ಟಾಪ್ ರ‌್ಯಾಂಕ್‌ಗೆ ಮತ್ತೆ ಪ್ರಯತ್ನ

ಗಂಗಾವತಿ : ಯುಪಿಎಸ್‌ಸಿ ಪರೀಕ್ಷೆಯಲ್ಲಿ ಮೊದಲ ಬಾರಿ 402ನೇ ರ‌್ಯಾಂಕ್. ಎರಡನೇ ಬಾರಿ 294ನೇ ರ‌್ಯಾಂಕ್. ಆದರೂ ಟಾಪ್ ರ‌್ಯಾಂಕ್ ಗಳಿಸುವ ಛಲ ಹೊಂದಿರುವ ಗಂಗಾವತಿಯ ಎಚ್.ವಿನೋದ್ ಪಾಟೀಲ್ ಮತ್ತೊಮ್ಮೆ ಪರೀಕ್ಷೆ ಎದುರಿಸುವ ಉಮೇದಿಯಲ್ಲಿದ್ದಾರೆ.

ನಗರದ ಅಕ್ಕಮಹಾದೇವಿ ಹಾಗೂ ದಿ.ಮಲ್ಲಿಕಾರ್ಜುನ ಗೌಡ ಅವರ ಪುತ್ರರಾಗಿರುವ ಅವರು, ಬೆಂಗಳೂರಿನ ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತ 2016ನೇ ಸಾಲಿನಲ್ಲಿ ಯುಪಿಎಸ್‌ಸಿ ಪರೀಕ್ಷೆಯಲ್ಲಿ 402ನೇ ರ‌್ಯಾಂಕ್ ಪಡೆದರು. ಅವರಿಗೆ ಜಿಎಸ್‌ಟಿ ಕಂಟ್ರೋಲ್ ಎಕ್ಸೆಲ್, ನಾರ್ಕೋಟಿಕ್ಸ್ (ಡ್ರಗ್ಸ್) ಸೇವೆಗೆ ಬಂದ ಆದೇಶ ಪತ್ರ ತಿರಸ್ಕರಿಸಿದರು. 2017ನೇ ಸಾಲಿನ ಪರೀಕ್ಷೆಯಲ್ಲಿ 294ನೇ ರ‌್ಯಾಂಕ್ ಪಡೆದಿದ್ದು, ಐಆರ್‌ಎಸ್(ಇಂಡಿಯನ್ ರೈಲ್ವೆ ಸರ್ವಿಸ್) ಮತ್ತು ತೆರಿಗೆ ಇಲಾಖೆ ವಿಭಾಗದ ಸೇವೆ ದೊರಕಿದೆ. ಆದರೂ ಈ ಹುದ್ದೆಯ ತರಬೇತಿಗೆ ತೆರಳಲು ಅವರಿಗೆ ಮನಸ್ಸಿಲ್ಲ.

‘‘ಐಎಎಸ್ ಟಾಪರ್ ಆಗಬೇಕೆಂಬ ಹೆಬ್ಬಯಕೆಯಿದೆ. ಮನೆಯಲ್ಲಿ ಇಷ್ಟೇ ಸಾಕು, ಬಂದಿರುವ ನೌಕರಿ ಬಿಡಬೇಡ ಎಂದು ಹೇಳುತ್ತಾರೆ. ಆದರೂ ನನಗೆ ಆತ್ಮವಿಶ್ವಾಸವಿದೆ. ಮುಂದಿನ ಪರೀಕ್ಷೆಯಲ್ಲಿ ಉತ್ತಮ ರ‌್ಯಾಂಕ್ ಪಡೆಯುವೆ’’ ಎನ್ನುತ್ತಾರೆ ಎಚ್.ವಿನೋದ್ ಪಾಟೀಲ್.