ಚಿರತೆ ದಾಳಿ: ಯುವಕನಿಗೆ ಗಂಭೀರ ಗಾಯ

ಕೆ.ಆರ್‌.ಪೇಟೆ: ತಾಲೂಕಿನ ರಾಯಸಮುದ್ರ ಗ್ರಾಮದ ಅರಣ್ಯದಂಚಿನಲ್ಲಿ ಕುರಿ ಮತ್ತು ದನಗಳನ್ನು ಮೇಯಿಸಲು ಹೋಗಿದ್ದ ಯುವಕನ ಮೇಲೆ ಚಿರತೆಯೊಂದು ಮಂಗಳವಾರ ಮಧ್ಯಾಹ್ನ ದಾಳಿ ನಡೆಸಿ, ಗಾಯಗೊಳಿಸಿದೆ.

ರಾಯಸಮುದ್ರ ಗ್ರಾಮದ ರೈತ ಮಹೇಶ್‌ ಅವರ ಪುತ್ರನಾದ ವಿಜಯ್‌(19) ಗಾಯಾಳು. ಅರಣ್ಯದಂಚಿನಲ್ಲಿರುವ ಜಮೀನಿನಲ್ಲಿ ಚಿರತೆಯು ಕುರಿ ಮೇಲೆ ದಾಳಿ ಮಾಡಲೆತ್ನಿಸಿದಾಗ ತಡೆಯಲು ಮುಂದಾದ ವಿಜಯ್‌ ಮೇಲೆ ದಾಳಿ ನಡೆಸಿದೆ. ಬಲಗೈ, ಬೆನ್ನು ಮತ್ತು ಪಕ್ಕೆಗಳಿಗೆ ಪರಚಿದ್ದು, ಸಾಕು ನಾಯಿಗಳು ಬೊಗಳಲಾರಂಭಿಸಿವೆ. ಇತರೆ ರೈತರು ಸ್ಥಳಕ್ಕೆ ಬರುತ್ತಿದ್ದಂತೆ ಚಿರತೆ ಪರಾರಿಯಾಗಿದೆ. ವಿಜಯ್‌ ಅವರಿಗೆ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ, ಹೆಚ್ಚಿನ ಚಿಕಿತ್ಸೆಗಾಗಿ ಮೈಸೂರಿನ ಕೆ.ಆರ್‌.ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.

ಆಸ್ಪತ್ರೆಗೆ ಆಗಮಿಸಿದ ಅರಣ್ಯ ಇಲಾಖೆ ಉಪ ಸಂರಕ್ಷ ಣಾಧಿಕಾರಿ ರಾಘವೇಂದ್ರ, ಅರಣ್ಯ ವೀಕ್ಷ ಕ ಮೋಹನ್‌, ಮೇಲುಕೋಟೆ ವನ್ಯಜೀವಿ ಸಂರಕ್ಷ ಣಾ ವಿಭಾಗದ ಅರಣ್ಯ ವೀಕ್ಷ ಕ ಮಿತ್ರಾನಂದ ಗಾಯಾಳು ವಿಜಯ್‌ಗೆ ಧೈರ‍್ಯ ಹೇಳಿದರು. ಆಸ್ಪತ್ರೆಯ ಖರ್ಚನ್ನು ಇಲಾಖೆ ಭರಿಸಲಿದೆ ಎಂದು ಪೋಷಕರಿಗೆ ಭರವಸೆ ನೀಡಿದರು. ರಾಯಸಮುದ್ರದ ಬಳಿ ಬೋನಿರಿಸಿ ಚಿರತೆ ಸೆರೆಗೆ ಕಾರ್ಯಾಚರಣೆ ನಡೆಸುವುದಾಗಿ ತಿಳಿಸಿದರು.