ಇಬ್ಬರ ವಿರುದ್ಧ ಪ್ರಕರಣ ದಾಖಲು

ಕಾರಟಗಿ (ಕೊಪ್ಪಳ): ಟಿಪ್ಪು ಸುಲ್ತಾನ್ ಹಾಗೂ ಸಿಎಂ ಸಿದ್ದರಾಮಯ್ಯ ಅವರ ಭಾವಚಿತ್ರಗಳನ್ನು ಅವಹೇಳನಕಾರಿ ರೀತಿಯಲ್ಲಿ ಫೇಸ್‌ಬುಕ್‌ಗೆ ಪೋಸ್ಟ್ ಮಾಡಿದ ಆರೋಪ ಆಧರಿಸಿ ಇಬ್ಬರ ವಿರುದ್ಧ ಸ್ಥಳೀಯ ಠಾಣೆಯಲ್ಲಿ ಬುಧವಾರ ಪ್ರಕರಣ ದಾಖಲಾಗಿದೆ.

ತಿರುಚಿದ ಹಾಗೂ ಅವಹೇಳನಕಾರಿ ಭಾವಚಿತ್ರಗಳನ್ನು ಕುಸುಮಾ ಎನ್ನುವವರು, ಫೇಸ್‌ಬುಕ್‌ನಲ್ಲಿ ಅ.24ರಂದು 7.40ಕ್ಕೆ ಪೋಸ್ಟ್‌ಮಾಡಿದ್ದರು. ಈ ಪೋಸ್ಟ್ ಅನ್ನು ಬೂದಗುಂಪಾ ಗ್ರಾಮದ ಪಂಪನಗೌಡ ಜಂತಗಲ್ ಅವರು ಅ.25ರಂದು ಬೆಳಗ್ಗೆ 8ಕ್ಕೆ ಶೇರ್ ಮಾಡಿದ್ದರು. ಈ ಪೋಸ್ಟ್ ಗಮನಿಸಿದ ಕಾರಟಗಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಅಂಬಣ್ಣ ನಾಯಕ ಹಾಗೂ ಪಕ್ಷದ ಇತರ ಘಟಕಗಳ ಪದಾಧಿಕಾರಿಗಳು, ಪಂಪನಗೌಡ ಜಂತಗಲ್ ಹಾಗೂ ಕುಸುಮಾ ವಿರುದ್ಧ ಠಾಣೆಗೆ ದೂರು ಸಲ್ಲಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.