ಅಮಾನವೀಯ: ಮಗಳ ಸಾವಿನ ವಿಷಯ ತಂದೆಗೆ ತಿಳಿಸದೆ ಕರ್ತವ್ಯಕ್ಕೆ ಕಳುಹಿಸಿದರಾ ಅಧಿಕಾರಿಗಳು?

ಕೊಪ್ಪಳ: ಇದನ್ನು ಅಮಾನವೀಯ ಅನ್ನುತ್ತೀರೋ, ಅಧಿಕಾರದ ದರ್ಪ ಅನ್ನುತ್ತೀರೋ, ಹೃದಯಶೂನ್ಯರೆನ್ನುತ್ತಿರೋ! ನಿಮಗೆ ಬಿಟ್ಟಿದ್ದು. ಆ ತಂದೆಯ ಮಗಳು ಸಾವನ್ನಪ್ಪಿದ್ದಳು. ಈ ಮಾಹಿತಿ ಅಧಿಕಾರಿಗಳಿಗೆ ದೊರೆತಿದ್ದರೂ, ತಂದೆಗೆ ತಿಳಿಸದೇ ಕರ್ತವ್ಯಕ್ಕೆ ಕಳುಹಿಸಿದ್ದಾರೆ.

ಹೌದು, ಕೊಪ್ಪಳದ ಗಂಗಾವತಿ ಸಾರಿಗೆ ಘಟಕದಲ್ಲಿ ಈ ಅಮಾನವೀಯ ಪ್ರಸಂಗ ನಡೆದಿದೆ. ಬಾಗಲಕೋಟೆ ಜಿಲ್ಲೆಯ ರಾಂಪುರ ಗ್ರಾಮದ ನಿವಾಸಿ ಮಂಜುನಾಥ ಎನ್ನುವವರು ಗಂಗಾವತಿಯ ಸಾರಿಗೆ ಘಟಕದಲ್ಲಿ ಬಸ್ ಚಾಲಕನಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಬಸ್ ಚಾಲಕನ ಪುತ್ರಿ ಕವಿತಾ ಅನಾರೋಗ್ಯದಿಂದ ಬುಧವಾರ ರಾಂಪುರ ಗ್ರಾಮದಲ್ಲಿ ಸಾವನ್ನಪ್ಪಿದ್ದಳು. ಕುಟುಂಬಸ್ಥರು ಮಗಳು ಮೃತ ಪಟ್ಟಿರುವ ಸುದ್ದಿಯನ್ನು ಸಾರಿಗೆ ಇಲಾಖೆಯ ಅಧಿಕಾರಿಗಳಿಗೆ ತಿಳಿಸಿದ್ದಾರೆ‌.

ಆದರೆ ಅಧಿಕಾರಿಗಳು ಚಾಲಕ ಮಂಜುನಾಥ ಅವರಿಗೆ ಮಾಹಿತಿ ನೀಡದೆ ಕೊಲ್ಲಾಪೂರ -ಗಂಗಾವತಿ ಬಸ್‌ಗೆ ಚಾಲಕನನ್ನು ಕಳುಹಿಸಿದ್ದಾರೆ. ಎರಡು ದಿನಗಳ ನಂತರ ಡಿಪೋಗೆ ಆಗಮಿಸಿದ ವೇಳೆ ಮಗಳು ಮೃತಪಟ್ಟಿರುವ ಘಟನೆಯನ್ನು ತಿಳಿಸಿದ್ದಾರೆ. ಮಗಳ ಸಾವಿನ ವಿಷಯ ತಡವಾಗಿ ತಿಳಿದರಿಂದ ದಿಗ್ಭ್ರಮೆಗೊಂಡಿದ್ದಾರೆ.

ಕೊನೆಯ ಬಾರಿ‌ ಮಗಳ ಮುಖವನ್ನು ನೋಡದಂತಾಯಿತು ಎಂದು ಮಂಜುನಾಥ ಗೋಳಾಡಿದ್ದು ಎಂಥಹ ಕಲ್ಲು ಹೃದಯವನ್ನು ಕರಗಿಸುವಂತಿತ್ತು.

ಈ ಕುರಿತು ಮಾತನಾಡಿದ ವಿಭಾಗೀಯ ನಿಯಂತ್ರಣಾಧಿಕಾರಿ, ಮೃತಳಾದ ಬಗ್ಗೆ ಯಾವುದೇ ಅಧಿಕಾರಿಗೆ ಮಾಹಿತಿ ಬಂದಿಲ್ಲ. ಇಂತಹ ಸುದ್ದಿ ತಿಳಿದು ಕೆಲಸಕ್ಕೆ‌ ಕಳುಹಿಸುವುದಿಲ್ಲ. ಮಾನವೀಯತೆ ಆಧಾರದ ಮೇಲೆ ಚಾಲಕನನ್ನು ನಾವೇ ಅವರ ಊರಿಗೆ ಕಳುಹಿಸುತ್ತಿದ್ದೆವು. ತಪ್ಪು ಗ್ರಹಿಕೆಯಿಂದ ಇಂತಹ ಸ್ಥಿತಿ ನಿರ್ಮಾಣವಾಗಿದೆ ಎಂದಿದ್ದಾರೆ.