ಸಹಕಾರ ಬ್ಯಾಂಕ್ : ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆ

ಕುಷ್ಟಗಿ; ಇಲ್ಲಿನ ಕುಷ್ಟಗಿ ಪಟ್ಟಣ ಸಹಕಾರ ಬ್ಯಾಂಕ್‌ನ ಹೊಸ ಅಧ್ಯಕ್ಷರಾಗಿ ಬಸನಗೌಡ ಪೊಲೀಸ್‌ಪಾಟೀಲ್, ಉಪಾಧ್ಯಕ್ಷರಾಗಿ ಬಸವರಾಜ ಶೆಟ್ಟರ್ ಮಂಗಳವಾರ ಅವಿರೋಧ ಆಯ್ಕೆಯಾದರು.

ಹಿಂದಿನ ಅಧ್ಯಕ್ಷ ಲಾಡ್‌ಸಾಬ್ ಕೊಳ್ಳಿ, ಉಪಾಧ್ಯಕ್ಷ ರವೀಂದ್ರ ಬಾಕಳೆ ಅವರು ತಮ್ಮ ಸ್ಥಾನಗಳಿಗೆ ರಾಜೀನಾಮೆ ಸಲ್ಲಿಸಿದ್ದಕ್ಕೆ, ಚುನಾವಣೆ ದಿನ ಮಂಗಳವಾರ ನಿಗದಿಯಾಗಿತ್ತು. ಬ್ಯಾಂಕ್‌ನ 11 ನಿರ್ದೇಶಕರಲ್ಲಿ ಎರಡು ಗುಂಪುಗಳಾಗಿ, ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆ ಸಭೆಗೆ 4 ನಿರ್ದೇಶಕರು ಬ್ಯಾಂಕ್ ಆವರಣದಲ್ಲೇ ಇದ್ದರೂ ಹಾಜರಾಗಲಿಲ್ಲ. ಉಳಿದ ಕೆಲ ನಿರ್ದೇಶಕರೂ ಸಭೆಗೆ ಹಾಜರಾಗುವುದನ್ನು ತಪ್ಪಿಸಲು ಮುಖಂಡರು ಪ್ರಯತ್ನಿಸಿದರು. ಒಂದು ಹಂತದಲ್ಲಿ ನಿರ್ದೇಶಕರು ಮತ್ತು ಮುಖಂಡರ ನಡುವೆ ವಾಗ್ವಾದ ನಡೆಯಿತು. ವಾಗ್ವಾದ ವಿಕೋಪಕ್ಕೆ ತಿರುಗುವ ಹಂತದಲ್ಲಿ ಪೊಲೀಸರು ಮಧ್ಯೆ ಪ್ರವೇಶಿಸಿ ವಾತಾವರಣ ತಿಳಿಗೊಳಿಸಿದರು. ಸಭೆಯಲ್ಲಿ 7 ನಿರ್ದೇಶಕರು ಹಾಜರಾಗಿದ್ದಕ್ಕೆ ಕೋರಂ ಭರ್ತಿ ಇದ್ದುದನ್ನು ಅರಿತ ಚುನಾವಣೆ ಅಧಿಕಾರಿ ಪ್ರಕ್ರಿಯೆ ನಡೆಸಲು ಅವಕಾಶ ನೀಡಿದರು. ಅಧ್ಯಕ್ಷ ಸ್ಥಾನಕ್ಕೆ ಬಸನಗೌಡ ಪೊಲೀಸ್‌ಪಾಟೀಲ್, ಉಪಾಧ್ಯಕ್ಷ ಸ್ಥಾನಕ್ಕೆ ಬಸವರಾಜ ಶೆಟ್ಟರ್ ಅವರ ಹೆಸರುಗಳು ಸೂಚನೆಯಾದವು. ಬೇರೆಯವರ ಹೆಸರು ಕೇಳಿ ಬರದಿದ್ದರಿಂದ ಅವಿರೋಧ ಆಯ್ಕೆಯನ್ನು ಚುನಾವಣೆ ಅಧಿಕಾರಿ ಮರಿಯಪ್ಪ ಘೋಷಿಸಿದರು.