ನಾನು ಮಳವಳ್ಳಿ ಹುಚ್ಚೇಗೌಡರ ಸೊಸೆ: ಸುಮಲತಾ

ಹಲಗೂರು: ಅಂಬರೀಶ್‌ ಮಳವಳ್ಳಿಯಲ್ಲಿ ಬಾಲ್ಯ ಜೀವನ ಕಳೆದಿದ್ದು, ನಾನು ಮಳವಳ್ಳಿ ಹುಚ್ಚೇಗೌಡರ ಸೊಸೆ. ತಾಲೂಕಿನ ಜನತೆ ನನಗೆ ಅಭೂತಪೂರ್ವ ಸ್ವಾಗತ ನೀಡುವ ಮೂಲಕ ಪ್ರೀತಿ ತೋರಿಸಿದ್ದಾರೆ. ಅಭಿಮಾನಕ್ಕೆ ಧಕ್ಕೆಯಾಗದಂತೆ ನಡೆದುಕೊಂಡು ಜನರ ಸೇವೆ ಮಾಡುವುದಾಗಿ ನಟಿ ಸುಮಲತಾ ಅಂಬರೀಶ್‌ ಹೇಳಿದರು.

ಹಲಗೂರು, ಹಾಡ್ಲಿಗೆ ಭೇಟಿ ನೀಡಿ ಅಭಿಮಾನಿಗಳು ಹಾಗೂ ಸ್ಥಳೀಯ ನಾಯಕರ ಚರ್ಚಿಸಿ ಮಾತನಾಡಿದ ಅವರು, ಅಂಬರೀಶ್‌ ನಮ್ಮನ್ನು ಅಗಲಿದೆ ನಂತರ ಜಿಲ್ಲೆಯ ಜನತೆ ನಿಮ್ಮೊಂದಿಗೆ ನಾವಿದ್ದೇವೆ ಎಂದು ಅತ್ಮಸ್ಥೈರ್ಯ ತುಂಬಿದ್ದಾರೆ. ಈ ಅಭಿಮಾನದ ಋುಣ ತೀರಿಸಲು ನನಗೆ ಅವಕಾಶ ನೀಡಬೇಕು. ಪ್ರಸ್ತುತವಾಗಿ ನನಗೆ ಯಾವ ಪಕ್ಷದ ಬೆಂಬಲವೂ ಇಲ್ಲ. ಜತೆಗೆ ಯಾವ ಹಿರಿಯ ನಾಯಕರ ಬೆಂಬಲವೂ ಇಲ್ಲ, ಆದರೆ ನನಗಿರುವುದು ಅಂಬರೀಶ್‌ ಅಭಿಮಾನಿಗಳು ಹಾಗೂ ಜಿಲ್ಲೆಯ ಜನರ ಅರ್ಶೀವಾದ ಮಾತ್ರ. ನಾನು ಮಂಡ್ಯ ಜಿಲ್ಲೆಯ ಸೊಸೆ ಎಂಬುವುದನ್ನು ಜನ ನಿರೂಪಿಸಬೇಕು ಎಂದರು.

ಅಭಿಮಾನಿಗಳ ಒತ್ತಾಯಕ್ಕಾಗಿ ರಾಜಕೀಯಕ್ಕೆ ಬಂದಿದ್ದೇನೆ. ಇದನ್ನು ಬಿಟ್ಟು ವೈಯಕ್ತಿಕ ಲಾಭಕ್ಕಾಗಿ ಅಲ್ಲ ಎಂದರು. ಅಂಬರೀಶ್‌ ಪುತ್ರ ಅಭಿಷೇಕ್‌, ತಾಪಂ ಅಧ್ಯಕ್ಷ ನಾಗೇಶ್‌, ಮುಖಂಡರಾದ ಪದ್ಮನಾಭ, ಗಂಗಾಧರ್‌, ಕಿಟ್ಟಿ ಇತರರು ಇದ್ದರು.