ಟ್ರ್ಯಾಕ್ಟರ್‌ಗಳೊಂದಿಗೆ ಕೂಲಿಕಾರರ ಮುತ್ತಿಗೆ

ಕುಷ್ಟಗಿ ; ನರೇಗಾ ಯೋಜನೆಯಡಿ ನಿಡಶೇಸಿ ಕೆರೆ ಹೂಳೆತ್ತುವ ಕಾಮಗಾರಿಗೆ ಎನ್‌ಎಂಆರ್‌ ನೀಡುವಂತೆ ಒತ್ತಾಯಿಸಿ ತಾಲೂಕಿನ ತಳವಗೇರಾ ಗ್ರಾಮದ ಕೂಲಿಕಾರರು 21 ಟ್ರ್ಯಾಕ್ಟರ್‌ಗಳೊಂದಿಗೆ ತಾ.ಪಂ.ಕಚೇರಿಗೆ ಮುತ್ತಿಗೆ ಹಾಕಿದ ಘಟನೆ ಶನಿವಾರ ನಡೆಯಿತು.

ಗ್ರಾಮದ ಅಂದಾಜು 500ಕ್ಕೂ ಹೆಚ್ಚು ಕೂಲಿಕಾರರು ನರೇಗಾ ಯೋಜನೆಯಡಿ ಉದ್ಯೋಗ ಬಯಸಿ ಗ್ರಾ.ಪಂ.ಗೆ ಅರ್ಜಿ ಸಲ್ಲಿಸಿದ್ದರು. 23 ಎನ್‌ಎಂಆರ್‌ಗಳನ್ನು ನೀಡಲಾಗಿತ್ತು. ಇನ್ನೂ 1 ಎನ್‌ಎಂಆರ್‌ನ್ನು ನೀಡಿರಲಿಲ್ಲ. ಅರ್ಜಿ ಸಲ್ಲಿಸಿದ ಎಲ್ಲರಿಗೂ ಎನ್‌ಎಂಆರ್‌ ದೊರೆಯಬೇಕು ಎಂದು ಟ್ಯಾಕ್ಟರ್‌ಗಳೊಂದಿಗೆ ತಾ.ಪಂ.ಯ ಸಾಮರ್ಥ್ಯ‌ಸೌಧದ ಆವರಣದಲ್ಲಿ ಪ್ರತಿಭಟನೆ ನಡೆಸಿದರು. ಸಂಬಂಧಿಸಿದ ನರೇಗಾ ಎಂಜನಿಯರ್‌ ಎನ್‌ಎಂಆರ್‌ನ್ನು ನೀಡುವ ಭರವಸೆ ನೀಡಿದರು. ಎನ್‌ಎಂಆರ್‌ನ್ನು ಪ್ರಿಂಟ್‌ ತೆಗೆದು ಕೆಲಸ ನಡೆಯುವ ಸ್ಥಳ ನಿಡಶೇಸಿ ಕೆರೆಗೆ ಬಂದು ನೀಡಲಾಗುವುದು ಎಂದರು. ತಾ.ಪಂ.ಹಿಂಭಾಗದ ಆವರಣವಿಡೀ ಟ್ರ್ಯಾಕ್ಟರ್‌ಗಳಿಂದ ತುಂಬಿತ್ತು. ನರೇಗಾ ಕಾಮಗಾರಿಗೆ ಬಳಕೆ ಮಾಡಿರುವ ಟ್ರ್ಯಾಕ್ಟರ್‌ಗಳ ಬಾಡಿಗೆಯನ್ನೂ ನೀಡುವಂತೆ ಒತ್ತಾಯಿಸಲಾಯಿತು. ತಾ.ಪಂ.ಇಒ ಕಚೇರಿಯಲ್ಲಿ ಇರಲಿಲ್ಲ. ಸಹಾಯಕ ನಿರ್ದೇಶಕ ಅರುಣಕುಮಾರ ಮತ್ತು ಸಿಬ್ಬಂದಿ ಕೂಲಿಕಾರರೊಂದಿಗೆ ಮಾತುಕತೆ ನಡೆಸಿ ಇತ್ಯರ್ಥಗೊಳಿಸಿದರು.