ತಂದೆ ಕೊಲೆ: ಮಗ, ಮೂವರು ಸ್ನೇಹಿತರ ಬಂಧನ

ಮಂಡ್ಯ: ತಾಲೂಕಿನ ಮೊಳೆಕೊಪ್ಪಲು ಗ್ರಾಮದಲ್ಲಿ ಏ. 21ರಂದು ನಡೆದಿದ್ದ ಅಂದಾನಿ(58) ಕೊಲೆ ಹಿನ್ನೆಲೆ ಅವರ ಮಗ ಮತ್ತು ಆತನ ಮೂವರು ಸ್ನೇಹಿತರನ್ನು ಮಂಡ್ಯ ಗ್ರಾಮಾಂತರ ಪೊಲೀಸರು ಬಂಧಿಸಿದ್ದಾರೆ.

ಅಂದಾನಿ ಮಗ ಯೋಗೇಶ್‌(30), ಸ್ನೇಹಿತರಾದ ಪ್ರತಾಪ್‌(29), ಅರಕೇಶ(31), ಶಂಕರ(30) ಬಂಧಿತ ಆರೋಪಿಗಳಾಗಿದ್ದು, ಬುಧವಾರ ನ್ಯಾಯಾಧೀಶರ ಮುಂದೆ ಆರೋಪಿಗಳನ್ನು ಹಾಜರುಪಡಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಅಂದಾನಿ ಅವರು ನಿತ್ಯ ಕುಡಿದು ಬಂದು ಜಗಳ ಮಾಡುತ್ತಿದ್ದರು. ಇದರಿಂದ ರೋಸಿದ್ದ ಯೋಗೇಶ ಏ. 21ರಂದು ರಾತ್ರಿ ಅಂದಾನಿ ಎಂದಿನಂತೆ ಕುಡಿದು ಬಂದು ಮನೆಯಲ್ಲಿ ಮಗನೊಂದಿಗೆ ಜಗಳವಾಡುತ್ತಿದ್ದಾಗ ಪ್ರತಾಪ್‌, ಅರಕೇಶ ಹಾಗೂ ಶಂಕರ ಅವರೊಂದಿಗೆ ತಂದೆಯನ್ನು ಗ್ರಾಮದ ಹೊರವಲಯದಲ್ಲಿರುವ ಕಬ್ಬಿನ ಗದ್ದೆಗೆ ಕರೆದೊಯ್ದು ಗುದ್ದಲಿ ಕಾವು ಹಾಗೂ ಮರದ ಕೋಲುಗಳಿಂದ ಹಲ್ಲೆ ನಡೆಸಿ ಕೊಲೆ ಮಾಡಿದ್ದರು. ಬಳಿಕ ಶವವನ್ನು ಸಮೀಪದಲ್ಲೇ ಬಿಸಾಡಿ ಮನೆಗೆ ತೆರಳಿದ್ದರು.

ಗ್ರಾಮದ ಹೊರಗೆ ಕುಡಿದು ಬಿದ್ದು ತಂದೆ ಮೃತಪಟ್ಟಿದ್ದಾನೆ ಎಂದು ಜನರಿಗೆ ತಿಳಿಸಿ, ಯಾರಿಗೂ ಸಂಶಯ ಬಾರದ ರೀತಿಯಲ್ಲಿ ಏ. 22ರಂದು ಅಂತ್ಯಕ್ರಿಯೆ ನಡೆಸಿದ್ದನು. ಅಂದಾನಿಯನ್ನು ಯಾರೋ ಹಲ್ಲೆ ಮಾಡಿ ಕೊಲೆ ಮಾಡಿರಬಹುದು ಎಂಬ ಸಂಶಯ ಗ್ರಾಮಸ್ಥರಿಗೆ ಮೂಡಿದ್ದು, ಈ ಬಗ್ಗೆ ಅಂದಾನಿ ಅಣ್ಣನ ಮಗ ಏ. 29ರಂದು ದೂರು ನೀಡಿದ್ದರು. ತನಿಖೆ ಆರಂಭಿಸಿದ ಪೊಲೀಸರು ಮಗನನ್ನು ತೀವ್ರ ವಿಚಾರಣೆಗೊಳಪಡಿಸಿದಾಗ ಸತ್ಯಾಂಶ ಹೊರಬಂದಿದೆ.