ಮನೆಗೆಲಸಕ್ಕೆ ಎಸ್ಪಿಯಿಂದ 18 ಪೊಲೀಸ್ ಪೇದೆ ಬಳಕೆ: ವಿಡಿಯೋ ವೈರಲ್

ಮಂಡ್ಯ: ಅಧಿಕಾರ ದರ್ಪ, ಕರ್ತವ್ಯದ ದುರುಪಯೋಗಕ್ಕೆ ತಾಜಾ ನಿದರ್ಶನವಿದು. ಪೊಲೀಸ್ ಅಧಿಕಾರಿಗಳ ಮನೆಯಲ್ಲಿ ಪೊಲೀಸ್ ಸಿಬ್ಬಂದಿ ಕೆಲಸ ಮಾಡುವ ಆರ್ಡಲಿ ವ್ಯವಸ್ಥೆ ಸಂಪೂರ್ಣವಾಗಿ ರದ್ದುಗೊಂಡು ಒಂದುವರೆ ವರ್ಷವಾಗಿದ್ದರೂ, ಮಂಡ್ಯ ಪೊಲೀಸ್ ಅಧೀಕ್ಷಕರಾದ ಜಿ. ರಾಧಿಕಾ ಪೊಲೀಸ್ ಪೇದೆಗಳನ್ನು ತಮ್ಮ ಮನೆಗೆಲಸಕ್ಕೆ ಬಳಸಿಕೊಳ್ಳುತ್ತಿರುವ ಆರೋಪ ಕೇಳಿ ಬಂದಿದೆ.

ಎಸ್ಪಿ ಅವರ ಸರಕಾರಿ ಬಂಗಲೆಯಲ್ಲಿ 18 ಪೇದೆಗಳನ್ನು ಬಟ್ಟೆ ತೊಳೆಯುವ, ಗಾರ್ಡನ್ ಕೆಲಸ ಸೇರಿದಂತೆ ಮನೆಗೆಲಸಕ್ಕೆ ಬಳಸಿಕೊಳ್ಳುತ್ತಿರುವುದು ಬೆಳಕಿಗೆ ಬಂದಿದೆ. ಈ ಕುರಿತ ವಿಡಿಯೋವೊಂದು ವೈರಲ್ ಆಗಿದ್ದು, ಪೇದೆಗಳು ಎಸ್ಪಿ ಮನೆಯಲ್ಲಿ ಕೆಲಸ ಮಾಡುತ್ತಿರುವುದು ಅದರಲ್ಲಿ ಸ್ಪಷ್ಟವಾಗಿ ಗೋಚರಿಸುತ್ತದೆ.

ತಮ್ಮ ಮೇಲಿನ ಆರೋಪವನ್ನು ನಿರಾಕರಿಸಿರುವ ಎಸ್ಪಿ, ಹಿರಿಯ ಅಧಿಕಾರಿಯ ಮನೆಯಲ್ಲಿ ಯಾವ ಕೆಲಸಕ್ಕಾಗಿ ನಿಯೋಜನೆಯಾಗಿರುತ್ತಾರೋ ಆ ಕೆಲಸವನ್ನಷ್ಟೇ ಅವರು ಮಾಡುತ್ತಿರುವುದು. ಅವರಿಂದ ನನ್ನ ಮನೆಗೆಲಸವಾಗಲಿ, ವೈಯಕ್ತಿಕ ಕೆಲಸವನ್ನಾಗಲಿ ಮಾಡಿಸಿಕೊಳ್ಳುತ್ತಿಲ್ಲ. ಯಾರೋ ತಪ್ಪು ಮಾಹಿತಿ ನೀಡಿ ಗೊಂದಲ ಸೃಷ್ಟಿಸಿದ್ದಾರೆ ಎಂದಿದ್ದಾರೆ.


ಹಿಂದಿನ ಸಿದ್ದರಾಮಯ್ಯ ಸರ್ಕಾರ 2016 ರಲ್ಲಿ ವಸಾಹತುಶಾಹಿ ಬ್ರಿಟಿಷ್ ಯುಗದ ಪರಂಪರೆಯಾಗಿದ್ದ ಆರ್ಡಲಿ ವ್ಯವಸ್ಥೆಯನ್ನು ಕೈಬಿಟ್ಟಿತ್ತು. ರದ್ದಿಗೂ ಮುನ್ನ ರಾಜ್ಯದಲ್ಲಿ ಸುಮಾರು 3,000 ಕ್ಕಿಂತ ಹೆಚ್ಚು ಸಿಬ್ಬಂದಿಗಳು ಆರ್ಡಲಿ ಸೇವೆಯಲ್ಲಿದ್ದರು.


ಎಸ್ಪಿ ಹುದ್ದೆಯಲಿರುವವರು ಸಹಾಯಕ್ಕಾಗಿ ಮೂವರು ಪೊಲೀಸ್ ಸಿಬ್ಬಂದಿಯನ್ನಿಟ್ಟುತೊಳ್ಳಬಹುದು. ಎಸ್ಪಿ ರಾಧಿಕಾ ವಿಸ್ತಾರವಾದ ಕೈ ತೋಟವಿರುವ ಬ್ರಿಟಷ್ ಕಾಲದ ಬಂಗಲೆಯಲ್ಲಿ ವಾಸವಿದ್ದಾರೆ. ಕೈ ತೋಟದ ಕೆಲಸಕ್ಕೆ ಮಾಲಿ ಸೇರಿದಂತೆ ಇತರ ಕೆಲಸಗಳಿಗೆ ಸರಕಾರವೇ ಕೆಲಸಗಾರರನ್ನು ನೇಮಿಸುತ್ತದೆ. ಡಜನ್‌ಗಿಂತ ಹೆಚ್ಚು ಆರ್ಡಲಿಗಳನ್ನು ಹೊಂದಿರುವುದು ಸತ್ಯಕ್ಕೆ ದೂರವಾದ ಮಾತು- ಹಿರಿಯ ಪೊಲೀಸ್ ಅಧಿಕಾರಿ