ಖೋಟಾ ನೋಟು ಪ್ರಕರಣ: ಮತ್ತಿಬ್ಬರ ಬಂಧನ

ಕೊಪ್ಪಳ: ಗಂಗಾವತಿಯ ಶಾಸಕ ಪರಣ್ಣ ಮುನವಳ್ಳಿ ಅವರಿಗೆ ಖೋಟಾ ನೋಟು ರವಾನಿಸಿ, ಬೆದರಿಕೆ ಒಡ್ಡಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಇಲ್ಲಿನ ಪೊಲೀಸರು, ಶುಕ್ರವಾರ ಮತ್ತಿಬ್ಬರು ಆರೋಪಿಗಳನ್ನು ಬಂಧಿಸಿ 16 ಲಕ್ಷ ರೂ. ಮುಖಬೆಲೆಯ ಖೋಟಾನೋಟುಗಳನ್ನು ವಶಪಡಿಸಿಕೊಂಡಿದ್ದಾರೆ.

ಅಬ್ದುಲ್ ರಹಮಾನ್ ಹಾಗೂ ಎಂ.ಎ.ಅಮ್ಜದ್ ಬಂಧಿತರು. ಚೆನ್ನೈಗೆ ತೆರಳಿದ್ದ ಕೊಪ್ಪಳದ ಪಿಐಗಳಾದ ಸೋಮಶೇಖರ್ ಹಾಗೂ ರಾಜಕುಮಾರ ವಾಜೆಂತ್ರಿ ನೇತೃತ್ವದ ತಂಡ, ಮಹಾನಗರ ಹೊರವಲಯದ ಮನೆಯೊಂದರಲ್ಲಿ ಆರೋಪಿಗಳನ್ನು ಬಂಧಿಸಿದೆ. ಬಂಧಿತ ಆರೋಪಿಗಳು ಮೂಲತಃ ಬೆಂಗಳೂರಿನವರಾಗಿದ್ದಾರೆ. ‘‘2000, 500 ರೂ. ಮುಖಬೆಲೆಯ 1700 ಖೋಟಾ ನೋಟುಗಳು, ಮುದ್ರಣಕ್ಕೆ ಬಳಸಿದ ಪ್ರಿಂಟರ್, ಕಂಪ್ಯೂಟರ್, ಇಂಕ್ ಬಾಟಲ್, ಪೇಪರ್ ಸೇರಿ ಇತರ ಸಲಕರಣೆಗಳನ್ನು ವಶಪಡಿಸಿಕೊಳ್ಳಲಾಗಿದೆ’’ ಎಂದು ಎಸ್ಪಿ ಡಾ.ಅನೂಪ್ ಶೆಟ್ಟಿ ತಿಳಿಸಿದ್ದಾರೆ.