96 ಅಡಿ ದಾಟಿದ ಕೆಆರ್‌ಎಸ್‌

ಮಂಡ್ಯ: ಜಿಲ್ಲೆಯ ಜೀವನಾಡಿ ಕೆಆರ್‌ಎಸ್‌ ಜಲಾಶಯದ ನೀರಿನ ಮಟ್ಟ 96 ಅಡಿ ದಾಟಿದೆ. ಪ್ರಸ್ತುತ ಜಲಾಶಯಕ್ಕೆ 32,555 ಕ್ಯೂಸೆಕ್‌ ನೀರಿನ ಒಳ ಹರಿವು ದಾಖಲಾಗಿದೆ. ಕೇವಲ ಐದು ದಿನಗಳ ಅಂತರದಲ್ಲಿ ಜಲಾಶಯದ ನೀರಿನ ಮಟ್ಟವು 17.9 ಅಡಿಯಷ್ಟು ಹೆಚ್ಚಾಗಿದೆ.

ಜೂ.10ರಂದು 78.50 ಅಡಿ ಜಲಾಶಯದ ನೀರಿನ ಮಟ್ಟ ಶುಕ್ರವಾರ ಸಂಜೆ 96.40 ಅಡಿ ತಲುಪಿತ್ತು. ಶುಕ್ರವಾರ ಬೆಳಗ್ಗೆ 94.50 ಅಡಿಯೊಂದಿಗೆ 28,096 ಕ್ಯೂಸೆಕ್‌ ಒಳ ಹರಿವು, 416 ಕ್ಯೂಸೆಕ್‌ ಹೊರ ಹರಿವಿತ್ತು. ಸಂಜೆ 6ರ ವೇಳೆಗೆ ಒಳ ಹರಿವು ಇನ್ನೂ 4000 ಕ್ಯೂಸೆಕ್‌ ಹೆಚ್ಚಾಗಿತ್ತು. ಹೊರ ಹರಿವಿನ ಪ್ರಮಾಣವೂ 438 ಕ್ಯೂಸೆಕ್‌ಗೆ ಏರಿಕೆಯಾಗಿದೆ.

ಕಳೆದೊಂದು ವಾರದಿಂದ ಕಾವೇರಿ ಕಣಿವೆ ಪ್ರದೇಶದಲ್ಲಿ ವ್ಯಾಪಕ ಮಳೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಜಲಾಶಯಕ್ಕೆ ನಿರೀಕ್ಷೆಗೂ ಮೀರಿದ ಪ್ರಮಾಣದಲ್ಲಿ ನೀರು ಹರಿದು ಬರುತ್ತಿದೆ. ಪ್ರಸ್ತುತ ಸ್ಟ್ಯಾಂಡರ್ಡ್‌ ಗೇಜ್‌ ಪ್ರಕಾರ ಕಾವೇರಿ ನದಿ ಮೂಲಕ 27,851 ಕ್ಯೂಸೆಕ್‌, ಹೇಮಾವತಿ ನದಿಯಿಂದ 1215 ಕ್ಯೂಸೆಕ್‌ ಹಾಗೂ ಲಕ್ಷ್ಮಣತೀರ್ಥ ನದಿಯಿಂದ 9952 ಕ್ಯೂಸೆಕ್‌ ಸೇರಿದಂತೆ 39,018 ಕ್ಯೂಸೆಕ್‌ ನೀರು ಜಲಾಶಯದತ್ತ ಹರಿದು ಬರುತ್ತಿದೆ.

ಕೊಡಗು ಭಾಗದಲ್ಲಿ ಮಳೆ ಪ್ರಮಾಣ ಗುರುವಾರದಿಂದ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ಒಳ ಹರಿವಿನ ಪ್ರಮಾಣವೂ ಜೂ.16ರಿಂದ ಕಡಿಮೆಯಾಗುವ ಸಾಧ್ಯತೆಯಿದೆ. ಶುಕ್ರವಾರ ಬೆಳಗ್ಗೆ ಕಾವೇರಿ ನದಿ ಮೂಲಕ 29715 ಕ್ಯೂಸೆಕ್‌ ನೀರು ಹರಿದು ಬರುತ್ತಿತ್ತು. ಈ ಪ್ರಮಾಣ ಸಂಜೆ ವೇಳೆಗೆ 27,851 ಕ್ಯೂಸೆಕ್‌ಗೆ ಕ್ಷೀಣಿಸಿದೆ.