ಲಾಲ್‌ಬಾಗ್‌ ಮೆಟ್ರೊದಲ್ಲಿ ಟೋಕನ್‌ ಬದಲು ಪೇಪರ್‌ ಟಿಕೆಟ್‌

ಬೆಂಗಳೂರು: ಫಲಪುಷ್ಪ ಪ್ರದರ್ಶನ ವೀಕ್ಷಿಸಿ ಲಾಲ್‌ಬಾಗ್‌ ಮೆಟ್ರೊ ನಿಲ್ದಾಣದಿಂದ ಮರಳಿ ಪ್ರಯಾಣಿಸುವವರ ಅನುಕೂಲಕ್ಕಾಗಿ ಬಿಎಂಆರ್‌ಸಿಎಲ್‌ ರಿಯಾಯಿತಿ ದರದ ಟಿಕೆಟ್‌ ನೀಡಲಿದೆ. ಆ.11, 12 ಮತ್ತು 15 ರಂದು ಟೋಕನ್‌ ಬದಲು 30 ರೂ. ಮೌಲ್ಯದ ಪೇಪರ್‌ ಟಿಕೆಟ್‌ ನೀಡಲಾಗುತ್ತದೆ.

ಮೆಟ್ರೊದ ಯಾವುದೇ ನಿಲ್ದಾಣದಿಂದ ಲಾಲ್‌ಬಾಗ್‌ ನಿಲ್ದಾಣಕ್ಕೆ ಟೋಕನ್‌ ಹಾಗೂ ಸ್ಮಾರ್ಟ್‌ ಕಾರ್ಡ್‌ ಬಳಸಿ ಪ್ರಯಾಣಿಸಬಹುದು. ಆದರೆ ಲಾಲ್‌ಬಾಗ್‌ನಿಂದ ಯಾವುದೇ ನಿಲ್ದಾಣಕ್ಕೆ ಹೋಗಲು 30 ರೂ. ತೆತ್ತು ಪೇಪರ್‌ ಟಿಕೆಟ್‌ ಖರೀದಿಸಬೇಕು. ಮರಳಿ ಪ್ರಯಾಣಿಸುವಾಗ ಟೋಕನ್‌ ನೀಡಲಾಗುವುದಿಲ್ಲ. ಸ್ಮಾರ್ಟ್‌ ಕಾರ್ಡ್‌ ಇದ್ದವರು ಅದನ್ನೇ ಬಳಸಿ ಪ್ರಯಾಣಿಸಲು ಅವಕಾಶವಿದೆ. ಬೆಳಗ್ಗೆ 8 ಗಂಟೆಯಿಂದ ರಾತ್ರಿ 8 ಗಂಟೆವರೆಗೆ ಮಾತ್ರ ಟೋಕನ್‌ ಬದಲು ಪೇಪರ್‌ ಟಿಕೆಟ್‌ ನೀಡಲಾಗುತ್ತದೆ.

ಒಂದು ನಿಲ್ದಾಣದಿಂದ ಮತ್ತೊಂದು ನಿಲ್ದಾಣಕ್ಕೆ ಹೋಗಲು 10 ರೂ. ದರವಿದೆ. ಲಾಲ್‌ಬಾಗ್‌ನಿಂದ ಮುಂದಿನ ಒಂದು ನಿಲ್ದಾಣಕ್ಕೆ ಹೋದರೆ ಟೋಕನ್‌ಗೆ 10 ರೂ. ಪಾವತಿಸಬೇಕು. ಫಲಪುಷ್ಪ ಪ್ರದರ್ಶನಕ್ಕೆ ಬರುವವರು ಸಮೀಪದ ನಿಲ್ದಾಣಗಳಿಗೆ ಹೋಗಲು ಪೇಪರ್‌ ಟಿಕೆಟ್‌ ಖರೀದಿಸಿದರೆ ನಷ್ಟ ಹೊಂದಬೇಕಾಗುತ್ತದೆ. ಆದರೆ, ಬೈಯ್ಯಪ್ಪನಹಳ್ಳಿ, ನಾಗಸಂದ್ರಮೊದಲಾದ ನಿಲ್ದಾಣಗಳಿಗೆ ದೂರದ ಪ್ರಯಾಣ ಮಾಡುವವರಿಗೆ ಮಾತ್ರ ಈ ಪೇಪರ್‌ ಟಿಕೆಟ್‌ ಲಾಭದಾಯಕವಾಗಲಿದೆ. ಪೇಪರ್‌ ಟಿಕೆಟ್‌ ಖರೀದಿಗಾಗಿ ಜನರು ಸಾಲಿನಲ್ಲಿ ನಿಲ್ಲಬೇಕಾಗಿರುವುದು ಈ ಸೌಲಭ್ಯದ ಮತ್ತೊಂದು ಸಮಸ್ಯೆಯಾಗಿದೆ.

ನಷ್ಟ
ಮೆಟ್ರೊದ ಲಾಲ್‌ಬಾಗ್‌ ನಿಲ್ದಾಣದಿಂದ ಮೆಜೆಸ್ಟಿಕ್‌ಗೆ 18 ರೂ., ವಿಜಯನಗರ, ಎಂ.ಜಿ.ರಸ್ತೆಗೆ 28 ರೂ., ವಿಧಾನಸೌಧಕ್ಕೆ 22 ರೂ., ಹೊಸಹಳ್ಳಿಗೆ 25 ರೂ., ಚಿಕ್ಕಪೇಟೆಗೆ 15 ರೂ., ಜಯನಗರಕ್ಕೆ 15 ರೂ. ಟೋಕನ್‌ ದರವಿದೆ. ಇದೂ ಸೇರಿದಂತೆ ಹಲವು ನಿಲ್ದಾಣಗಳಿಗೆ 30 ರೂ.ಗಿಂತ ಕಡಿಮೆ ಟೋಕನ್‌ ದರವಿದೆ. ಲಾಲ್‌ಬಾಗ್‌ ನಿಲ್ದಾಣದಿಂದ 30 ರೂ. ದರದ ಪೇಪರ್‌ ಟಿಕೆಟ್‌ ಖರೀದಿಸಿ ಈ ನಿಲ್ದಾಣಗಳಿಗೆ ಪ್ರಯಾಣಿಸಿದರೆ ನಷ್ಟವಾಗುತ್ತದೆ.

ಲಾಭ
ಮೆಟ್ರೊದ ಲಾಲ್‌ಬಾಗ್‌ ನಿಲ್ದಾಣದಿಂದ ಯಶವಂತಪುರ, ಗೊರಗುಂಟೆಪಾಳ್ಯ, ಇಂದಿರಾನಗರ, ಸ್ವಾಮಿ ವಿವೇಕಾನಂದ, ನಾಯಂಡಹಳ್ಳಿಯ ಮೈಸೂರು ರಸ್ತೆಗೆ 35 ರೂ., ಪೀಣ್ಯ, ಬೈಯ್ಯಪ್ಪನಹಳ್ಳಿಗೆ 38 ರೂ., ದಾಸರಹಳ್ಳಿ, ನಾಗಸಂದ್ರಕ್ಕೆ 45 ರೂ. ಟೋಕನ್‌ ದರವಿದೆ. ಲಾಲ್‌ಬಾಗ್‌ನಿಂದ ಈ ನಿಲ್ದಾಣಗಳಿಗೆ ಪ್ರಯಾಣಿಸಿದರೆ ಪೇಪರ್‌ ಟಿಕೆಟ್‌ನಿಂದ ಲಾಭವಾಗುತ್ತದೆ.