ಕೊಪ್ಪಳ: ವಿದ್ಯುತ್ ಶಾರ್ಟ್‌ ಸರ್ಕ್ಯೂಟ್‌ನಿಂದ ತಾ.ಪಂ. ಸದಸ್ಯೆ ಸಾವು

ಕೊಪ್ಪಳ: ಕುಷ್ಟಗಿ ತಾಲೂಕಿನ ಜುಮಲಾಪುರ ಗ್ರಾಮದಲ್ಲಿ ವಿದ್ಯುತ್ ಶಾಟ್ ಸರ್ಕ್ಯೂಟ್ ನಿಂದ ತಾ.ಪಂ.ಸದಸ್ಯೆಯೊಬ್ಬರು ಗುರುವಾರ ಸಂಜೆ ಸಾವನ್ನಪ್ಪಿದ್ದಾರೆ‌. ಜುಮಲಾಪುರ ಗ್ರಾಮದ ತಾಪಂ ಸದಸ್ಯೆ ಸರಸ್ವತಿ ವೀರೇಶ ಗಂಗನಾಳ (38) ಮೃತ ಮಹಿಳೆ.

ಬುಧವಾರ ರಾತ್ರಿ ಕುಷ್ಠಗಿ ಸುತ್ತಮುತ್ತ ಉತ್ತಮ ಮಳೆಯಾಗಿದ್ದು, ಈ ಹಿನ್ನೆಲೆಯಲ್ಲಿ ವಿದ್ಯುತ್ ತಂತಿ ಕಡಿದು ಕಿರಾಣಿ ಅಂಗಡಿಯ ಕಬ್ಬಿಣದ ಶಟರ್ಸ್ ಮೇಲೆ ಬಿದ್ದಿತ್ತು. ರಾತ್ರಿಯಿಂದಲೇ ವಿದ್ಯುತ್ ಸಂಪರ್ಕ ಕಡಿತಗೊಂಡಿದ್ದರಿಂದ ಯಾರ ಗಮನಕ್ಕೂ ಇದು ಬಂದಿರಲಿಲ್ಲ.

ಆದರೆ ಗುರುವಾರ ಸಂಜೆ ಏಕಾಏಕಿ ಈ ತಂತಿಯಲ್ಲಿ ವಿದ್ಯುತ್ ಹರಿದಿದ್ದು, ಎಂದಿನಂತೆ ಸರಸ್ವತಿ ಅವರು ಕಿರಾಣಿ ಅಂಗಡಿಯ ಶಟರ್ಸ್ ತೆಗೆಯಲು ಹೋದಾಗ ವಿದ್ಯುತ್ ಪ್ರವಹಿಸಿ ಗಂಭೀರ ಗಾಯಗೊಂಡಿದ್ದರು.

ತಕ್ಷಣ ಅವರಿಗೆ ತಾವರಗೇರಾ ಸರಕಾರಿ ಆಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ನೀಡಿ, ಹೆಚ್ಚಿನ ಚಿಕಿತ್ಸೆಗೆ ಕುಷ್ಟಗಿ ಸರಕಾರಿ ಆಸ್ಪತ್ರೆಗೆ ಕರೆದುಕೊಂಡು ಹೋಗುವಾಗ ಮಾರ್ಗ ಮಧ್ಯದಲ್ಲಿ ತಾ.ಪಂ.ಸದಸ್ಯೆ ಸರಸ್ವತಿ ಮೃತರಾಗಿದ್ದಾರೆ. ಈ ಸಂಬಂಧ ತಾವರಗೇರಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.