ಲಾಕ್‌ಡೌನ್‌ ಎಫೆಕ್ಟ್‌: ಕೊಪ್ಪಳದಲ್ಲಿ ಎಣ್ಣೆ ಸಿಗದೇ ಬಾರ್‌ಗೆ ಕನ್ನ ಹಾಕಿದ ಕುಡುಕರು

ಕೊಪ್ಪಳ: ಲಾಕ್‌ಡೌನ್‌ ಹಿನ್ನೆಲೆ ಸರಕಾರ ಮದ್ಯ ನಿಷೇಧಿಸಿರುವುದರಿಂದ ಪಾನಪ್ರಿಯರಿಗೆ ಕೈಕಟ್ಟಿ ಹಾಕಿದಂತಾಗಿದ್ದು, ಎಣ್ಣೆಗಾಗಿ ಸರ್ಕಸ್‌ ಮಾಡುವಂತಾಗಿದೆ. ಇದರಿಂದ ಮದ್ಯಕ್ಕಾಗಿ ಬಾರ್‌ಗೆ ಕನ್ನ ಹಾಕುವ ಪ್ರಕರಣಗಳು ಹೆಚ್ಚುತ್ತಿದ್ದು, ಇಂಥದ್ದೇ ಒಂದು ಘಟನೆ ಕೊಪ್ಪಳದಲ್ಲೂ ನಡೆದಿದೆ.

ನಗರದ ಎಪಿಎಂಸಿ ಮಾರುಕಟ್ಟೆ ಎದುರುಗಡೆಯಿರುವ ಬಾರ್ ಹಿಂಬಾಗಿಲು ಮುರಿದು ಮದ್ಯದ ಬಾಟಲಿಗಳನ್ನು ಕಳ್ಳತನ ಮಾಡಲಾಗಿದೆ. ಬಾರ್‌ ಹಿಂಬದಿಯಿರುವ ಕಟ್ಟಿಗೆಯ ಬಾಗಿಲಿಗೆ ಬೆಂಕಿ ಹಚ್ಚಿರುವ ಖದೀಮರು, ಬಾಗಿಲು ಸುಟ್ಟ ಬಳಿಕ, ಕಿಂಡಿ ಮಾಡಿ ಒಳ ನುಗ್ಗಿ 8 ಪಿಎಂ, ಕಿಂಗ್‌ಫಿಶರ್ ಸ್ಟೋರ್ಮ್ ಸೇರಿ ಸಾವಿರಾರು ರೂ. ಮೌಲ್ಯದ ಮದ್ಯ ಕದ್ದು ಪರಾರಿಯಾಗಿದ್ದಾರೆ.

ಲಾಕ್‌ಡೌನ್‌ ಹಿನ್ನೆಲೆ ಮದ್ಯ ಸಿಗದಿದ್ದರಿಂದ ಕಳ್ಳತನ ಮಾಡಿರುವ ಶಂಕೆ ವ್ಯಕ್ತವಾಗಿದ್ದು, ಸುಮಾರು 50 ಸಾವಿರ ರೂ. ಮೌಲ್ಯದ ಮದ್ಯ ಕಳ್ಳತನವಾಗಿದೆ ಎನ್ನಲಾಗಿದೆ.. ಸ್ಥಳಕ್ಕೆ ನಗರ ಠಾಣೆ ಪೊಲೀಸರು ಹಾಗೂ ಅಬಕಾರಿ ಇಲಾಖೆ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ತುಂಗಭದ್ರಾ ಅಚ್ಚುಕಟ್ಟು ರೈತರಿಗೆ ಸ್ವಲ್ಪ ರಿಲೀಫ್‌, ಎಡದಂಡೆ ಕಾಲುವೆಗೆ ಏ.15ರವರೆಗೆ ನೀರು