ಹೃದಯಾಘಾತ ನಂತರ ಬಸ್ ನಿಲ್ಲಿಸಿ ಪ್ರಯಾಣಿಕರ ರಕ್ಷಿಸಿದ ಚಾಲಕ

ಕೊಪ್ಪಳ: ತಾಲೂಕಿನ ಕಿಡದಾಳ ಬಳಿ ಗುರುವಾರ, ಸಾರಿಗೆ ಸಂಸ್ಥೆಯ ಬಸ್ ಚಾಲಕರೊಬ್ಬರು, ಹೃದಯಾಘಾತವಾದ ತಕ್ಷಣ ಬಸ್ ನಿಲ್ಲಿಸಿ, 34 ಪ್ರಯಾಣಿಕರನ್ನು ಅಪಾಯದಿಂದ ರಕ್ಷಿಸಿದ್ದಾರೆ.

ಬಸ್ ಚಾಲಕ ಅಣ್ಣಿಗೇರಿಯ ಶಿವಪ್ಪ ಹಿರೇಕೊಪ್ಪ ಅವರು ಹೃದಯಾಘಾತಕ್ಕೆ ಒಳಗಾದವರು. ಹುಬ್ಬಳ್ಳಿ ಸಾರಿಗೆ ಘಟಕ 1ನೇ ಡಿಪೋದ ಬಸ್, ಹೈದರಾಬಾದ್‌ದಿಂದ ಹುಬ್ಬಳ್ಳಿಗೆ ಹೊರಟಿತ್ತು. ಕೊಪ್ಪಳ ಇನ್ನೂ 4 ಕಿ.ಮೀ. ಅಂತರದಲ್ಲಿದ್ದಾಗ ಶಿವಪ್ಪ ಅವರಿಗೆ ಹೃದಯಾಘಾತವಾಗಿದೆ. ಬಸ್ ನಿಲ್ಲಿಸಿ, ಕೆಳಗಿಳಿದ ಅವರನ್ನು ಅದೇ ರಸ್ತೆಯಲ್ಲಿ ಬಂದ ಕಾರಿನಲ್ಲಿ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಯಿತು. ‘‘ತನ್ನ ಜೀವ ಲೆಕ್ಕಿಸದೇ ಚಾಲಕ ನಮ್ಮೆಲ್ಲರ ಪ್ರಾಣ ಉಳಿಸಿದ್ದಾರೆ. ಅವರು ಶೀಘ್ರ ಗುಣಮುಖರಾಗಲಿ’’ ಎಂದು ಪ್ರಯಾಣಿಕರು ಹಾರೈಸಿದ್ದಾರೆ.