ಬಿಸಿಲ ಧಗೆ : ಗಿಡದ ನೆರಳೇ ಆಸರೆ

ಅಳವಂಡಿ : ದಿನದಿಂದ ದಿನಕ್ಕೆ ಬಿಸಿಲ ಧೆಗೆ ಹೆಚ್ಚುತ್ತಿದ್ದು, ಗ್ರಾಮೀಣ ಪ್ರದೇಶದ ಜನರು ಮನೆಯ ಅಕ್ಕಪಕ್ಕದ ಗಿಡದ ನೆರಳಿನ ಆಸರೆ ಪಡೆಯುತ್ತಿದ್ದಾರೆ.

ದಿನವೂ 40 ಡಿಗ್ರಿಗೂ ಹೆಚ್ಚು ಉಷ್ಣಾಂಶ ದಾಖಲಾಗುತ್ತಿದ್ದು, ಮನೆಯಲ್ಲಿ ಫ್ಯಾನಿಲ್ಲದೇ ಕುಳಿತುಕೊಳ್ಳುವುದು ಕಷ್ಟಸಾಧ್ಯವಾಗಿದೆ. ಅನಿಯಮಿತ ಲೋಡ್‌ಶೆಡ್ಡಿಂಗ್‌ನಿಂದ ವಿದ್ಯುತ್‌ ಹೊಯ್ದಾಟ ಹೆಚ್ಚಿದ್ದರಿಂದ ಜನರು ಗಿಡ-ಮರಗಳನ್ನು ಹುಡುಕಿಕೊಂಡು ಬರುತ್ತಿದ್ದಾರೆ. ಸಮೀಪದ ಕವಲೂರು, ಗುಡಗೇರಿ, ಬೆಳಗಟ್ಟಿ, ಹಟ್ಟಿ, ಭೈರಾಪುರ, ಘಟ್ಟಿರೆಡ್ಡಿಹಾಳ, ಬೋಚನಹಳ್ಳಿ, ಕಂಪ್ಲಿ ಮುಂತಾದ ಗ್ರಾಮಗಳಲ್ಲಿ ಬಿಸಿಲಿನ ತಾಪದಿಂದ ತಪ್ಪಿಸಿಕೊಳ್ಳಲು ಬೇವಿನಮರ, ಆಲದಮರ ಸೇರಿದಂತೆ ಇನ್ನಿತರೆ ಮರಗಿಡಗಳ ಕೆಳಗೆ ಸಂಜೆವರೆಗೂ ಜನನಿಬಿಡತೆ ಕಂಡುಬರುತ್ತಿದೆ. ಬಿಸಿಲಿನ ತಾಪದಿಂದ ಮಕ್ಕಳು, ವೃದ್ಧರು ಅನಾರೋಗ್ಯ ಸಮಸ್ಯೆ ಎದುರಿಸುತ್ತಿದ್ದಾರೆ. ಈ ನಡುವೆ ಕುಡಿವ ನೀರಿನ ಅಭಾವವೂ ಜನಸಾಮಾನ್ಯರನ್ನು ಕಾಡುತ್ತಿದೆ.