ಗ್ರಾಮೀಣ ಅಂಚೆ ನೌಕರರ ಮುಷ್ಕರ: ಮೆರವಣಿಗೆ ನಡೆಸಿ ಮನವಿ ಸಲ್ಲಿಕೆ

ಮಂಡ್ಯ: ನಾನಾ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ನಗರದ ಕೇಂದ್ರ ಅಂಚೆ ಕಚೇರಿ ಎದುರು ಮುಷ್ಕರ ನಡೆಸುತ್ತಿರುವ ಗ್ರಾಮೀಣ ಅಂಚೆ ನೌಕರರು 15ನೇ ದಿನವಾದ ಮಂಗಳವಾರ ಮರೆವಣಿಗೆ ಮೂಲಕ ಕಾವೇರಿ ವನದವರೆಗೆ ತೆರಳಿ ಜಿಲ್ಲಾಧಿಕಾರಿ ಅವರಿಗೆ ಮನವಿ ಸಲ್ಲಿಸಿದರು.

ನಗರದ ವಿವಿ ರಸ್ತೆಯ ಅಂಚೆ ಕಚೇರಿಯಿಂದ ಮೆರವಣಿಗೆ ಹೊರಟ ಗ್ರಾಮೀಣ ಅಂಚೆ ನೌಕರರು ಕೇಂದ್ರ ಸರಕಾರದ ವಿರುದ್ಧ ಘೋಷಣೆ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು. 7ನೇ ವೇತನ ಆಯೋಗದ ಕಮಲೇಶ್‌ಚಂದ್ರ ವರದಿಗೆ ಸದನದಲ್ಲಿ ಅನುಮೋದನೆ ತಕ್ಷಣ ಜಾರಿಗೆ ತರಬೇಕು. ಗ್ರಾಮೀಣ ಅಂಚೆ ನೌಕರರಿಗೆ ದೊರೆಯುತ್ತಿರುವ ಸಂಬಳ ಹೆಚ್ಚಾಗಬೇಕು. ನಿವೃತ್ತಿ ನಂತರ ಪಿಂಚಣಿ ಸೌಲಭ್ಯ ಕಲ್ಪಿಸಬೇಕು ಮತ್ತು ಇತರೆ ಗ್ರಾಮೀಣ ಅಂಚೆ ನೌಕರರ ನ್ಯಾಯ ಸಮ್ಮತ ಬೇಡಿಕೆಗಳನ್ನು ಕೇಂದ್ರ ಕೂಡಲೆ ಈಡೇರಿಬೇಕೆಂದು ಮನವಿ ಸಲ್ಲಿಸಿದರು.

ರಾಷ್ಟ್ರೀಯ ಗ್ರಾಮೀಣ ಅಂಚೆ ನೌಕರರ ಸಂಘದ ವಿಭಾಗೀಯ ಕಾರ‍್ಯದರ್ಶಿ ಹರೀಶ್‌, ಉಜಪಾಧ್ಯಕ್ಷ ನಿಂಗೇಗೌಡ, ರಮೇಶ್‌, ಅಧ್ಯಕ್ಷೆ ಅರುಣಿ, ಪುಟ್ಟರಾಜೇಗೌಡ, ಅಖಿಲ ಭಾರತೀಯ ಗ್ರಾಮೀಣ ಅಂಚೆ ನೌಕರರ ಸಂಘದ ಕಾರ‍್ಯದರ್ಶಿ ಶ್ರೀನಿವಾಸ್‌,ಖಜಾಂಚಿ ಶಿವಲಿಂಗಯ್ಯ ಇತರರು ಹಾಜರಿದ್ದರು.