ಕೊಪ್ಪಳದಲ್ಲಿ ಹಿಂದೂ-ಮುಸ್ಲಿಂ ನೇಕಾರ ಕುಟುಂಬಗಳಿಂದ ಮೂಷಿಕನಿಗೆ ವಿಶೇಷ ಪೂಜೆ

ಕೊಪ್ಪಳ: ನಗರ ಸಮೀಪದ ಭಾಗ್ಯನಗರ ಪಟ್ಟಣದಲ್ಲಿ ಗಣೇಶನ ವಾಹನ ಇಲಿಗೆ ವಿಶೇಷ ಪೂಜೆಯನ್ನು ಮಂಗಳವಾರ ಸಲ್ಲಿಸಲಾಯಿತು. ಗಣೇಶ ಮೂರ್ತಿ ಪ್ರತಿಷ್ಠಾಪಿಸಿದ ಮರುದಿನವೇ ಗಣೇಶನ ವಾಹನ ಇಲಿಗೆ ಪೂಜೆ ಸಲ್ಲಿಸುವ ಪದ್ಧತಿ ಇಲ್ಲಿ ರೂಢಿಯಲ್ಲಿದೆ. ಹಿಂದೂ- ಮುಸ್ಲಿಂ ಸಮುದಾಯದ ನೇಕಾರ ಕುಟುಂಬಗಳು ಇಲಿಗೆ ಪೂಜೆ ಮಾಡುತ್ತವೆ.

ಭಾಗ್ಯನಗರ ಪಟ್ಟಣದ ನೇಕಾರ ಕುಟುಂಬದ ಜೀವನ ನಿರ್ವಹಣೆಗೆ ನೂಲೇ ಆಧಾರವಾಗಿದೆ. ನೂಲಿನಿಂದ ಸೀರೆಗಳನ್ನು ತಯಾರಿಸುತ್ತಿದ್ದಾರೆ. ಆದರೆ ಇಲಿಗಳು ನೂಲು ಕತ್ತರಿಸಿದರೆ ಸೀರೆ ವ್ಯರ್ಥವಾಗುತ್ತದೆ. ಆದ್ದರಿಂದ ಗಣೇಶನ ವಾಹನ ಇಲಿ ಪೂಜಿಸುವ ಆಚರಣೆ ಮೊದಲಿನಿಂದಲೂ ಬಂದಿದೆ. ಪೂಜೆ ಮಾಡಿದರೆ ಇಲಿಗಳು ನೂಲು ತಿನ್ನುವುದಿಲ್ಲ ಎಂಬ ನಂಬಿಕೆ ಇದೆ.

ಇಲಿ ಪೂಜೆಗಾಗಿ ಕಡಬು, ಬದನೆಕಾಯಿ ಪಲ್ಲೆ, ಸೊಂಡಿಗೆ, ಹಪ್ಪಳ, ಅನ್ನ, ಸಾಂಬಾರು ತಯಾರಿಸಿ ನೈವೇದ್ಯ ಮಾಡಲಾಗುತ್ತದೆ. ಮಣ್ಣಿನಿಂದ ತಯಾರಿಸಿದ ಇಲಿ ಇಟ್ಟು ಪೂಜೆ ಮಾಡಿ, ಕಾಯಿ ಒಡೆದು ಕರ್ಪೂರ ಹಾಗೂ ಊದುಬತ್ತಿ ಬೆಳಗುತ್ತಾರೆ.