ಸಹಕಾರ ಸಂಘದ ಅಧ್ಯಕ್ಷ ಅನರ್ಹ

ಶ್ರೀರಂಗಪಟ್ಟಣ: ಸಹಕಾರ ಸಂಘಗಳ ನಿಯಮಗಳನ್ನು ಉಲ್ಲಂಘಿಸಿ ಅಧಿಕಾರ ದುರುಪಯೋಗ ಮಾಡಿಕೊಂಡಿರುವ ಆರೋಪದ ಮೇಲೆ ಗಂಜಾಂ ಹಾಲು ಉತ್ಪಾದಕ ಸಹಕಾರ ಸಂಘದ ಅಧ್ಯಕ್ಷ ರನ್ನು ಪಾಂಡವಪುರ ಉಪವಿಭಾಗದ ಸಹಕಾರ ಸಂಘಗಳ ಸಹಾಯಕ ನಿಬಂಧಕರು ಅನರ್ಹಗೊಳಿಸಿ ಆದೇಶ ಹೊರಡಿಸಿದ್ದಾರೆ.

ಗಂಜಾಂ ಗ್ರಾಮದ ಹಾಲು ಉತ್ಪಾದಕರ ಸಹಕಾರ ಸಂಘದ ಅಧ್ಯಕ್ಷ ಎನ್‌.ಭಾಸ್ಕರ್‌ ಅನರ್ಹಗೊಂಡವರು. ಸಂಘದ ನಿಯಮ 17(4)ಅನ್ನು ಉಲ್ಲಂಘಿಸಿ ಸಂಘಕ್ಕೆ ದಿನಗೂಲಿ ನೌಕರರನ್ನು ನೇಮಕ ಮಾಡಿಕೊಂಡಿರುವುದು ಲೋಪವಾಗಿದೆ. ಸಂಘದಲ್ಲಿ ಹಲವು ವರ್ಷಗಳಿಂದ ನೌಕರರಾಗಿ ಸೇವೆ ಸಲ್ಲಿಸಿದ್ದ ಹಿಂದಿನ ನೌಕರರಾದ ಎಸ್‌.ವಿರೂಪಾಕ್ಷ , ಪಿ.ಮೋಹನ್‌ ಕುಮಾರ್‌ ಹಾಗೂ ಕುಮಾರ ಅವರನ್ನು ವೃತ್ತಿಯಿಂದ ವಜಾಗೊಳಿಸಿ ಸಂಘಕ್ಕೆ ಮತ್ತೆ ಮೂರು ದಿನಗೂಲಿ ನೌಕರರನ್ನು ನೇಮಕ ಮಾಡಿಕೊಂಡಿದ್ದಾರೆ.

ತಲಾ 3750 ರೂ.ಗಳ ವೇತನ ನೀಡಿರುವುದು ಸಹಕಾರ ಸಂಘದ ನಿಯಮ ಮತ್ತು ಉಪವಿಧಿಯ ಉಲ್ಲಂಘನೆಯಾಗಿದೆ. ಇದರಿಂದ ಸಿಬ್ಬಂದಿ ವೇತನದ ಖರ್ಚು ಅಧಿಕವಾಗಿ ಸಂಘವು ಆರ್ಥಿಕವಾಗಿ ನಷ್ಟ ಉಂಟಾಗಲು ಕಾರಣರಾದ ಅಧ್ಯಕ್ಷ ರು ತಮ್ಮ ಅಧಿಕಾರವನ್ನು ದುರುಪಯೋಗಪಡಿಸಿಕೊಂಡಿರುವುದು ಮೇಲ್ನೋಟಕ್ಕೆ ಸಾಬೀತಾ ಗಿರುವುದರಿಂದ ಪಾಂಡವಪುರ ಉಪವಿಭಾಗದ ಸಹಕಾರ ಸಂಘಗಳ ಸಹಾಯಕ ನಿಬಂಧಕರಾದ ರಾಜು ಅವರು ಸಂಘದ ಅಧ್ಯಕ್ಷ ಎಸ್‌. ಭಾಸ್ಕರ್‌ ಅವರನ್ನು ಅಧ್ಯಕ್ಷ ಸ್ಥಾನ ಹಾಗೂ ನಿರ್ದೇಶಕ ಸ್ಥಾನದಿಂದ ಅನರ್ಹಗೊಳಿಸಿ ಮೂರು ವರ್ಷ ಯಾವುದೇ ಸಹಕಾರ ಸಂಘಗಳ ಚುನಾವಣೆಯಲ್ಲಿ ಸ್ಪರ್ಧಿಸದಂತೆ ಆದೇಶ ಹೊರಡಿಸಿದ್ದಾರೆ.