ಕೆಆರ್‌ಎಸ್‌: 93 ಅಡಿಗೆ ಏರಿದ ನೀರಿನ ಮಟ್ಟ

ಮಂಡ್ಯ: ಕೊಡಗಿನಲ್ಲಿ ಸುರಿಯುತ್ತಿರುವ ಧಾರಾಕಾರ ಮಳೆಯಿಂದಾಗಿ ಕೆಆರ್‌ಎಸ್‌ ಜಲಾಶಯದ ಒಳ ಹರಿವಿನ ಪ್ರಮಾಣ ಪ್ರಸ್ತುತ 37,375 ಕ್ಯೂಸೆಕ್‌ ದಾಖಲಾಗಿದೆ.

ಹೀಗಾಗಿ ಇನ್ನೆರಡು ದಿನಗಳಲ್ಲಿ ನೂರಡಿ ದಾಟಲಿದ್ದು, ಇದೇ ಪ್ರಮಾಣದ ನೀರು ಎಂಟತ್ತು ದಿನಗಳು ಹರಿದು ಬಂದರೆ ಜಲಾಶಯ ಭರ್ತಿಯಾಗುವ ಸಾಧ್ಯತೆಯಿದೆ. ಹೀಗಾಗಿ ಕನ್ನಂಬಾಡಿಕಟ್ಟೆ ನೀರಿನ ಮಟ್ಟವು ನೂರಡಿಯನ್ನೇ ಮುಟ್ಟುವುದಿಲ್ಲ ಎಂಬ ಪರಿಸ್ಥಿತಿಯಿಂದ ಭರ್ತಿಯಾಗುವ ನಿರೀಕ್ಷೆ ಹುಟ್ಟಿಸಿದೆ.

ಒಂದೇ ದಿನದಲ್ಲಿ 6.60 ಅಡಿ ಏರಿಕೆ: ಒಂದೇ ದಿನದಲ್ಲಿ ಜಲಾಶಯದ ನೀರಿನ ಮಟ್ಟವು 6.60 ಅಡಿ ಹೆಚ್ಚಾಗಿದೆ. ಆ.7ರಂದು ಬೆಳಗ್ಗೆ 86.90 ಅಡಿ ಇದ್ದ ಜಲಾಶಯದ ನೀರಿನ ಮಟ್ಟವು ಸಂಜೆ ವೇಳೆಗೆ 88.60 ಅಡಿ ತಲುಪಿತ್ತು. ಪುನಃ ಆ.8ರಂದು 91 ಅಡಿಗೇರಿತ್ತು. ಸಂಜೆ ವೇಳೆಗೆ 93.50 ಅಡಿ ಮುಟ್ಟಿದೆ. ಇದರ ನಡುವೆ ಜಲಾಶಯದ ಹೊರ ಹರಿವಿನ ಪ್ರಮಾಣವನ್ನು ಸ್ಥಗಿತಗೊಳಿಸಲಾಗಿದೆ.

ಮೈಸೂರು ಜಿಲ್ಲೆಯ ಕಬಿನಿ ಜಲಾಶಯದಿಂದ ನದಿಗೆ 80,000 ಕ್ಯೂಸೆಕ್‌ ನೀರನ್ನು ಬಿಡುತ್ತಿರುವುದರಿಂದ ಕಾವೇರಿ ನೀರಿಗಾಗಿ ತಮಿಳುನಾಡಿನ ತಗಾದೆ ಇಲ್ಲ. ಹೀಗಾಗಿ ಕನ್ನಂಬಾಡಿಕಟ್ಟೆಯಿಂದ ಕಾವೇರಿ ನದಿ ಮೂಲಕ ತಮಿಳುನಾಡಿಗೆ ಹರಿಸುತ್ತಿದ್ದ ನೀರನ್ನು ಸಂಪೂರ್ಣ ಬಂದ್‌ ಮಾಡಲಾಗಿದೆ. ಆದಾಗ್ಯೂ 421 ಕ್ಯೂಸೆಕ್‌ ಸೋರಿಕೆ ನೀರು ನದಿಗೆ ಹೋಗುತ್ತಿದೆ.