ನಾಮಪತ್ರ ಸಲ್ಲಿಕೆ ಕೊನೆ ದಿನ ಬಿರು ಬಿಸಿಲಿನಲ್ಲಿ ರೋಡ್‌ ಶೋ

ಗಂಗಾವತಿ : ವಿಧಾನಸಭೆ ಚುನಾವಣೆಗೆ ನಾಮಪತ್ರ ಸಲ್ಲಿಕೆ ಕೊನೆ ದಿನವಾಗಿದ್ದು, ಜೆಡಿಎಸ್‌, ಎಂಇಪಿ, ಸಿಪಿಐಎಂ ಸೇರಿದಂತೆ ಪಕ್ಷೇತರ ಅಭ್ಯರ್ಥಿಗಳು ಮಂಗಳವಾರ ನಾಮಪತ್ರ ಸಲ್ಲಿಸಿದರು.

ಗಂಗಾವತಿ ಕ್ಷೇತ್ರಕ್ಕೆ ಜೆಡಿಎಸ್‌ ಅಭ್ಯರ್ಥಿ ಕರಿಯಣ್ಣ ಸಂಗಟಿ ಸಾವಿರಾರು ಜನ ಕಾರ್ಯಕರ್ತರೊಂದಿಗೆ ರೋಡ್‌ ಶೋ ನಡೆಸಿ ತಹಸಿಲ್‌ ಕಚೇರಿಯಲ್ಲಿನ ನಾಮಪತ್ರ ಸಲ್ಲಿಸಿದರು. ನಗರದ ಗಂಗಾವತಿ ವೃತ್ತದಿಂದ ಗಣೇಶ ಸರ್ಕಲ್‌, ಭಗೀರಥ ವೃತ್ತ, ನೀಲಕಂಠೇಶ್ವರ ವೃತ್ತ, ಶ್ರೀಕೃಷ್ಣದೇವರಾಯ ವೃತ್ತ ಸೇರಿದಂತೆ ಇತರೆ ಕಡೆ ಮೆರವಣಿಗೆ ನಡೆಸಿದರು.

ಸಿಪಿಐಎಂ: ಸಿಪಿಐಎಂ ಅಭ್ಯರ್ಥಿ ನಾಗರಾಜ ಗುರುಶಾಂತನವರ ನಾಮಪತ್ರ ಸಲ್ಲಿಸಿದರು. ಬೆಳಗ್ಗೆ 10 ಗಂಟೆಗೆ ನಗರದ ಸಿಬಿಎಸ್‌ ವೃತ್ತದಿಂದ ಮಹಾವೀರ ಸರ್ಕಲ್‌, ಗಾಂಧಿವೃತ್ತ, ಬಸವಣ್ಣ ಸರ್ಕಲ್‌, ಪಂಪಾನಗರ, ಅಂಬೇಡ್ಕರ್‌ ನಗರ ಸೇರಿದಂತೆ ನಾನಾ ಕಡೆ ಮೆರವಣಿಗೆ ನಡೆಸಿದರು. ನಗರ ಸೇರಿದಂತೆ ಗ್ರಾಮೀಣ ಭಾಗದಿಂದ ನೂರಾರು ಕಾರ್ಯಕರ್ತರು ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದರು. ಬೆಂಗಳೂರಿನಿಂದ ಆಗಮಿಸಿದ್ದ ಎಂಇಪಿ ಅಭ್ಯರ್ಥಿ ವಿನಯಕುಮಾರ ರೆಡ್ಡಿ ಪಕ್ಷದ ಕಾರ್ಯಕರ್ತರೊಂದಿಗೆ ನಾಮಪತ್ರ ಸಲ್ಲಿಸಿದರು.

ಬಿಸಿಲಲ್ಲಿ ರೋಡ್‌ ಶೋ: ಬಿರು ಬಿಸಿಲಿನಲ್ಲಿ ನಾಮಪತ್ರ ಸಲ್ಲಿಕೆ ಮುನ್ನ ನಾನಾ ಪಕ್ಷದ ಕಾರ್ಯಕರ್ತರು ರೋಡ್‌ ಶೋ ನಡೆಸಿದರು. ಬಿಸಿಲಿನ ತಾಪಕ್ಕೆ ಕಾರ್ಯಕರ್ತರು ಸಂಕಟ ಪಡಬೇಕಾಯಿತು. ಮಹಿಳೆಯರು ಮಕ್ಕಳೊಂದಿಗೆ ಆಗಮಿಸಿದ್ದ ಕಾರ್ಯಕರ್ತರು ರೋಡ್‌ ಶೋ ಉದ್ದಕ್ಕೂ ಗಿಡ ಮರಗಳ ನೆರಳಿನ ಆಸರೆ ಪಡೆದರು. ರಮೇಶ ಜೋಗಿನ್‌, ದಿಗಂಬರರಾವ್‌, ಸೈಯದ್‌ ಜರಿಯಣ್ಣ , ಫಾತೀಮಾ, ಆಯಿಶಾ ಬೇಗಂ ಸೇರಿದಂತೆ ಇತರರು ಪಕ್ಷೇತರ ಅಭ್ಯರ್ಥಿಗಳಾಗಿ ನಾಮಪತ್ರ ಸಲ್ಲಿಸಿದರು. ಜೆಡಿಎಸ್‌ ರಾಜ್ಯ ಉಪಾಧ್ಯಕ್ಷ ಎಚ್‌.ಆರ್‌.ಶ್ರೀನಾಥ, ಅಭ್ಯರ್ಥಿ ಕರಿಯಣ್ಣ ಸಂಗಟಿ, ನಗರ ಘಟಕದ ಅಧ್ಯಕ್ಷ ಶೇಖ್‌ ನಬಿಸಾಬ್‌ ಮುಖಂಡರಾದ ಪಿ.ಅಖ್ತರ್‌ಸಾಬ್‌, ರಾಘವೇಂದ್ರ, ನಿಧಿ ಚಕ್ರವರ್ತಿ. ಎಂಇಪಿ ಅಭ್ಯರ್ಥಿ ವಿನಯಕುಮಾರ ರೆಡ್ಡಿ ಸೇರಿದಂತೆ ಇತರರು ಇದ್ದರು.