ದಿಗ್ವಿಜಯ್‌ ಸಿಂಗ್‌ ಹೇಳಿಕೆಗೆ ಯೋಧನ ಪತ್ನಿ ಆಕ್ರೋಶ

ಮಂಡ್ಯ: ಪುಲ್ವಾಮ ಪ್ರಕರಣ ಒಂದು ಆಕ್ಸಿಡೆಂಟ್‌ ಎಂದು ಕಾಂಗ್ರೆಸ್‌ ಮುಖಂಡ ದಿಗ್ವಿಜಯ್‌ ಸಿಂಗ್‌ ನೀಡಿರುವ ಹೇಳಿಕೆಗೆ ವೀರಯೋಧ ಗುರು ಪತ್ನಿ ಕಲಾವತಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

''ಯಾವ ಉದ್ದೇಶದಿಂದ ಆಕ್ಸಿಡೆಂಟ್‌ ಎಂಬ ಪದ ಬಳಸಿದ್ದೀರಿ? ನಿಮ್ಮ ಬಳಿ ದಾಖಲೆ ಇದ್ದರೆ ತೋರಿಸಿ. ಅವರನ್ನು ಕಳೆದುಕೊಂಡಿರುವುದಕ್ಕೆ ಸೈನಿಕರ ಕುಟುಂಬದ ಕಷ್ಟ ನಿಮಗೇನು ಗೊತ್ತು. ನಿಮ್ಮ ಮನೆಯಲ್ಲಿ ಯಾರನ್ನಾದರೂ ಕಳೆದುಕೊಂಡಿದ್ದರೆ ನಿಮಗೆ ಗೊತ್ತಾಗುತ್ತಿತ್ತು'' ಎಂದು ಕಿಡಿ ಕಾರಿದ್ದಾರೆ.

ವಿಕ ಜತೆ ಮಾತನಾಡಿದ ಅವರು, ''ಈ ರೀತಿ ಸಾವಿಗೆ ಅವಮಾನ ಮಾಡಬೇಡಿ. ಸೈನಿಕರ ಪ್ರಾಣಕ್ಕೆ ಬೆಲೆಯೇ ಇಲ್ಲವೆ..? ಚಳಿ, ಮಳೆ, ಬಿಸಿಲೆನ್ನದೆ, ತಿನ್ನಲು ಊಟ ಇಲ್ಲದೆ ದೇಶ ಕಾಯುತ್ತಾರೆ. ಅಂಥವರ ಪ್ರಾಣಕ್ಕೆ ಬೆಲೆ ಕಟ್ಟಬೇಡಿ. ದಯವಿಟ್ಟು ಅಪಪ್ರಚಾರ ಮಾಡಬೇಡಿ. ಸತ್ಯ ತಿಳಿದು ಮಾತನಾಡಿ'' ಎಂದು ಮನವಿ ಮಾಡಿದರು.