ತುಂಬುತಿದೆ ಕೆಆರ್‌ಎಸ್‌ ಜಲಾಶಯ: 100 ಅಡಿ ದಾಟಿದ ನೀರಿನ ಮಟ್ಟ

ಮಂಡ್ಯ: ಕೆ.ಆರ್.ಎಸ್. ಜಲಾಶಯಕ್ಕೆ 73284 ಕ್ಯುಸೆಕ್ ನೀರು ಹರಿದುಬರುತ್ತಿದ್ದು ಜಲಾಶಯದ ನೀರಿನ ಮಟ್ಟವು 102 ಅಡಿ ತಲುಪಿದೆ.

ಶುಕ್ರವಾರ ಮಧ್ಯಾಹ್ನದ ವೇಳೆಗೆ ನೂರರ ಗಡಿದಾಟಿದ ಜಲಾಶಯದ ನೀರಿನ ಮಟ್ಟವು ಸಂಜೆವೇಳೆಗೆ ಇನ್ನು ಎರಡು ಅಡಿಯಷ್ಟು ಹೆಚ್ಚಾಗಿತ್ತು. ಗರಿಷ್ಠ 124.80 ಅಡಿಯುಳ್ಳ ಜಲಾಶಯವು 49.452 ಟಿಎಂಸಿ ಅಡಿ ನೀರು ಸಂಗ್ರಹ ಸಾಮರ್ಥ್ಯವನ್ನು ಹೊಂದಿದೆ.

ಪ್ರಸ್ತುತ 24.417 ಟಿಎಂಸಿ ಅಡಿ ನೀರು ಸಂಗ್ರಹವಾಗಿದ್ದು ಜಲಾಶಯದ ಹೊರಹರಿವಿನ ಪ್ರಮಾಣವನ್ನು ಸಂಪೂರ್ಣ ಸ್ಥಗಿತಗೊಳಿಸಲಾಗಿದೆ.

ಆದಾಗ್ಯೂ 469 ಕ್ಯುಸೆಕ್ ಸೋರಿಕೆ ನೀರು ನಾಲೆಗಳಲ್ಲಿ ಹರಿದು ಹೋಗುತ್ತಿದೆ.

ಸ್ಟಾಂಡರ್ಡ್ ವೆಜಿನ ಮಾಹಿತಿ ಪ್ರಕಾರ ಕಾವೇರಿ ನದಿಯಿಂದ 59360 ಕ್ಯುಸೆಕ್, ಹೇಮಾವತಿ ನದಿಯಿಂದ 30000 ಕ್ಯುಸೆಕ್ ಹಾಗೂ ಲಕ್ಷ್ಮಣತೀರ್ಥ ನದಿಯಿಂದ 20199 ಕ್ಯುಸೆಕ್ ಸೇರಿದಂತೆ 1,10,159 ನೀರು ಜಲಾಶಯ ದತ್ತ ಹರಿದುಬರುತ್ತಿದೆ.

ಇದೇ ಪ್ರಮಾಣದ ನೀರು ಹರಿದುಬಂದರೆ ಶನಿವಾರ ಸಂಜೆ ವೇಳೆಗೆ ಜಲಾಶಯದ ನೀರಿನ ಮಟ್ಟವು 110 ಅಡಿ ತಲುಪುವ ನಿರೀಕ್ಷೆ ಇದೆ.