82 ಸಾವಿರ ಕ್ಯೂಸೆಕ್‌ ದಾಟಿದ ಕೆಆರ್‌ಎಸ್‌ ಹೊರ ಹರಿವು

ಮಂಡ್ಯ: ಒಳ ಹರಿವಿನ ಪ್ರಮಾಣ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಕೆಆರ್‌ಎಸ್‌ ಜಲಾಶಯದ ಹೊರ ಹರಿವಿನ ಪ್ರಮಾಣ 82 ಸಾವಿರ ಕ್ಯೂಸೆಕ್‌ ದಾಟಿದೆ. ಕಳೆದ ನಾಲ್ಕು ವರ್ಷಗಳ ಅವಧಿಯಲ್ಲಿ ಇದು ಅತ್ಯಧಿಕ ಹೊರ ಹರಿವಿನ ಪ್ರಮಾಣವಾಗಿದೆ.

ಗರಿಷ್ಠ 124.80 ಅಡಿಯ ಜಲಾಶಯದಲ್ಲಿ ಮಂಗಳವಾರ ಸಂಜೆ 122.15 ಅಡಿಯಿತ್ತು. ಕಳೆದ ನಾಲ್ಕು ದಿನಗಳಿಂದ ಹೊರ ಹರಿವಿನ ಪ್ರಮಾಣ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಜಲಾಶಯದ ನೀರಿನ ಮಟ್ಟವು ಜು.14ರಂದು 123.65 ಅಡಿ ನೀರಿತ್ತು. ಆದೀಗ ಒಂದೂವರೆ ಅಡಿಯಷ್ಟು ಕುಸಿದಿದೆ. ಜು.20ರಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಅವರು ಕನ್ನಂಬಾಡಿಕಟ್ಟೆಯಲ್ಲಿ ಕಾವೇರಿ ಮಾತೆಗೆ ಬಾಗಿನ ಸಲ್ಲಿಸಲಿದ್ದಾರೆ.

ಈ ಹಿನ್ನಲೆಯಲ್ಲಿ ಜು.20ರ ವೇಳೆಗೆ ಜಲಾಶಯ ಪೂರ್ಣ ಪ್ರಮಾಣದಲ್ಲಿ ತುಂಬುವಂತೆ ನೋಡಿಕೊಳ್ಳುವ ಸಲುವಾಗಿ ಹೊರ ಹರಿವಿನ ಪ್ರಮಾಣವನ್ನು ಹೆಚ್ಚಿಸಿದ್ದು, ಜು.19ರಂದು ಹೊರ ಹರಿವಿನ ಪ್ರಮಾಣವನ್ನು ತಗ್ಗಿಸುವ ಸಾಧ್ಯತೆಯಿದೆ. ಸದ್ಯಕ್ಕೆ ಜಲಾಶಯಕ್ಕೆ 72,434 ಕ್ಯೂಸೆಕ್‌ ಒಳ ಹರಿವಿದ್ದು, ನದಿಗೆ 79,418 ಕ್ಯೂಸೆಕ್‌ ಹಾಗೂ ನಾಲೆಗೆ 2611 ಕ್ಯೂಸೆಕ್‌ ಸೇರಿದಂತೆ 82,029 ಕ್ಯೂಸೆಕ್‌ ಹೊರ ಹರಿವು ದಾಖಲಾಗಿದೆ.

ಸ್ಟ್ಯಾಂಡರ್ಡ್‌ ಗೇಜ್‌ನ ಮಾಹಿತಿ ಪ್ರಕಾರ ಕಾವೇರಿ ನದಿಯಿಂದ 48,616 ಕ್ಯೂಸೆಕ್‌, ಹೇಮಾವತಿ ನದಿಯಿಂದ 28,440 ಕ್ಯೂಸೆಕ್‌, ಲಕ್ಷ್ಮಣತೀರ್ಥ ನದಿಯಿಂದ 6779 ಕ್ಯೂಸೆಕ್‌ ಸೇರಿದಂತೆ ಒಟ್ಟು 83,835 ಕ್ಯೂಸೆಕ್‌ ನೀರು ಕನ್ನಂಬಾಡಿಕಟ್ಟೆಯತ್ತ ಹರಿದು ಬರುತ್ತಿದೆ. 49.452 ಟಿಎಂಸಿ ನೀರು ಸಂಗ್ರಹ ಸಾಮರ್ಥ್ಯ‌ವಿರುವ ಜಲಾಶಯದಲ್ಲಿ ಪ್ರಸ್ತುತ 45.832 ಟಿಎಂಸಿ ನೀರು ಸಂಗ್ರಹವಾಗಿದ್ದು, ಇದರಲ್ಲಿ 37.453 ಟಿಎಂಸಿ ನೀರು ಕೃಷಿ ಬಳಕೆಗೆ ಲಭ್ಯವಿದೆ. ಕಳೆದ ವರ್ಷ ಇದೇ ದಿನದಂದು 1786 ಕ್ಯೂಸೆಕ್‌ ಒಳ ಹರಿವು, 2115 ಕ್ಯೂಸೆಕ್‌ ಹೊರ ಹರಿವು ಸೇರಿದಂತೆ ಅಣೆಕಟ್ಟೆಯ ನೀರಿನ ಮಟ್ಟವು 78.17 ಅಡಿಯಿತ್ತು.