​ಆಟೋದಲ್ಲೇ ಮಗುವಿಗೆ ಜನ್ಮ!

ಮಂಡ್ಯ: ಹೆರಿಗೆಗಾಗಿ ನಗರದ ಮಿಮ್ಸ್‌ ಬೋಧಕ ಆಸ್ಪತ್ರೆಗೆ ಗುರುವಾರ ಆಗಮಿಸಿದ ತುಂಬು ಗರ್ಭಿಣಿಯೊಬ್ಬರು ವಾರ್ಡ್‌ಗೆ ಹೋಗುವ ಮುನ್ನವೇ ತಾವು ಬಂದ ಆಟೋದಲ್ಲಿಗಂಡು ಮಗುವಿಗೆ ಜನ್ಮ ನೀಡಿದರು.

ರವಿ ಎಂಬುವರ ಪತ್ನಿ ಸವಿತಾ (25) ಅವರನ್ನು ಹೆರಿಗೆಗಾಗಿ ಕುಟುಂಬದವರು ಆಸ್ಪತ್ರೆಗೆ ಬೆಳಗ್ಗೆ ಕರೆತಂದರು. ಆಕೆಯನ್ನು ಆಟೋದಲ್ಲೇ ಕೂರಿಸಿ, ಆಸ್ಪತ್ರೆ ಪ್ರವೇಶ ಚೀಟಿ ಪಡೆಯಲು ಕೌಂಟರ್‌ಗೆ ತೆರಳಿದರು. ಮುಷ್ಕರ ಹಿನ್ನೆಲೆಯಲ್ಲಿರೋಗಿಗಳ ಸಂಖ್ಯೆ ಹೆಚ್ಚಾಗಿದ್ದರಿಂದ ಕೌಂಟರ್‌ ಬಳಿ ಉದ್ದನೆಯ ಸಾಲು ಇತ್ತು. ಹೀಗಾಗಿ ಸರತಿ ಸಾಲಿನಲ್ಲಿನಿಂತು ರವಿ ಚೀಟಿ ಪಡೆಯುವಷ್ಟರಲ್ಲೇ ಸವಿತಾ ಆಟೋದಲ್ಲೇ ಮಗುವಿಗೆ ಜನ್ಮ ನೀಡಿದರು. ತಕ್ಷಣ ನರ್ಸ್‌ಗಳು ಸ್ಟ್ರೆಚರ್‌ ತಂದು ಸವಿತಾ ಹಾಗೂ ಮಗುವನ್ನು ಹೆರಿಗೆ ವಾರ್ಡ್‌ಗೆ ಶಿಫ್ಟ್‌ ಮಾಡಿದರು. ವೈದ್ಯರಾದ ಡಾ.ಸವಿತಾ ಮತ್ತು ಡಾ.ಸಂಜಯ್‌ ಅವರು ತಾಯಿಮಗುವಿಗೆ ತುರ್ತು ಚಿಕಿತ್ಸೆ ನೀಡಿದರು. ಕೆಲ ಹೊತ್ತಿನ ಬಳಿಕ ತಾಯಿಮಗು ಇಬ್ಬರನ್ನೂ ವಾರ್ಡ್‌ಗೆ ವರ್ಗಾಯಿಸಲಾಗಿದ್ದು , ಆರೋಗ್ಯದಿಂದ ಇದ್ದಾರೆ.