ನವೀನ್
ಹೌದು, ಕಾವೇರಿಗಾಗಿ ಪದೇ ಪದೇ ಕ್ಯಾತೆ ತೆಗೆಯುತ್ತಿದ್ದ ತಮಿಳುನಾಡು ಕೂಡ ಇದೀಗ 'ಪ್ಲೀಸ್... ಕಾವೇರಿ ನೀರನ್ನು ಬಿಡಬೇಡಿ' ಎನ್ನುವ ಮಟ್ಟಿಗೆ ರಾಜ್ಯದ ಎರಡೂ ಜಲಾಶಯಗಳಿಂದ ಕಾವೇರಿ ಹರಿದಿದ್ದಾಳೆ, ಈಗಲೂ ಹರಿಯುತ್ತಿದ್ದಾಳೆ. ಕಾವೇರಿ ಜಲ ನ್ಯಾಯಮಂಡಳಿ 2007ರಲ್ಲಿ ನೀಡಿದ್ದ ಪ್ರಕಾರ ತಮಿಳುನಾಡಿಗೆ ಕರ್ನಾಟಕ ವಾರ್ಷಿಕ 192 ಟಿಎಂಸಿ ನೀರು ಕೊಡಬೇಕಿತ್ತು.
ಆದರೆ, 2018ರ ಫೆಬ್ರವರಿಯಲ್ಲಿ ಸುಪ್ರೀಂ ಕೋರ್ಟ್ ಕರ್ನಾಟಕದ ಪಾಲನ್ನು 14.75 ಟಿಎಂಸಿ ಹೆಚ್ಚಿಸಿ, ತಮಿಳುನಾಡಿಗೆ ಕರ್ನಾಟಕ 177.25 ಟಿಎಂಸಿ ನೀರು ನೀಡಬೇಕೆಂದು ತೀರ್ಪು ನೀಡಿದೆ. ಈ ಪ್ರಕಾರ ಲೆಕ್ಕಾಚಾರ ಮಾಡಿದರೆ 2018ರ ಜೂನ್ನಿಂದ ಮುಂದಿನ 2019ರ ಮೇ ತಿಂಗಳವರೆಗೆ ನೀಡಬೇಕಿದ್ದ ನೀರಿನ ಜತೆಗೆ ಹೆಚ್ಚುವರಿಯಾಗಿ 133.299 ಟಿಎಂಸಿ ಅಡಿ ನೀರನ್ನು ಈಗಾಗಲೇ ಹರಿದಿದೆ.
ಕೆಆರ್ಎಸ್ನಿಂದ 149.509 ಟಿಎಂಸಿ, ಕಬಿನಿ ಜಲಾಶಯದಿಂದ 161.04 ಟಿಎಂಸಿ ಸೇರಿದಂತೆ 310.549 ಟಿಎಂಸಿ ನೀರು ಈಗಾಗಲೇ(ಆ.25ರವರೆಗೆ) ಹರಿದು ಹೋಗಿದೆ. ಆ.15ರಿಂದ ಸತತ ನಾಲ್ಕು ದಿನಗಳ ಕಾಲ 1 ಲಕ್ಷ ಕ್ಯೂಸೆಕ್ಗೂ ಅಧಿಕ ನೀರನ್ನು ನಿರಂತರವಾಗಿ ಕೆಆರ್ಎಸ್ ಒಂದೇ ಜಲಾಶಯದಿಂದ ನದಿಗೆ ಬಿಡಲಾಗಿದೆ. ಜಲಾಶಯ ನಿರ್ಮಾಣಗೊಂಡು 86 ವರ್ಷಗಳ ಇತಿಹಾಸದಲ್ಲಿ ದಾಖಲೆ ಪ್ರಮಾಣದ ನೀರಿನ ಹೊರ ಹರಿವು ಇದಾಗಿದೆ.
ಕಾವೇರಿ ಜಲಾನಯನ ಪ್ರದೇಶದಲ್ಲಿ ಭಾರಿ ಮಳೆಯಿಂದ ಈ ವರ್ಷ ಜುಲೈ 20ಕ್ಕೆ ಕೆಆರ್ಎಸ್ ಭರ್ತಿಯಾಗಿದೆ. ಬೇಸಿಗೆ ಅಂತ್ಯಕ್ಕೆ ಜಲಾಶಯದಲ್ಲಿ ಡೆಡ್ ಸ್ಟೋರೇಜ್ ಸಹಿತ ಕೇವಲ 6 ಟಿಎಂಸಿ ನೀರಿತ್ತು. ಜೂ.1ರಿಂದ ಆ.25ರವರೆಗೆ ಜಲಾಶಯಕ್ಕೆ 206.356 ಟಿಎಂಸಿ ಅಡಿ ನೀರು ಹರಿದು ಬಂದಿದೆ. 125 ಚದರ ಕಿ.ಮೀ. ವಿಸ್ತಾರವುಳ್ಳ(ನೀರು ನಿಲ್ಲುವ ಪ್ರದೇಶ) ಹಾಗೂ 124.80 ಅಡಿ ಎತ್ತರವುಳ್ಳ ಕನ್ನಂಬಾಡಿಕಟ್ಟೆಯು 49.452 ಅಡಿ ನೀರು ಸಂಗ್ರಹ ಸಾಮರ್ಥ್ಯ ಹೊಂದಿದೆ.
ಆದರೆ, 4.400 ಟಿಎಂಸಿ ಡೆಡ್ಸ್ಟೋರೇಜ್ ಕಳೆದು 45 ಟಿಎಂಸಿ ಅಡಿ ನೀರು ಮಾತ್ರ ಕೃಷಿ ಮತ್ತು ಕುಡಿಯಲು ಲಭ್ಯವಾಗುತ್ತದೆ. ಕೆಆರ್ಎಸ್ನ ಸಂಗ್ರಹ ಸಾಮರ್ಥ್ಯಕ್ಕಿಂತಲೂ ಮೂರೂವರೆ ಪಟ್ಟು ನೀರನ್ನು ಕೇವಲ ಎರಡೂವರೆ ತಿಂಗಳಲ್ಲಿ ತಮಿಳುನಾಡಿಗೆ ಬಿಡಲಾಗಿದೆ. ಇದುವರೆಗೆ ಯಾವ ವರ್ಷದಲ್ಲೂ ಇಷ್ಟು ಕಡಿಮೆ ಅವಧಿಯಲ್ಲಿ 100ಕ್ಕಿಂತ ಅಧಿಕ ಟಿಎಂಸಿ ನೀರು ಜಲಾಶಯದಿಂದ ಹೊರಗೆ ಹರಿದು ಹೋದ ನಿದರ್ಶನವಿಲ್ಲ.
ದಿನದಿಂದ ದಿನಕ್ಕೆ ಹೆಚ್ಚಿದ ಹೊರ ಹರಿವು...
ಕೆಆರ್ಎಸ್ಗೆ ಆ.14ರಂದು 95,775 ಕ್ಯೂಸೆಕ್ ನೀರಿನ ಒಳ ಹರಿವಿದ್ದರೆ, 98,283 ಕ್ಯೂಸೆಕ್ ಹೊರ ಬಿಡಲಾಗಿತ್ತು. ಆ.15ರಂದು ಬೆಳಗ್ಗೆ 99,896 ಒಳ ಹರಿವು, 1.05 ಲಕ್ಷ ಕ್ಯೂಸೆಕ್ ಹೊರಹರಿವಿತ್ತು. ಅದೇ ದಿನ ಸಂಜೆ ವೇಳೆಗೆ ಒಳ ಹರಿವಿನ ಪ್ರಮಾಣ 1.18 ಲಕ್ಷ ಕ್ಯೂಸೆಕ್ಗೆ ಮತ್ತು ಹೊರ ಹರಿವು 1.22 ಲಕ್ಷ ಕ್ಯೂಸೆಕ್ಗೆ ಏರಿಕೆಯಾಯಿತು.
ಆ.16ರಂದು ದಾಖಲೆ ಪ್ರಮಾಣದಲ್ಲಿ 1.23 ಲಕ್ಷ ಕ್ಯೂಸೆಕ್ ಒಳ ಹರಿವು, 1.22 ಲಕ್ಷ ಕ್ಯೂಸೆಕ್ ಹೊರ ಹರಿವಿತ್ತು. ಆ.17ಕ್ಕೆ ಒಳ ಹರಿವು(1.14 ಲಕ್ಷ ಕ್ಯೂಸೆಕ್) ಮತ್ತು ದಾಖಲೆ ಪ್ರಮಾಣದಲ್ಲಿ ಹೊರ ಹರಿವು(1.30 ಲಕ್ಷ ಕ್ಯೂಸೆಕ್) ಇತ್ತು. ಆ.18ಕ್ಕೆ ಒಳ ಹರಿವು 1.24 ಲಕ್ಷ ಕ್ಯೂಸೆಕ್ಗೆ ಹೆಚ್ಚಾದರೂ ಹೊರ ಹರಿವು 1.12 ಲಕ್ಷ ಕ್ಯೂಸೆಕ್ಗೆ ಇಳಿಕೆಯಾಯಿತು. ಆ.19ರಿಂದ ಒಳ ಮತ್ತು ಹೊರ ಹರಿವಿನ ಪ್ರಮಾಣ ಕೊಂಚ ಇಳಿಕೆಯಾಯಿತು. ಆ.20ಕ್ಕೆ ಒಳ ಹರಿವು 94,382 ಕ್ಯೂಸೆಕ್ ಆಗಿದ್ದರೆ, ಹೊರ ಹರಿವು 84,060 ಸಾವಿರ ಕ್ಯೂಸೆಕ್ಗೆ ಇಳಿಯಿತು. ನಂತರದ ದಿನಗಳಲ್ಲಿ ಒಳ ಮತ್ತು ಹೊರ ಹರಿವಿನ ಪ್ರಮಾಣ ಗಣನೀಯ ಪ್ರಮಾಣದಲ್ಲಿ ಇಳಿಕೆ ಕಂಡಿದೆ.
1991ರ ಜು.29ರಂದು ಜಲಾಶಯಕ್ಕೆ 1,77,077 ಕ್ಯೂಸೆಕ್ ಒಳ ಹರಿವಿತ್ತು. ಅದಕ್ಕೂ ಒಂದು ದಿನ ಮುಂಚಿತವಾಗಿಯೇ 2,11,736 ಕ್ಯೂಸೆಕ್ ನೀರನ್ನು ಕಟ್ಟೆಯಿಂದ ನದಿಗೆ ಬಿಡಲಾಗಿತ್ತು. 2005ರಲ್ಲಿ 1,06,057 ಕ್ಯೂಸೆಕ್ ನೀರು ಹರಿದಿದೆ. ಹೀಗಾಗಿ ಕಳೆದ 28 ವರ್ಷದಲ್ಲಿ ಮೂರನೇ ಅತಿ ಹೆಚ್ಚು ಪ್ರಮಾಣದ ಒಳ ಮತ್ತು ಹೊರ ಹರಿವು ಈ ಬಾರಿ ದಾಖಲಾಗಿದೆ. ಜೂನ್-ಆಗಸ್ಟ್ ಅವಧಿಯಲ್ಲಿ ಕೆಆರ್ಎಸ್ ಇತಿಹಾಸದಲ್ಲೇ ದಾಖಲೆ ಪ್ರಮಾಣದಲ್ಲಿ ನೀರು ಹರಿದು ಹೋಗಿದೆ. 25ಕ್ಕೂ ಹೆಚ್ಚು ದಿನ 75,000 ಕ್ಯೂಸೆಕ್ಗಿಂತ ಹೆಚ್ಚು ಹೊರ ಹರಿವು ಕೂಡ ಮತ್ತೊಂದು ದಾಖಲೆ. 1980ರಲ್ಲಿ ಜೂ.1ರಿಂದ ಆಗಸ್ಟ್ 25ರವರೆಗೆ 201 ಟಿಎಂಸಿ ನೀರು ಕೆಆರ್ಎಸ್ಗೆ ಹರಿದು ಬಂದಿತ್ತು. ಅದೇ ಸಮಯದಲ್ಲಿ 149.500 ಟಿಎಂಸಿ ನೀರನ್ನು ಕಟ್ಟೆಯಿಂದ ಹೊರ ಬಿಡಲಾಗಿತ್ತು.
ಕೆಆರ್ಎಸ್ ಜಲಾಶಯವು 45 ಟಿಎಂಸಿ ಅಡಿ ಲೈವ್ ಸ್ಟೋರೇಜ್ ಸಾಮರ್ಥ್ಯ ಹೊಂದಿದೆ. ಆದರೆ, ಜೂ.1ರಿಂದ ಈವರೆಗೆ 149.509 ಟಿಎಂಸಿ ನೀರನ್ನು ನದಿಗೆ ಬಿಡಲಾಗಿದೆ. ಇದೇ ಸಮಯದಲ್ಲಿ ಜಲಾಶಯಕ್ಕೆ 206.356 ಟಿಎಂಸಿ ನೀರು ಹರಿದುಬಂದಿದೆ -ಬಸವರಾಜೇಗೌಡ, ಕಾರ್ಯಪಾಲಕ ಎಂಜಿನಿಯರ್(ಕೆಆರ್ಎಸ್), ಕಾವೇರಿ ನೀರಾವರಿ ನಿಗಮ
ಮಾಸಿಕವಾಗಿ ತಮಿಳುನಾಡಿಗೆ ಬಿಡಬೇಕಾದ ಕಾವೇರಿ ನೀರಿನ ಪ್ರಮಾಣ
ತಿಂಗಳು ಟಿಎಂಸಿ ಅಡಿ
ಜೂನ್ 9.23
ಜುಲೈ 31.93
ಆಗಸ್ಟ್ 46.16
ಸೆಪ್ಟಂಬರ್ 36.93
ಅಕ್ಟೋಬರ್ 20.31
ನವೆಂಬರ್ 13.85
ಡಿಸೆಂಬರ್ 7.39
ಜನವರಿ 2.77
ಫೆಬ್ರವರಿ 2.305
ಮಾರ್ಚ್ 2.305
ಏಪ್ರಿಲ್ 2.305
ಮೇ 2.305
ಒಟ್ಟು 177.25 ಟಿಎಂಸಿ