ಜ್ಯೋತಿಷಿಗಳ 'ಹಸ್ತ'ಕ್ಕೆ ತಟ್ಟಿದ ನೀತಿ ಸಂಹಿತೆ ಬಿಸಿ

ಮಂಡ್ಯ: ಲೋಕಸಭೆ ಚುನಾವಣೆ ನೀತಿ ಸಂಹಿತೆ ಬಿಸಿ ಕೇವಲ ರಾಜಕಾರಣಿಗಳು, ರಾಜಕೀಯ ಪಕ್ಷದ ಕಾರ‍್ಯಕರ್ತರಲ್ಲದೆ ಜ್ಯೋತಿಷಿಗಳಿಗೂ ತಟ್ಟಿದೆ!

ಜ್ಯೋತಿಷ್ಯ ಕೇಂದ್ರದ ಪ್ರಚಾರಕ್ಕಾಗಿ ಬಳಸುತ್ತಿದ್ದ ಹಸ್ತ ಮುದ್ರೆಯ ಬೋರ್ಡ್‌ ಇದೀಗ ಚುನಾವಣಾ ಆಯೋಗದ ಕಣ್ಣಿಗೆ ಗುರಿಯಾಗಿದೆ. ನಗರದ ಅಶೋಕನಗರದ ಜ್ಯೋತಿಷ್ಯ ಕೇಂದ್ರವೊಂದರ ಬೋರ್ಡ್‌ನಲ್ಲಿ ನಿಮ್ಮ ಹಸ್ತ, ಜಾತಕ, ಮುಖಲಕ್ಷಣ, ಭಾವಚಿತ್ರ ನೋಡಿ ಜ್ಯೋತಿಷ್ಯ ಹೇಳಲಾಗುತ್ತದೆ ಎನ್ನುವುದನ್ನು ಹೊರತುಪಡಿಸಿ, ಕಾಂಗ್ರೆಸ್‌ ಪಕ್ಷದ ಚಿಹ್ನೆ ಹೋಲುವ ಹಸ್ತದ ಚಿಹ್ನೆಯನ್ನು ಚುನಾವಣಾಧಿಕಾರಿಗಳ ಆದೇಶದ ಮೇರೆಗೆ ಪೇಪರ್‌ ಹಾಕಿ ಮುಚ್ಚಲಾಗಿದೆ.

ಇನ್ನು ಹಸ್ತ ಸಾಮುದ್ರಿಕೆ ನೋಡಿ ಭವಿಷ್ಯ ಹೇಳುವ ಜ್ಯೋತಿಷಿಗಳು ಜಿಲ್ಲೆಯ ಎಲ್ಲೆಡೆ ಕಾಣಸಿಗುತ್ತಾರೆ. ನೀತಿ ಸಂಹಿತೆಯಡಿ ಅವರ ಜ್ಯೋತಿಷ್ಯ ಕೇಂದ್ರದ ಹಸ್ತದ ಚಿಹ್ನೆ ಇರುವ ಬೋರ್ಡ್‌ಗಳ ಕಥೆಯೂ ಹೀಗೆ ಆಗಿದೆ. ಚುನಾವಣೆ ಘೋಷಣೆಯಾದ ದಿನದಿಂದಲೇ ನೀತಿ ಸಂಹಿತೆ ಜಾರಿ ಮಾಡಿರುವ ಚುನಾವಣಾ ಆಯೋಗ ರಾಜಕೀಯ ಪಕ್ಷಗಳು, ಸಾಮಾಜಿಕ ಜಾಲತಾಣಗಳ ಮೇಲೆ ಕಣ್ಣಿಟಿದೆ. ಇಷ್ಟೇ ಅಲ್ಲದೇ, ದೇವಸ್ಥಾನಗಳಲ್ಲಿ ನಡೆಯುವ ಕಾರ‍್ಯಕ್ರಮಗಳು, ಅಭ್ಯರ್ಥಿಗಳ ಪರ ಧಾರ್ಮಿಕ ಚಿಹ್ನೆ, ಪಕ್ಷದ ಭಾವುಟ ಪ್ರದರ್ಶಿಸಿ ಪ್ರಚಾರ ಮಾಡುವಂತಿಲ್ಲ ಎಂದು ಈಗಾಗಲೇ ಚುನಾವಣೆ ಆಯೋಗ ಸೂಚನೆ ನೀಡಿದೆ.