‘ನಿಖಿಲ್‌ ಎಲ್ಲಿದ್ದೀಯಪ್ಪಾ?’ ಸಿನಿಮಾ ನಾನೇ ಮಾಡ್ತೀನಿ: ನಿಖಿಲ್‌

ಮಂಡ್ಯ: 'ನಿಖಿಲ್‌ ಎಲ್ಲಿದ್ದೀಯಪ್ಪಾ?' ಹೆಸರಿನಲ್ಲಿ ನಾನೇ ಸಿನಿಮಾ ಮಾಡ್ತೀನಿ ಎಂದು ಮಂಡ್ಯ ಲೋಕಸಭಾ ಚುನಾವಣೆ ಮೈತ್ರಿ ಅಭ್ಯರ್ಥಿ ನಿಖಿಲ್‌ ಕುಮಾರಸ್ವಾಮಿ ತಮಾಷೆ ಮಾಡುವ ಮೂಲಕ ಟೀಕಾಕಾರರಿಗೆ ಟಾಂಗ್‌ ನೀಡಿದರು.

ಕೆ.ಆರ್‌.ಪೇಟೆ ತಾಲೂಕಿನಲ್ಲಿ ನಡೆದ ಜೆಡಿಎಸ್‌ ಕಾರ‍್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ''ನಿಖಿಲ್‌ ಎಲ್ಲಿದ್ದೀಯಪ್ಪಾ ಟೈಟಲ್‌ಗೆ ಭಾರೀ ಬೇಡಿಕೆ ಇದೆ. ಹೀಗಾಗಿ ಈ ಟೈಟಲ್‌ ಅನ್ನು ಬೇರೆ ಯಾರಿಗೂ ಕೊಡಬೇಡಿ ಎಂದು ಸಿನಿಮಾ ಛೇಂಬರ್‌ಗೆ ತಿಳಿಸಿದ್ದೇನೆ,''ಎನ್ನುತ್ತಿದ್ದಂತೆ, ಸಚಿವ ಸಿ.ಎಸ್‌.ಪುಟ್ಟರಾಜು ನಿಖಿಲ್‌ ಮಾತಿಗೆ ಧ್ವನಿಗೂಡಿಸಿ ನಾನೇ ನಿರ್ಮಾಪಕನಾಗುತ್ತೇನೆ ಎಂದು ಹಾಸ್ಯ ಚಟಾಕಿ ಹಾರಿದರು.

''ಪಾಪ ನಮ್ಮ ವಿರೋಧಿಗಳು ನಮ್ಮನ್ನು ಹೀಯಾಳಿಸಲು ಮಾಡಿದ ವ್ಯಂಗ್ಯ ಇಂದು ಅಮೆರಿಕಾ ಸೇರಿದಂತೆ ದೇಶ -ವಿದೇಶಗಳಲ್ಲಿ ಫೇಮಸ್‌ ಆಗುವಂತೆ ಮಾಡಿತು. ಅದಕ್ಕೆ ನಾನು ಟೈಟಲ್‌ ಅನ್ನು ಬೇರೆಯವರಿಗೆ ಕೊಟ್ಟು ಬಿಟ್ಟೀರಿ, ಅದು ನನ್ನ ಟೈಟಲ್‌. ಪುಟ್ಟರಾಜಣ್ಣಾನೇ ಪ್ರೊಡ್ಯೂಸರ್‌, ನಾನೇ ಹೀರೋ ಎನ್ನುತ್ತಿದ್ದಂತೆ'' ಸಭೆಯಲ್ಲಿದ್ದ ಕಾರ‍್ಯಕರ್ತರು ಸಿಳ್ಳೆ, ಚಪ್ಪಾಳೆ ತಟ್ಟಿದರು.