ಪತ್ನಿಯ ತಿಥಿ ದಿನವೇ ಪತಿ ಸಾವು

ಶ್ರೀರಂಗಪಟ್ಟಣ: ಮೃತ ಪತ್ನಿಯ 11ನೇ ದಿನದ ಹಾಲುತುಪ್ಪ ಕಾರ‌್ಯಕ್ರಮ ಮುಗಿಸಿ ಪತ್ನಿಗೆ ಎಡೆ ಇಟ್ಟಿದ್ದ ಊಟ(ಪ್ರಸಾದ) ಸೇವಿಸುತ್ತಿದ್ದ ವೇಳೆಯೇ ಕುಸಿದು ಬಿದ್ದು ಪತಿಯೂ ಮೃತಪಟ್ಟಿರುವ ಘಟನೆ ಭಾನುವಾರ ತಾಲೂಕಿನ ಮಹದೇವಪುರ ಗ್ರಾಮದಲ್ಲಿ ನಡೆದಿದೆ.

ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣ ತಾಲೂಕಿನ ಮಹದೇವಪುರ ಗ್ರಾಮದ ಮೊಳ್ಳೆಸಿದ್ದೇಗೌಡ ಅವರ ಪುತ್ರ ಯಜಮಾನ್ ಕಾಳೇಗೌಡ(80)ಮೃತರು. ಇವರ ಪತ್ನಿ ಪುಟ್ಟಮ್ಮ(75), ಕಳೆದ 11 ದಿನಗಳ ಹಿಂದೆ ಮೃತಪಟ್ಟಿದ್ದರು.

ಭಾನುವಾರ ಅವರ ಹಾಲುತುಪ್ಪ ( ತಿಥಿ ) ಕಾರ‌್ಯಕ್ರಮ ಇತ್ತು. ತಿಥಿ ಕಾರ‌್ಯಕ್ರಮ ಮುಗಿಸಿ ಮನೆಯಲ್ಲಿ ಎಡೆ ಇಟ್ಟಿದ್ದ ಪ್ರಸಾದ ಸೇವನೆ ಮಾಡುತ್ತಿದ್ದಾಗಲೇ ಕುಸಿದು ಕಾಳೇಗೌಡ ಪ್ರಾಣ ಬಿಟ್ಟಿದ್ದಾರೆ. ಸಂಜೆ ಶವ ಸಂಸ್ಕಾರ ನೆರವೇರಿಸಲಾಯಿತು. ಕಾಳೇಗೌಡರಿಗೆ ದೈಹಿಕ ಶಿಕ್ಷಣ ಶಿಕ್ಷಕರ ಸಂಘದ ತಾಲೂಕು ಅಧ್ಯಕ್ಷ ಸೋಮಶೇಖರ್ ಸೇರಿದಂತೆ 5 ಮಂದಿ ಪುತ್ರರು ಹಾಗೂ ಒಬ್ಬ ಪುತ್ರಿ ಇದ್ದಾರೆ.