ಹಾಸ್ಟೆಲ್‌: ಕೊಠಡಿವಾರು ವಿದ್ಯುತ್‌ ದೀಪಗಳ ಅಳವಡಿಕೆ, ವೈರಿಂಗ್‌ ಕೆಲಸ

ಮಂಡ್ಯ: ವಾರದ ಹಿಂದಷ್ಟೇ ಫ್ಯಾನ್‌ಗಳ ಅಳವಡಿಕೆ ಕಾರ‍್ಯ ನಡೆದಿದ್ದ ನಗರದಲ್ಲಿನ ಸಮಾಜ ಕಲ್ಯಾಣ ಇಲಾಖೆ ಪದವಿ ಕಾಲೇಜು ಬಾಲಕರ ಹಾಸ್ಟೆಲ್‌ನಲ್ಲಿ ಇದೀಗ ಕೊಠಡಿವಾರು ವಿದ್ಯುತ್‌ ದೀಪಗಳ ಅಳವಡಿಕೆ ಮತ್ತು ವೈರಿಂಗ್‌ ಕೆಲಸ ನಡೆಯುತ್ತಿದೆ.

ಜಿಲ್ಲೆಯ ಹಾಸ್ಟೆಲ್‌ಗಳ ಅವ್ಯವಸ್ಥೆ ಮತ್ತು ಸಮಸ್ಯೆಗಳ ಬಗ್ಗೆ 'ಧಿವಿಜಯ ಕರ್ನಾಟಕ' ಹಿಂದುಳಿದ ಹಾಸ್ಟೆಲ್‌ ವಿಕ ಅಭಿಯಾನದಡಿ ಸರಣಿ ಲೇಖನಗಳನ್ನು ಪ್ರಕಟಿಸಿತ್ತು. ಬೆನ್ನಲ್ಲೇ ಎಚ್ಚೆತ್ತ ಸಂಬಂಧಿಸಿದ ಇಲಾಖೆಗಳ ಅಧಿಕಾರಿಗಳು, ಹೆಚ್ಚು ಸಮಸ್ಯೆ ಇರುವ ಹಾಸ್ಟೆಲ್‌ಗಳ ಸಮಸ್ಯೆಗಳ ನಿವಾರಣೆಗೆ ಕ್ರಮ ವಹಿಸಿವೆ. ಇದರೊಂದಿಗೆ ವಿಕ ವರದಿಗೆ ಫಲಶ್ರುತಿ ದೊರೆತಂತಾಗಿದೆ.

ಮಂಡ್ಯದ ಸಮಾಜ ಕಲ್ಯಾಣ ಇಲಾಖೆ ಪದವಿ ಕಾಲೇಜು ಬಾಲಕರ ಹಾಸ್ಟೆಲ್‌ನ ಸಮಸ್ಯೆಗಳ ಬಗ್ಗೆ 'ಧಿಹಾಸ್ಟೆಲ್‌ ಶೌಚಾಲಯದ ಸ್ಥಿತಿ ಶೋಚನೀಯ' ಶೀರ್ಷಿಕೆಯಡಿ ನ.5ರ ಸಂಚಿಕೆಯಲ್ಲಿ ಲೇಖನ ಪ್ರಕಟಿಸಿತ್ತು. ಪತ್ರಿಕೆಯು ಜನರ ಕೈ ಸೇರಿದ ನಾಲ್ಕೈದು ಗಂಟೆಗಳಲ್ಲೇ ಎಚ್ಚೆತ್ತ ಇಲಾಖೆ ಅಧಿಕಾರಿಗಳು ಹಾಸ್ಟೆಲ್‌ನ ಕೊಠಡಿಗಳಲ್ಲಿನ ಫ್ಯಾನ್‌ ಸಮಸ್ಯೆ ಪರಿಹಾರ ದೊರಕಿಸಿಕೊಟ್ಟಿದ್ದರು.

ಕೆಟ್ಟು ಹೋಗಿದ್ದ ಹಾಗೂ ಜೋರು ಶಬ್ದ ಮಾಡುತ್ತಾ ತಿರುಗುತ್ತಿದ್ದ 9 ಫ್ಯಾನ್‌ಗಳನ್ನು ಡಿ.5ರಂದು ಒಂದೇ ದಿನ ಬದಲಾಯಿಸಿ, ಹೊಸ ಫ್ಯಾನ್‌ಗಳನ್ನು ಅಳವಡಿಸಲಾಗಿತ್ತು. ವೇಗ ಕಡಿಮೆಯಾಗಿರುವ ಫ್ಯಾನ್‌ಗಳಿಗೆ ಹಲವು ಕೆಪಾಸಿಟರ್‌ಗಳನ್ನು ಅಳವಡಿಸಲಾಯಿತು. ಇದೀಗ 55 ಕೊಠಡಿಗಳಿರುವ ಇದೇ ಹಾಸ್ಟೆಲ್‌ನ ಅಗತ್ಯವಿರುವ ಕೊಠಡಿಗಳಲ್ಲಿ ಹೊಸದಾಗಿ ವೈರಿಂಗ್‌ ಮತ್ತು ವಿದ್ಯುತ್‌ ದೀಪಗಳ ಅಳವಡಿಕೆ ಕಾರ‍್ಯವೂ ನಡೆಯುತ್ತಿದೆ.

ಕಳೆದ ಮೂರ್ನಾಲ್ಕು ದಿನಗಳಿಂದ ವೈರಿಂಗ್‌ ಮತ್ತು ಬಲ್ಬ್ ಅಳವಡಿಕೆ ಕಾರ‍್ಯ ನಡೆಯುತ್ತಿದ್ದು, ವಿದ್ಯಾರ್ಥಿಗಳ ಬೇಡಿಕೆಗೆ ಅನುಗುಣವಾಗಿ ವಿದ್ಯುತ್‌ ಬಲ್‌ಗಳನ್ನು ಅಳವಡಿಸಲಾಗುತ್ತಿದೆ.. ಹಳೆಯ ಸ್ವಿಚ್‌ ಬೋರ್ಡ್‌ಗಳನ್ನು ಬದಲಾಯಿಸಿ, ಹೊಸ ಸ್ವಿಚ್‌ ಬೋರ್ಡ್‌ಗಳನ್ನು ಅಳವಡಿಕೆ ಮಾಡಲಾಗುತ್ತಿದೆ. ಶೌಚಾಲಯಕ್ಕೆ ಬೇಕಾದ ಅಗತ್ಯ ಡೋರ್‌ಗಳು ಈಗಾಗಲೇ ಹಾಸ್ಟೆಲ್‌ಗೆ ಪೂರೈಕೆಯಾಗಿದ್ದು, ಶೌಚಾಲಯ ದುರಸ್ತಿ ಕಾರ್ಯ ನಡೆಯಲಿದೆ.

ಹೊಸ ವರ್ಷ ನಮ್ಮ ಹಾಸ್ಟೆಲ್‌ ಹೊಸ ರೂಪ ಪಡೆಯಲಿದೆ. ಈಗಾಗಲೇ ಫ್ಯಾನ್‌ಗಳು ಬದಲಾವಣೆ, ಎಲ್‌ಇಡಿ ಟ್ಯೂಬ್‌ ಲೈಟ್‌ಗಳು, ಸ್ವಿಚ್‌ ಬೋರ್ಡ್‌ಗಳ ಅಳವಡಿಕೆ ಹಾಗೂ ವೈರಿಂಗ್‌ ಕಾರ‍್ಯ ನಡೆಯುತ್ತಿದೆ. ಸದ್ಯಕ್ಕೆ ಶೌಚಾಲಯಗಳ ಡೋರ್‌ಗಳು ಬಂದಿದ್ದು, ಒಂದೆರಡು ದಿನಗಳಲ್ಲಿ ಟಾಯ್ಲೆಟ್‌/ಯೂರಿನರ್‌ ಕಮೋಡ್‌ಗಳು ಪೂರೈಕೆಯಾಗಲಿವೆ. ಅವು ಬಂದ ಬಳಿಕ ಶೌಚಾಲಯಗಳ ದುರಸ್ತಿ ಕಾರ‍್ಯ ಎರಡು ಹಂತದಲ್ಲಿ ನಡೆಯಲಿದೆ.
- ಸಿದ್ದರಾಜು, ವಾರ್ಡನ್‌, ಪದವಿ ಕಾಲೇಜು ಬಾಲಕರ ಹಾಸ್ಟೆಲ್‌, ಮಂಡ್ಯ