ನೊಣಗಳ ಉಪಟಳ: ಕೋಳಿಫಾರಂಗೆ ಡಿಸಿ ಭೇಟಿ
ತಾಲೂಕಿನ ಬಸಾಪುರ ಗ್ರಾಮದ ಬಳಿಯ ಪೊಲೀಸ್ ವಸತಿ ಗೃಹಗಳಿಗೆ ನೊಣಗಳ ಹಾವಳಿ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಕೋಳಿ ಫಾರ್ಮ್ಗೆ ಜಿಲ್ಲಾಧಿಕಾರಿ ಪಿ.ಸುನಿಲ್ಕುಮಾರ್ ಬುಧವಾರ ಭೇಟಿ ನೀಡಿ, ನೊಣ ಹಾವಳಿ ನಿಯಂತ್ರಿಸುವಂತೆ ಮಾಲೀಕರಿಗೆ ಸೂಚಿಸಿದರು.
Vijaya Karnataka 20 Sep 2018, 5:00 am
ಕೊಪ್ಪಳ : ತಾಲೂಕಿನ ಬಸಾಪುರ ಗ್ರಾಮದ ಬಳಿಯ ಪೊಲೀಸ್ ವಸತಿ ಗೃಹಗಳಿಗೆ ನೊಣಗಳ ಹಾವಳಿ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಕೋಳಿ ಫಾರ್ಮ್ಗೆ ಜಿಲ್ಲಾಧಿಕಾರಿ ಪಿ.ಸುನಿಲ್ಕುಮಾರ್ ಬುಧವಾರ ಭೇಟಿ ನೀಡಿ, ನೊಣ ಹಾವಳಿ ನಿಯಂತ್ರಿಸುವಂತೆ ಮಾಲೀಕರಿಗೆ ಸೂಚಿಸಿದರು.
ಪೊಲೀಸ್ ವಸತಿ ಗೃಹಗಳು ಸೇರಿದಂತೆ ನಾನಾ ಗ್ರಾಮಗಳಲ್ಲಿ ನೊಣಗಳ ಹಾವಳಿ ಹೆಚ್ಚಾಗಿದೆ. ನೊಣ ಹೆಚ್ಚಾಗುವುದಕ್ಕೆ ಕೋಳಿ ಫಾರ್ಮ್ಗಳೇ ಕಾರಣವಾಗಿವೆ. ಮನೆಯಲ್ಲಿ ಊಟ ಮಾಡುವುದಕ್ಕೆ ಹಿಂಜರಿಕೆಯಾಗಿದ್ದು, ಈಗಾಗಲೇ ಮಕ್ಕಳು ಅನಾರೋಗ್ಯಕ್ಕೆ ತುತ್ತಾಗಿದ್ದಾರೆ. ತಹಸೀಲ್ದಾರ್ ಅವರು ಬಹುದಿನದ ಹಿಂದೆಯೇ ಕೋಳಿ ಫಾರ್ಮ್ ಮಾಲೀಕರಿಗೆ ನೋಟಿಸ್ ಜಾರಿಗೊಳಿಸಿದ್ದರು. ಆದರೂ ಮಾಲೀಕರು ನೊಣ ನಿಯಂತ್ರಣಕ್ಕೆ ಕ್ರಮ ಕೈಗೊಂಡಿಲ್ಲ. ವಸತಿ ಗೃಹಗಳಿಗೆ ಶುದ್ಧ ಕುಡಿವ ನೀರಿಲ್ಲ. 4 ಕಿ.ಮೀ. ದೂರದಲ್ಲಿರುವ ಬಸಾಪುರ ಗ್ರಾಮಕ್ಕೆ ತೆರಳಿ ನೀರು ತರಬೇಕು. ಇಲ್ಲಿಯೇ ಶುದ್ಧ ಕುಡಿವ ನೀರಿನ ಘಟಕ ಅಳವಡಿಸಬೇಕು. ಸಾರಿಗೆ ಸಂಸ್ಥೆ ಕೋರಿಕೆ ಮೇರೆಗೆ ಇಲ್ಲಿ ಬಸ್ಗಳನ್ನು ನಿಲುಗಡೆ ಮಾಡಬೇಕು ಎಂದು ವಸತಿ ಗೃಹದ ಸಿಬ್ಬಂದಿ ಜಿಲ್ಲಾಧಿಕಾರಿಗಳ ಮುಂದೆ ತಮ್ಮ ಅಳಲು ತೋಡಿಕೊಂಡರು.
ಜಿಲ್ಲಾ ವ್ಯಾಪ್ತಿಯಲ್ಲಿನ ಕೋಳಿ ಫಾರ್ಮ್ ಮಾಲೀಕರು ನೊಣಗಳ ಹಾವಳಿ ನಿಯಂತ್ರಣಕ್ಕೆ ಕ್ರಮಕೈಗೊಳ್ಳಬೇಕು. ಒಂದು ವೇಳೆ ಕ್ರಮ ಕೈಗೊಳ್ಳದಿದ್ದರೆ ಕಾನೂನು ಪ್ರಕಾರ ನೋಟಿಸ್ ಜಾರಿಗೊಳಿಸಿ ಕೋಳಿ ಫಾರ್ಮ್ ಮುಚ್ಚಲಾಗುವುದು ಎಂದು ಎಚ್ಚರಿಕೆ ನೀಡಿದರಲ್ಲದೇ ಸಂಬಂಧಿಸಿದ ಅಧಿಕಾರಿಗಳ ಜತೆಗೆ ಎಲ್ಲ ಸೌಲಭ್ಯ ಕಲ್ಪಿಸುವ ಭರವಸೆ ನೀಡಿದರು.
ಸ್ವಚ್ಛಗೊಂಡ ಫಾರ್ಮ್: ಕೋಳಿ ಫಾರ್ಮ್ಗಳಿಗೆ ಜಿಲ್ಲಾಧಿಕಾರಿ ಭೇಟಿ ನೀಡಲಿದ್ದಾರೆ ಎಂಬ ಮಾಹಿತಿ ಅರಿತಿರುವ ಮಾಲೀಕರು, ಬ್ಲೀಚಿಂಗ್ ಪೌಡರ್ ಸಿಂಪಡಿಸಿ ಸ್ವಚ್ಛಗೊಳಿಸಿದ್ದರು. ವಾಸನೆ ಹರಡದಂತೆ ಹಾಗೂ ನೊಣಗಳ ಹಾವಳಿ ನಿಯಂತ್ರಿಸಲು ಔಷಧ ಸಿಂಪಡಿಸಿದ್ದರು. ಇದರಿಂದಾಗಿ ಕೋಳಿ ಫಾರ್ಮ್ಗಳ ಆವರಣದಲ್ಲಿಯೇ ನೊಣಗಳ ರಾಶಿ ಕಂಡುಬಂದಿತು. ಕೋಳಿ ಫಾರ್ಮ್ಗೆ ಆಗಮಿಸುತ್ತಿದ್ದ ಬಾಲ ಕಾರ್ಮಿಕರನ್ನು ತಡೆಗಟ್ಟಿದ ಕೆಲಸಗಾರರು ಅವರನ್ನು ವಾಪಸ್ ಕಳುಹಿಸಿದ ದೃಶ್ಯ ಕಂಡುಬಂತು.