ಡಿಸಿಎಂ ಸ್ಥಾನ ನಾನು ಕೇಳಿಲ್ಲ, ಜನರ ಅಭಿಪ್ರಾಯ ಅಷ್ಟೇ: ಶ್ರೀರಾಮುಲು

ಕೊಪ್ಪಳ: ನನಗೆ ಉಪಮುಖ್ಯಮಂತ್ರಿ ಆಗಬೇಕು ಎನ್ನುವ ಆಸೆ ಇಲ್ಲ. ನಾನು ಡಿ.ಸಿ.ಎಂ ಆಗಬೇಕೆಂದು ಎಲ್ಲಿಯೂ ಹೇಳಿಲ್ಲ. ಜನರ ಅಭಿಪ್ರಾಯ ಇತ್ತು, ಅದನ್ನೇ ಹೇಳಿದ್ದೇನೆ ಎಂದು ಸಚಿವ ಬಿ ಶ್ರೀರಾಮುಲು ತಿಳಿಸಿದ್ದಾರೆ.

ನಗರದ ಜಿಲ್ಲಾಸ್ಪತ್ರೆಯ ಬಳಿ ಸುದ್ದಿಗಾರರೊಂದಿಗೆ ಮಾತನಾಡಿದರು. ಉಪ ಮುಖ್ಯಮಂತ್ರಿ ಸ್ಥಾನ ನೀಡುವ ವಿಚಾರಕ್ಕೆ ನಾನು ಎಲ್ಲೂ ಕೇಳಿಕೊಂಡಿಲ್ಲ ಎಂದು ಆರೋಗ್ಯ ಸಚಿವ ಶ್ರೀರಾಮುಲು ಹೇಳಿದರು.

ಬಿಜೆಪಿಯಲ್ಲಿ ಮುಖ್ಯಮಂತ್ರಿ ಯಾರಾಗಬೇಕು, ಉಪ ಮುಖ್ಯಮಂತ್ರಿ ಯಾರು ಆಗಬೇಕು ಎನ್ನುವುದನ್ನು ಪಕ್ಷ ತೀರ್ಮಾನ ಪಕ್ಷ ಮಾಡುತ್ತದೆ. ಈ ಕುರಿತು ನಾನು ಏನನ್ನು ಮಾತನಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.

ನಾನು ಯಾವುದನ್ನು ಹುಡಕಿಕೊಂಡು ಹೋಗಿಲ್ಲ. ದೇವರು ಕೊಟ್ಟಿದ್ದು ಪಂಚಾಮೃತ. ದೇವರು ಯಾವತ್ತೊ ಒಂದು ದಿನ ಕೊಡಬಹುದು. ನಮ್ಮ ಸಮುದಾಯದಲ್ಲಿ ಡಿ.ಸಿ.ಎಂ ಸ್ಥಾನ ಸಿಗಬೇಕೆಂಬ ಆಸೆ ಇದೆ. ಆದರೆ ನನಗೆ ಪಾರ್ಟಿ ಮುಖ್ಯ ಎಂದು ಶ್ರೀರಾಮುಲು ತಿಳಿಸಿದರು.

ಇದೀಗ ಬೆಳಗಾವಿ - ಮೈಸೂರು ಜಿಲ್ಲೆಗಳಲ್ಲೂ ಪ್ರತ್ಯೇಕ ಜಿಲ್ಲೆ ಕೂಗು ಕೇಳಿಬಂದಿದೆ. ಮಾಜಿ - ಶಾಸಕರು ಮುಖ್ಯಮಂತ್ರಿಗಳು ಚರ್ಚೆ ಮಾಡಿ ತೀರ್ಮಾನ ತೆಗೆದುಕೊಳ್ಳಲಿದ್ದಾರೆ. ಮುಂಬರುವ ಉಪ ಚುನಾವಣೆಯಲ್ಲಿ 15 ಸ್ಥಾನಕ್ಕೆ 15 ನಾವು ಗೆಲ್ಲುತ್ತೇವೆ ಶ್ರೀರಾಮುಲು ತಿಳಿಸಿದರು.