು ಹೊಡೆದು ಸಾಯಿಸಿ, ನಂತರ ಅದನ್ನು ಸುಟ್ಟು ಹಾಕಿದ್ದಾರೆ. ತೀವ್ರ ಗಾಯಗೊಂಡ ನಾಗಮ್ಮ ಸೇರಿ ಮೂವರನ್ನು ಚಿಕಿತ್ಸೆಗೆ ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಉಳಿದ ಗಾಯಾಳುಗಳು ಕುಷ್ಟಗಿಯ ಸರಕಾರಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಕುಷ್ಟಗಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.