ಯೋಧರ ಹನಿ ರಕ್ತಕ್ಕೂ ಕೇಂದ್ರ ಪ್ರತೀಕಾರ ತೆಗೆದುಕೊಳ್ಳಲಿದೆ: ಸದಾನಂದಗೌಡ

ಮಂಡ್ಯ: ಜಮ್ಮು ಕಾಶ್ಮೀರದಲ್ಲಿ ನಡೆದಿರುವ ದಾಳಿ ದೊಡ್ಡ ಮಟ್ಟದ್ದಾಗಿದೆ. ಇದುವರೆಗೂ ಇಂತಹ ದಾಳಿ ನಡೆದಿಲ್ಲ. ಆದರೆ ಕೇಂದ್ರ ಸರಕಾರ ಯೋಧರ ಹನಿ ರಕ್ತಕ್ಕೂ ಪ್ರತೀಕಾರ ತೆಗೆದುಕೊಳ್ಳಲಿದೆ ಎಂದು ಕೇಂದ್ರ ಸಚಿವ ಡಿ.ವಿ.ಸದಾನಂದಗೌಡ ತಿಳಿಸಿದರು.


ಮೃತ ಗುರು ಅವರ ಪತ್ನಿ, ತಮ್ಮಂದಿರಿಗೆ ಸರಕಾರಿ ಕೆಲಸ ನೀಡಬೇಕು. ಅಲ್ಲದೆ ಕೇಂದ್ರ ಸರಕಾರ ಉಗ್ರರ ಧಮನ ಮಾಡಲು ಮುಂದಾಗಬೇಕು ಎಂದು ಸಂಸದೆ ಶೋಭಾ ಕರಂದ್ಲಾಜೆ ಆಗ್ರಹಿಸಿದರು. ಸಂಸದ ಪ್ರತಾಪ್ ಸಿಂಹ ಪಾಲ್ಗೊಂಡು ಸಂತಾಪ ಸೂಚಿಸಿದರು.

ಇದು ಅತ್ಯಂತ ದುಃಖದ ಕ್ಷಣ. ಭಯೋತ್ಪಾದಕ ಚಟುವಟಿಕೆಯಲ್ಲಿ ಹಲವು ಯೋಧರ ದುರ್ಮರಣ, ಹಲವರು ಗಂಭೀರ ಗಾಯವಾಗಿದ್ದಾರೆ. ಯೋಧರ ಆತ್ಮಕ್ಕೆ ಶಾಂತಿ ಸಿಗುವ ರೀತಿಯಲ್ಲಿ ಪ್ರಧಾನಿಯವರು ಗಂಭೀರ ಚಿಂತನೆ ಮಾಡಿದ್ದಾರೆ. ಪ್ರಧಾನಿ ನಿಲುವು ದೇಶದ ಎಲ್ಲರ ನಿಲುವು. ನಾವೆಲ್ಲರೂ ಅವರ ಜೊತೆ ಇರ್ತೀವಿ ಎಂದರು.

ಬಡ ಕುಟುಂಬದಿಂದ ಬಂದವರು ಗುರು. ದೇಶ ಪ್ರೇಮದ ಬಗ್ಗೆ ಗುರು ಕುಟುಂಬದವರಿಂದ ಕಲಿಯಬೇಕು. ಅವರ ಕುಟುಂಬಕ್ಕೆ ನೆರವಾಗುವ ಹೆಜ್ಜೆಯನ್ನ ಪ್ರಧಾನಿ ಇಟ್ಟಿದ್ದಾರೆ. ಇಡೀ ದೇಶದ ಸವಾಲು. ಆ ಸವಾಲನ್ನು ಸ್ವೀಕಾರ ಮಾಡ್ತೇವೆ. ನಾವೆಲ್ಲರೂ ಗುರು ಹೆಸರಲ್ಲಿ ಪ್ರತಿಜ್ಞೆ ಸ್ವೀಕಾರ ಮಾಡಬೇಕಿದೆ ಎಂದು ಸದಾನಂದ ಗೌಡ ತಿಳಿಸಿದರು.

ಸಂಸದೆ ಶೋಭಾ ಕರಂದ್ಲಾಜೆ ಮಾತನಾಡಿ, ಪಾಕಿಸ್ತಾನಕ್ಕೆ ನೇರವಾಗಿ ಯುದ್ಧ ಮಾಡಲು ಆಗಲ್ಲ. ಹೀಗಾಗಿ ಹಣ ಕೊಟ್ಟು ಈ ರೀತಿ ಕೃತ್ಯ ಮಾಡ್ತಿದೆ. ನೇರವಾಗಿ ಉತ್ತರ ಕೊಡುವ ಕಾಲ ಸನಿಹವಾಗಿದೆ. ಸರ್ಜಿಕಲ್ ಸ್ಟ್ರೈಕ್ ಮೂಲಕ ಮತ್ತೆ ತಕ್ಕ ಪಾಠ ಕಲಿಸ್ತೇವೆ ಎಂದರು.

ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದ ಕುಟುಂಬಕ್ಕೆ ಸರಕಾರ ನೆರವಾಗಬೇಕು. ಪಾಕಿಸ್ತಾನ ಮಟ್ಟ ಹಾಕುವ ಶಕ್ತಿ ಭಾರತಕ್ಕಿದೆ. ಪ್ರಪಂಚದ ಎಲ್ಲಾ ದೇಶಗಳು ಭಾರತಕ್ಕೆ ಶಕ್ತಿ ತುಂಬಬೇಕು. ಆಗ ಮಾತ್ರ ಭಯೋತ್ಪಾದನೆ ಕಡಿವಾಣ ಸಾಧ್ಯ ಎಂದು ಶೋಭಾ ಕರಂದ್ಲಾಜೆ ತಿಳಿಸಿದರು.